Masiposipo 16:1-33
16 Muchu onnarehererya muupuwelo a murima awe,*Nto naakhulo owo onavaheiye* nnarwa wa Yehova.
2 Muchu onnaanyiherya wi iphiro sawe soothene ti saphaama,*Nto Yehova onnaalikhela mathowa* eeparipari a muchu.
3 Oveleele wa Yehova miteko saa soothene*Nave apalanu aa anamukhumelela phaama.
4 Yehova onneeriha wi soothene ikhaviherye ntakhara yoolakelela awe,Ophiyerya tho achu oonanara murima ntakhara nihiku na epahu.
5 Oothene a murima wawiirumiha toothanyeya wa Yehova.
Ororomele wi* awo hiyooceela olakiwa.
6 Moorweela wa osivela woororomeleya ni okhala oororomeleya,Yoohesa ennaleveleliwa, nave moorweela wa omoova Yehova muchu onnarapela yoonanara.
7 Vaavaa Yehova onahakalaleiye ni meecelo a muchu,Ophiyerya wi owo onneeriha wi amwiicani a muchu owo ekhaleke mmureceleni ni yoowo.
8 Ti waphaama ophwanya vakhaani mwawookololowa,Opwaha okhalano sincipale ophwannye moohookololowa.
9 Muchu onanwerya wuupuwela meecelo awe mmurimani mwawe,Nto Yehova tonahoolela inaani sawe.
10 Iyano sa mwene inaphwanela olocaka soolakelela sooveereliwa;*Owo ahirwe athorihe moohookololowa.
11 Ipalansa ni miphimo soororomeleya ti sa Yehova;Miphimo soothene mmurupa mukhaani sinapakiwa ni yoowo.
12 Saweera soonanara ti soothanyeya wa mamwene,Woona wi munyukhu wa omwene onatikitheriwa phaameene ni wookololowa.
13 Masu a achu awookololowa annaahakalaliha mamwene;Awo annamusivela yoole onaloca eparipari.
14 Esara ya mwene eri ntoko namichaka a okhwa,Nto muchu a miruku onnakurumuxa* yeeyo.
15 Vaavaa ethoi ya mwene enamwaleelaaya, onnakhalavo okumi;Mahala awe ari ntoko neeku na epula mu elimwe.
16 Ti wooreeraxa ophwanya miruku opwaha ooru!
Ti waphaamaxa othanla wiiwexexa opwaha eparata.
17 Rampha a awookololowa murima onnarapela yeeyo eri yoonanara.
Yoole onavareryela mphiro awe onnakhapelela okumi awe.
18 Wiirumiha onnamuuwiha muchu,Nave munepa wa wiikhoma onnamukwaculiha muchu.
19 Ti waphaama okhala awiiyeviha* variyari va achu awiichacalaOpwaha okawana muhakhu wookhoconi ni achu awiikhoma.
20 Yoole onooniherya wiiwexexa mmwaha onamukhumelela phaama,*Nave oohakalala ti yoole onamuroromela Yehova.
21 Yoole a murima wa miruku onamweeriwa awiiwexexa,Nave yoole onaloca masu aphaama* toolekechaxa.
22 Wiiwexexa ehime ya okumi wa yaale arinono,Nto alolo annalakiwa ni ololo aya.
23 Murima wa muchu a miruku onnavaha eyano awe wiiwexexaNave onnaaceererya olekecha mmasu awe.
24 Masu aphaama ari ntoko mahavu a enuwi,Oosiva ntakhara okumi* nave oopenuxa makhuva.
25 Wookhalavo mphiro onakhala wi ti waphaama wa muchu,Nto wookuchulani onakeriha wookhwani.
26 Nchuno na olya na namuteko ninnamweeriha olapa mwakuru,Woona wi etala* tenamweeriha weerano yeeyo.
27 Muchu ootakhala onuuhula ichu soonanara;Masu awe ari ntoko nikalume na mooro.
28 Muchu awaakanyerya otannya ohiiwanana,Nave mulipa awaapa waamwalanya asinthamwene aphaama.
29 Muchu a nlala onnamuwoka mukhweiye,Nave onnamukeriha mu ephiro yoonanara.
30 Owo onnanyupuliha niitho vaavaa onuupuweleiye weera sootakhala.
Onnaluma iyano vaavaa oneereiye soonanara.
31 Ipwi korowa ooreera*Saphwanyiwa mu ephiro yawookololowa.
32 Yoole ohinaakuvela onanariwa taphaama ompwaha muchu oowerya,Nave yoole oniivareryela mwaneene* taphaama ompwaha yoole onavootha epooma.
33 Ekari ennavonyiwa,Nto yoolakelela yoothene eyo enavahaaya enarwa wa Yehova.
Inoota
^ Mu Ehepiri, “Apalanu a mmurimani ta muchu.”
^ Naari: “naakhulo noophwanelela.” Mu Ehepiri, “naakhulo na nlumi.”
^ Mu Ehepiri, “ti saweela.”
^ Mu Ehepiri, “minepa.”
^ Mu Ehepiri, “Opirikixele wa Yehova miteko saa soothene.”
^ Mu Ehepiri, “Ntata ni ntata.”
^ Naari: “soomuluku.”
^ Naari: “onnasepa; onnamaaliha.”
^ Mu Ehepiri, “awiiyeviha mmunepani.”
^ Mu Ehepiri, “onamphwanya yaphaama.”
^ Naari: “Nave nsu noolekechalekecha.” Mu Ehepiri, “Nave osiva wa iyano.”
^ Naari: “nlumi.” Moone Masu Atharihiwe, “Okumi.”
^ Mu Ehepiri, “eyano awe.”
^ Naari: “a ncicimiho.”
^ Mu Ehepiri, “onalamulela munepa awe.”
