Masiposipo 20:1-30
20 Eviinyu munyemu, nave yoowurya yoowaawa henalamuleleya;Yoole onahuwelihiwa ni seiya haano miruku.
2 Woopiha wa mwene* ori ntoko woopa murika wa mwaco;Yoole onaroxa esara ya mwene onahela ekumi awe va yawoopiha.
3 Ti woocicimiheya wa muchu osepa waakhulana,Nto alolo oothene anniivoliiherya mummo.
4 Porora hanalima elukuluku ya oriirya;Wa nthowa na yeela owo onnavekaveka elukuluku ya ohaca, vaavaa ohinakhaleiyeno echu.*
5 Muupuwelo a murima wa muchu ari ntoko maahi awiixa,Nto muchu oosuwelaxa onnarika yaawo.
6 Achu ancipale annalaleya osivela waya woororomeleya,Nto taani onawerya omphwanya muchu oororomeleya?
7 Awookololowa murima oneeca mu ororomeleya wawe.
Oohakalala anamwane awe yaawo eni erwe muhoolo.
8 Vaavaa mwene onakiraatheiye vamunyukhuni vawe woomwene wi athorihe,Owo onnaatoloxa* aweera soonanara oothene ni miitho awe.
9 Taani onawerya oloca: “Koheeliha murima aka,Nkaanoru yoocheka”?
10 Miphimo soohiroromeleya ni soowoka*Ti soothanyeya wa Yehova.
11 Ophiyerya tho wi mwaana* onnasuwanyeya moorweela wa saweera sawe,Waakhanle wi meecelo awe taphaama ni oophwanelela.
12 Maaru aaniiwa ni miitho anoona,Yehova topanke yaawo.
13 Ohisivele ikhove, weerano hiihaa onamuhaawa.
Ohule miitho aa, nave onamukhalano yoolya yincipale.
14 “Ela hereenre, ela hereenre!” onnaloca mulipa oothuma;Voocharela onnapwaha nave onniithamala.
15 Ookhalavo ooru ni maluku* mancipale ookhweleya,Nto iyano inavaha masuwelelo ti sookhweleyaxa.
16 Okuxe yoowara ya muchu yoowo opanke evaale ni muchu mukina,Nave wa yoole opanke evaale ni muthiyana* a elapo ekina, okuxe echu awe vyakala ntoko mweemeseryo.
17 Yoolya enaphwanyiwa moowoka ti yoosiva wa muchu,Nto voocharela, mwaano mwawe onahaala osareyamo maluku.
18 Wakhalavo ovaanela,* apalanu* annakhumelela phaama;*Owanihe ekhoco aa ni ohoolela wa miruku.
19 Nawoothe onnamwaramwasa sawiiphiini;Ohikhale vamoha ni yoole onasiveliwa waapa.*
20 Yoole onawuulumela apapa awe ni amama awe,Epanthi awe enamuxipihiwa yaphiya epiiphi.
21 Yoohiyeryiwa enaphwanyiwa mmukhalelo woohookololowa woopaceryaniHekhala nreeliho wookuchulani.
22 Ohiloce oriki: “Kinamunla ikuhu!”
Onweherye Yehova, nave owo onarwa oovuluxa.
23 Miphimo soohiroromeleya* ti soothanyeya wa Yehova,Nave epalansa yoowoka tahi yaphaama.
24 Iphiro sa muchu sinahooleliwa ni Yehova.
Ti mwawiihai muchu oneereiye awerye wiiwexexa ephiro awe?*
25 Onakhala muraakho wa muchu waakuvela oloca ariki: “Ti yaweela!”
Nave voocharela uupuwela nlakano opankeiye.
26 Mwene a miruku onnaamwalanya achu oonanara mirimaNave onnaanyikala ni ekaaro yawiipichano.
27 Nwiya wa muchu epanthi ya Yehova;Eyo ennaalikhela mpuwamwenexa mwa muchu.
28 Osivela woororomeleya ni ororomeleya onnamukhapelela mwene;Moorweela wa osivela woororomeleya owo onnatikitherya munyukhu awe woomwene.
29 Ovuwa wa amiravo ikuru saya,Nave ncicimiho na achu awuuluvala ipwi saya.
30 Miititiri ni makhwaca annaviihavo yoonanara,Nave owaxuliwa onnarehererya omuchu wa mpuwamwenexa wa muchu.
Inoota
^ Naari: “Woova yoowo mwene onatannyeiye.”
^ Naari akhweya: “Onahaala waavya yoolya elukuluku ya ohaca, nto haphwanya echu.”
^ Naari: “onnaaveera.”
^ Naari: “Miphimo miili sa maluku ni ikaruma piili soophimano.”
^ Naari: “ponkwe.”
^ Moone Masu Atharihiwe.
^ Naari: “muchu.”
^ Naari: “ekano.”
^ Naari: “marehereryo.”
^ Naari: “annatikitheryeya.”
^ Naari: “yoole onalekecha ni iyano.”
^ Naari: “Miphimo miili sa maluku.”
^ Naari: “ephiro yoophwanela ochara.”
