Masiposipo 15:1-33
15 Naakhulo nookurumuxa murima* ninnakuphiha esara,Nto masu oowali* waaceererya onanariwa.
2 Nlumi na achu a miruku ninnapharihela phaama masuwelelo,Nto eyano ya alolo enakumiha masu oololo.
3 Miitho a Yehova ari voothevene,Yaavareryaka oonanara murima ni aphaama.
4 Nlumi noomaaleleya* mwiri wa okumi,Nto masu ootakhala ennaruuha othananaxa.
5 Mulolo hanacicimiha olaka wa apapa awe,Nto yoole ori a miruku onneemererya wookololiwa.*
6 Vaate va muchu awookololowa wookhalavo muhakhu muncipale,Nto yawiima ya muteko wa* yoole ori oonanara murima ennamuruuhela makacamiho.
7 Iyano sa achu a miruku sinnamwaryamwaxa masuwelelo,Nto murima wa alolo honasiveliwano weerano yeela.
8 Mukucho wa achu oonanara murima ti woothanyeya wa Yehova,Nto nivekelo na awookololowa murima ninnamuhakalaliha Yoowo.
9 Yehova onnathanya ephiro ya yoole ori oonanara murima,Nto owo onnamusivela yoole oniilipixerya weera yeeyo eri yawookololowa.
10 Olakiwa onnooneya okhala woonanara* wa yoole onahiya ephiro,Nto yoole oniica osameliwa onarwa akhwa.
11 Mahiye* vamoha ni nipuro na otoloxiwa* iri vamiithoni va Yehova.
Hanka nto murima wa achu!
12 Oonyemula hanamusivela yoole onamookolola;*Owo hanaakoha achu a miruku.
13 Murima woohakalala onnamwaleela ethoi,Nto murima woothanana onnahiciha munepa.
14 Murima woosuwelaxa onnaavya masuwelelo,Nto eyano ya alolo enalya* soololo.
15 Wa muchu oothanana, mahiku oothene toonanara,Nto yoole a murima woohakalala* onnakhalano efesta mahiku oothene.
16 Ti waphaama muchu okhalano vakhaani amoovaka YehovaOpwaha okhalano muhakhu muncipale ni wuukhuwa.*
17 Ti waphaama olya ntikwa orivovo osivelaOpwaha okhuura emece yoonuna ya emope orivovo wiicana.
18 Muchu onaakuvela onyeenyeya otannya owanawana,Nto oopixa murima* onnamaaliha waakhulana.
19 Ephiro ya porora ti yoosareya miiwa,Nto ephiro ya awookololowa murima, rampha a wookowa.
20 Mwaana a miruku onnaahakalaliha apapa awe,Nto muchu oololo onnaanyemula amama awe.
21 Ololo onnamuhakalaliha yoole ohinalapa muru,*Nto muchu awiiwexexa oneeca mu ephiro yawookololowa.
22 Apalanu haneeca phaama waahikhalavo ovaanela,*Nto ni anamiruku ancipale ichu sinnakhumelela phaama.
23 Muchu onnahakalala vaavaa onavaheiye naakhulo* naphaama,Nave ti waphaama masu ene elociwe mu elukuluku yoophwanelela!
24 Ephiro ya ekumi ennamviiha yoole orino miruku,Wi emurapelihe yoowo Mahiye,* vathi.
25 Yehova onamunyaanya empa ya achu awiisoona,Nto onamukhapelela minlaano sa naamukhweli.
26 Yehova onnathanya muupuwelo oonanara a muchu ootakhala,Nto masu aphaama tooreera wa Yoowo.
27 Muchu awiiphwanyerya onnaruuhela makacamiho* echoko awe,Nto yoole oniica makhwankwa onamutitelela okhala.
28 Murima wa awookololowa onnuupuwelela ohaakumve waakhula.*
Nto eyano ya achu oonanara murima wuumula ichu soonanara.
29 Yehova ori ocai wa achu aweera soonanara,Nto onnawiriyana nivekelo na awookololowa murima.
30 Miitho awaarya* annahakalaliha murima;Muchaka waphaama onnalipiha* makhuva.
31 Yoole onawiriyana osameliwa yoowo onavaha okumiOnamaka vamoha ni achu a miruku.
32 Yoole onakhooca olakiwa onanyemula okumi awe,Nto yoole onawiriyana osameliwa onnaphwanya wiiwexexa.*
33 Omoova Yehova onnamuhusiha muchu okhala a miruku,Nave wiiyeviha tonapacerya nihaakumve ophiya ncicimiho.
Inoota
^ Naari: “naphaama.”
^ Naari: “awiicela.”
^ Naari: “nnapenuxa.”
^ Naari: “osameliwa.”
^ Naari: “sookhumelela sa.”
^ Naari: “woohooxa.”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “ni Apitoni.”
^ Naari: “onamusamela.”
^ Naari: “enaavya.”
^ Naari: “waphaama.”
^ Naari: “makacamiho.”
^ Naari: “oohaakuvela onanariwa.”
^ Mu Ehepiri, “ohirino murima.”
^ Naari: “muchu aahaavya miruku; waahikhalavo ovaanela woovitheya.”
^ Mu Ehepiri, “naakhulo na mwaano mwawe.”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “onnuuliha muru.”
^ Naari: “onnuupuwelela moopwacha mukhalelo wa waakhula; onnuupuwelela ohaakumve oloca.”
^ Naari: “Oweha waphaama.”
^ Mu Ehepiri, “onnaneneviha.”
^ Mu Ehepiri, “murima.”
