Masiposipo 18:1-24
18 Yoole oniivalaanya onaavya soochuna sa yene mwaneene;Owo onnakhooca* miruku soothene soophara muteko.
2 Mulolo hanasiveliwa ohuserya echu ni akina;Owo onasiveliwa olaleya yeeyo eri mmurimani mwawe.
3 Oroha onarwa ni achu oonanara murima,Nave ni onyemula onnarwa wuulihiwa muru.
4 Masu a mwaano mwa muchu ari ntoko maahi awiixa,Ehime ya miruku eri ntoko muhice woosareya.
5 Tahi waphaama wooniherya nthalu wi muchu amukhaviherye oonanara murima,Naari mano omukhwatiiherya ekhaikhai awookololowa murima.
6 Masu a mulolo otannya waakhulana,Nave eyano awe owaniha.
7 Eyano ya mulolo ennamutoloxa yoowo,Nave iyano sawe muraakho wa okumi awe.
8 Masu a nawoothe ari ntoko ipetisku soosiva,*Seiho inamiryiwa mookhweya nave ikhuruwela mmirimani.
9 Yoole ori ooporora mmuteko aweMunna a yoole onatannya otoloxa.
10 Nsina na Yehova muconco woolipa.
Awookololowa murima onnachimakela mpuwa mwaya nave onnakhapeleleya.*
11 Muhakhu wa muchu ooreela epooma awe yoolipihiwa;Mmuupuweloni mwawe owo ori ntoko mukuso wookhapelela.
12 Muchu ahaakumve wuuwa, murima awe onnakhala wawiikhoma;Nave wiiyeviha tonapacerya nihaakumve ophiya ncicimiho.
13 Waakhula muchu ahaakumve wiiwa mwaha woothene,Ololo nave wuuliha muru.
14 Muchu oohakalala mmurimani onanwerya ovilela ni ereca,Nto taani oni awerye ovilela munepa woothanana?*
15 Murima wa muchu awiiwexexa onnaphwanya masuwelelo,Nave maaru a achu a miruku annaavya masuwelelo.
16 Yamahala ennahula milako wa yoole onavaha,Nave ennamweeriha ophiya vamiithoni va achu oochuneya.
17 Oopacerya oloca vamulacuni onakhala ntoko wi haano nthowa,Ophiyerya aruule mukina nave amukohakoha.*
18 Ovonya ekari onnamaliha owanawanaNave onnalakelela miyaha variyari va* amwiicani oowerya.
19 Ti woovila omwaacamela munnaa yoowo ori oonyeenyeya opwaha ovolowa mu epooma yoolipihiwa,Nave wookhala waakhulana onakhala ntoko milako sa epooma yoolipihiwa.
20 Orweela wa sawiima sa masu a muchu* owo onnavoniha erukulu awe;Owo onarwa avona ni yeeyo iyano sawe inakumihaaya.
21 Nlumi nookhalano owerya wa oruuha okhwa ni okhapelela okumi;Yaale anasiveliwa opharihela nenlo enarwa elya sawiima saya.
22 Yoole onamuthela muthiyana aphaama onnaphwanya echu yaphaama,Nave onnaakhela weemereryiwa* wa Yehova.
23 Oohaawa onniikhupanyiha aalocaka,Nto ooreela onaakhula moowali.
24 Aakhalavo asinthamwene ari ooreheryeya oruuhelana epahu,Nto ookhalavo nthamwene muchu onaataaneiyeno ompwaha munnawe ooyariwano.
Inoota
^ Naari: “onnanyemula; onnavaanya.”
^ Naari: “ntoko ichu inamiryiwa mwawaakuveya.”
^ Mu Ehepiri, “onnakuhiwa vasulu,” ela tiwi, voorakamela, avuluxiwa.
^ Naari: “ohikhalanoru ewehereryo.”
^ Naari: “amwaalikhela mwawiiseela.”
^ Mu Ehepiri, “Nave onnaamwalanya.”
^ Naari: “sa mwaano mwawe.”
^ Naari: “yoochuna yaphaama.”