Masiposipo 10:1-32
10 Masiposipo a Solomoni:
Mwaana a miruku onnaahakalaliha apapa awe,Nto mwaana ori mulolo onnaathananiha amama awe.
2 Muhakhu onaphwanyiwa moonanara hophuriha echu,Nto ekhaikhai ennamvuluxa muchu wookhwani.
3 Yehova haweeriha awookololowa murima* okhwa etala,Nto onamwaakhwatiiherya oonanara murima yeeyo awo aninlelaaya.*
4 Mata ooporora annahaawiha,Nto mata oophara muteko annaruuha muhakhu.
5 Mwaana oneera ichu mwa miruku onnahepha elukuluku ya elimwi,Nto mwaana oneera ichu mwawuuliha muru onamoona okona elukuluku ya ohepha.
6 Mareeliho ari vamuru va achu awookololowa murima,Nto eyano ya achu oonanara murima enniipithiha nlala.
7 Awookololowa murima onamuupuweleliwa nave onamureelihiwa,*Nto nsina na achu oonanara murima nnamuuca.
8 Yoole orino murima wa miruku onneemererya ikano,*Nto yoole onaloca moololo onammorela mu soohooxa.*
9 Yoole oneeca moororomeleya onamweecaka ahoovaka,Nto yoole onakocopiha iphiro sawe onamphwanyiwa.
10 Yoole onanyupuliha niitho moonanara onnatannya makacamiho,Nave yoole onaloca moololo onammorela mu soohooxa.*
11 Eyano ya achu awookololowa murima ehime ya okumi,Nto eyano ya achu oonanara murima ennavitha nlala.
12 Wiicana onnatannya owanawana,Nto osivela onnakhuneela soocheka soothene.
13 Miruku sinaphwanyeya mwaano mwa yoole orino wiiwexexa,Nto ekopo eri ntakhara eculi ya yoole ohinalapa muru.*
14 Yaale ari a miruku anniithukumanyerya masuwelelo,Nto eyano ya alolo eri waacamela epahu.
15 Muhakhu* wa muchu ooreela ti epooma awe yoolipihiwa.
Epahu ya mulipa oohaawa ti ohaawa wawe.
16 Miteko sa achu awookololowa murima sinakeriha wookumini;Nto yawiima ya muteko wa achu oonanara murima enakeeriha wa yoocheka.
17 Yoole oneemererya olakiwa onnooniherya ephiro ya wookumini,*Nto yoole onakhooca osameliwa onnaahuweliha akina.
18 Yoole onavitha wiica wawe onaloca sawootha,Nave yoole onaapa* mulolo.
19 Masu yaaca, ti wooliva osepa yoocheka,Nto yoole onavareryela nlumi nawe onneerano ichu mwa miruku.
20 Nlumi na achu awookololowa murima nri ntoko eparata yaphaamaxa,Nto murima wa achu ootakhala ti wasisapo vakhaani.
21 Masu a achu awookololowa murima annaacelekhela* ancipale,Nto alolo annakhwa nthowa na ohilapa muru.*
22 Ti mareeliho a Yehova anamweeriha muchu okhala a muhakhu.
Nave Owo hanaaceereryavo yawiicela* vyakala.
23 Wa mulolo, wiivoliherya mmeecelo awuuliha muru, ori ntoko othata,Nto muchu awiiwexexa ookhalano miruku.
24 Yeeyo achu oonanara murima anoovaaya enamwaaphacuwela;Nto yookhwela ya achu awookololowa murima anamvahiwa.
25 Echeku yawoopiha yavira, achu oonanara murima hekhala,Nto awookololowa murima ari ntoko mathipelo yaawo anakhala okhala wookhala.
26 Hiihaa ntoko viinyu oonyuunya* mwaano ni mwiixi onasoosihaaya miitho,Ti hiihaa tho porora wa yoole onamurumiha.*
27 Omoova Yehova onnaaceererya okumi,Nto iyaakha sa achu oonanara murima sinamukhuveihiwa.
28 Ewehereryo ya achu awookololowa murima ennaruuha ohakalala,Nto ewehereryo ya achu oonanara murima enamucakanela.
29 Ephiro ya Yehova nipuro noolipihiwa wa achu oororomeleya,Nto wa achu ootakhala enataphulela otoloxiwa.
30 Achu awookololowa herwa yuuwihiwa,Nto aweera soonanara herwa tho emaka veelaponi yavathi.
31 Eyano ya achu awookololowa murima ennakumiha* miruku,Nto nlumi na achu ootakhala nnamukwasiwa.
32 Iyano sa achu awookololowa murima soosuwela yeeyo eri yoohakalaliha,Nto eyano ya achu oonanara murima ti yootakhala.
Inoota
^ Naari: “heeriha okumi wa awookololowa murima.”
^ Naari: “yeeyo anakhalelaaya nrima.”
^ Naari: “Ovuwa wa awookololowa murima onamureelihiwa.”
^ Mu Ehepiri, “malamulo.”
^ Naari: “onamunyikaleliwa vathi.”
^ Naari: “onamunyikaleliwa vathi.”
^ Mu Ehepiri, “ohirino murima.”
^ Naari: “Echu yasisapo.”
^ Naari akhweya: “ori mu ephiro ya wookumini.”
^ Naari: “onamwaramwaxa miyaha sawootha.”
^ Naari: “annahoolela.”
^ Naari: “othoiwa miruku.”
^ Naari: “othanana; nikacamiho.”
^ Naari: “vinaakre.”
^ Naari: “wa patarawu awe.”
^ Naari: “ennakumiha yawiima ya.”
