Masiposipo 17:1-28
17 Ti waphaama vaate onalyiwavo nipatuxo nawuuma na epaau orivo murecele*Ohiyana ni vaate onalyiwavo ifesta* sincipale orivo waakhulana.
2 Namuteko orino miruku onammulamulela mwaana yoowo oneera ichu mwawuuliha muru;Nave onahaala waakhela nikupa na yoohiyeryiwa ntoko mmoha a munnawe ooyariwano.
3 Eparata ni ooru sinarehereryiwa vamooroni,Nto Yehova tonaalikhela mirima.
4 Oonanara murima anapwacha masu oophoreiha,Nave awootha anawiriyana nlumi nootakhala.
5 Onamunyemula oohaawa, onamuruwana yoole Ompanke,Yoole onahakalala ni ipahu sa akina, hooceela olakiwa.
6 Korowa a achu awuuluvala,Anamwane a anamwane aya,* nave ncicimiho na anamwane ari asitiithi aya!
7 Masu aphaama tahi oophwanelela wa mulolo.
Hanka nto masu awootha wa mulipa oolamulela!*
8 Yamahala eri ntoko nluku nasisapo* wa mwaneene;Woothewene onayeiyewo, eyo ennamuruuhela sookhumelela saphaama.
9 Yoole onakhurumuwela* achekeliwa* onnooniherya osivela,Nto yoole onaakeelela oloca mwaha onnaamwalanya asinthamwene aphaama.
10 Osamela wookhalano ovolowela wawiixeela wa muchu awiiwexexaOpwaha ommana mulolo ikwaha nsana.
11 Achu oonanara murima pahiru anaavya omwaryeya,Nto namichaka awuuma murima onamurumihiwa wi aalake.
12 Ori waphaama okumana ni ursu eethiyana aayeleenle asaana aweOpwaha okumana ni mulolo mu ololo awe.
13 Wakhala wi muchu onnaliva yaphaama ni yoonanara,Yoonanara herwa evinyavo vaate vawe.
14 Opaceryiha waakhulana ori ntoko ocuula maahi;*Ovinyevo waakhulana ohaakumve otepa.
15 Yoole ohinamvaha nthowa oonanara murima ni yoole onamvaha nthowa awookololowa,Oopiili toothanyeya wa Yehova.
16 Mphurelo taani mulolo onakhaleiyeno wakhala wi ookhalano mikhalelo sa ophwanya miruku,Aneera ahirino nchuno na ophwanya seiho?*
17 Nthamwene eeparipari onnooniherya osivela ilukuluku soothene,Nave onnakhala munna ooyariwano* mu ilukuluku sa makacamiho.
18 Muchu oohilapa muru* onnavahana ntata ni muchu mukinaNave onneemererya opaka evaale vamiithoni va mwaacamani awe.
19 Yoole onamusivela waakhulana onnasivela yoocheka.
Yoole onarakamiha mulako awe onaavya epahu.
20 Yoole orino murima wootakhala harwa aphwanya yaphaama,*Nave yoole onaloca sawootha onammorela mu epahu.
21 Yoole ori tiithi a mwaana ori mulolo onamuthananaka;Nave tiithi a mwaana oolosowa hanahakalala.
22 Murima woohakalala murece waphaama,*Nto munepa woothanana wuumiha mmakhuvani.*
23 Muchu oonanara murima onneemererya makhwankwa moovitheya*Wi akhoromanyihe ephiro yawookololowa.
24 Miruku iri ohoolo wa muchu oosuwelaxa,Nto miitho a mulolo annahuwahuwa ophiyerya weiwo elapo ekotenlaayawo.
25 Mwaana ori mulolo onnaathananiha apapa aweNave onnaasoosiha murima yaale amuyanre.
26 Tahi waphaama omulaka* awookololowa murima,Nave waamana achu oocicimiheya ti yoonanara.
27 Muchu a masuwelelo onnavareryela masu awe,Nave muchu awiiwexexa onnatitelela omaala.*
28 Ophiyerya tho mulolo amaala, onneeriwa a miruku,Nave yoole onawala iyano sawe, onneeriwa muchu awiiwexexa.
Inoota
^ Naari: “wiichaala.”
^ Mu Ehepiri, “mikucho.”
^ Naari: “asisulwa aya.”
^ Naari: “muchu oovuwa.”
^ Naari: “nri nluku nnaruuha weemereriwa.”
^ Mu Ehepiri, “onuuheela.”
^ Naari: “yoocheka.”
^ Naari: “ohula maahi aciiwe.” Mu Ehepiri, “otaphula maahi.”
^ Naari: “Aneera ahilapaka muru.” Mu Ehepiri, “Aneera ahirino murima.”
^ Naari: “eerukulu emoha.”
^ Mu Ehepiri, “ohirino murima.”
^ Naari: “harwa akhumelela phaama.”
^ Naari: “onnakhaviherya openuwa.”
^ Naari: “onnamaliha ikuru sa muchu.”
^ Mu Ehepiri, “makhwankwa avachirimani.”
^ Naari: “omuliviha.”
^ Mu Ehepiri, “tooriirya mmunepani.”
