Masiposipo 21:1-31
21 Murima wa mwene ori ntoko muhice wa maahi mmatani mwa Yehova.
Owo onnahoolela akerihaka weiwo onachuneiyewo.
2 Muchu onnaanyiherya wi iphiro sawe soothene ti saphaama,Nto Yehova tonaalikhela mirima.*
3 Opaka yeeyo eri yaphaama ni yawookololowaEnnamuhakalaliha vancipale Yehova opwaha mukucho.
4 Miitho awiisoona a achu oonanara murima ni murima aya wawiirumihaIri epanthi enaamwaleela mu iphiro saya nave ichu seiha yoocheka.
5 Apalanu* a muchu oowetha, mweeparipari annakumiherya sookhumelela saphaama,*Nto oothene yaale anapaka ichu ehipacenrye wuupuwelela, mweeparipari enarwa ehaawa.
6 Muhakhu onaphwanyiwa ni nlumi nawootha,Ori ntoko mucarapo ohinalekela, muraakho wawiipha.*
7 Nlala na achu oonanara murima nnamwaatoloxa,Tiwi awo annakhooca opaka yeekhaikhai.
8 Ephiro ya muchu orino nthowa ti yookocoopa,Nto saweera sa muchu aweela ti sawookololowa.
9 Ti waphaama okhala vakwantuni, osulu wa empa,Opwaha okhala mu empa emohamoha ni muthiyana oorucu.*
10 Muchu oonanara murima onanlela yeeyo eri yoonanara;Owo hanammorela ikharari mwaacamani awe.
11 Vaavaa oonyemula onalakiweiye, oohisuwela onnakhala a miruku;Vaavaa amiruku onaleelihiweiye,* onnakhalano masuwelelo.*
12 Awookololowa murima onnavarerya empa ya aweera soonanara,Nave onnawuuwiherya aweera soonanara va epahu.
13 Yoole onaciyela iwaru sawe wi ahiiwe okhuwela wa oohaawa,Owo tho onahaala okhuwela nave harwa aakhuliwa.
14 Yoovaha enavahiwa wiiphiini ennamaaliha esara;Nave makhwankwa anavahiwa moovitheya,* annamaaliha onanariwa otokweene.
15 Opaka ichu mwawookololowa ti yoohakalaliha wa muchu awookololowa,Nto echu yawoopiha wa yaale anapaka soonanara.
16 Muchu yoowo onahuwela mu ephiro yamirukuOnarwa iichuuwa vamoha ni alipa ookhwa.
17 Yoole onasiveliwa othata* onamuhaawa;Yoole onasivela eviinyu ni makhurwa harwa areela.
18 Oonanara murima yawoopola wa awookololowa;Nave oohiroromeleya, onarwa akuxiwa mu nipuro na awookololowa.
19 Ti waphaama okhala otakhwaniOpwaha okhala ni muthiyana oorucu* ni oonyeenyeya.
20 Mu empa ya muchu a miruku wookhalamo muhakhu wookhweleyaxa ni makhurwa,Nto mulolo hanapharihela phaama* yeeyo oreiyeno.
21 Yoole oniilipixerya waavya wookololowa ni osivela woororomeleyaOnarwa aphwanya okumi, wookololowa ni ncicimiho.
22 Muchu a miruku onanwerya owela ixiri sa* epooma ya achu akuruNi onyaanya ipa soolipihiwa seiho yaaroromelaaya.
23 Yoole onakhapelela eyano awe ni nlumi naweOnnasepa* makacamiho.
24 Yoole oneerano ichu mwawiikhomaxaOniichaniwa awiisoona ni awiirumiha.
25 Yeeyo porora onanleleiye enammwiipha,Woona wi matata awe annakhooca olapa.
26 Owo onnanlelaxa nihiku noothene,Nto awookololowa murima onnavaha ni murima woothene.
27 Mukucho wa achu oonanara murima ti woothanyeya.
Hanka nto wakhala wi anavaha ni mathowa oonanara!*
28 Namoona awootha onamukhwa,Nto muchu onasuwela owiriyana onamukhumelela phaama mu onamoona awe.*
29 Muchu oonanara murima onnaweeriha akina wuupuwela wi toolipa murima,Nto ti muchu awookololowa murima orino ephiro yaphaama.*
30 Hisaavo miruku, naari wiiwexexa, naari ikano inavaanyihana ni Yehova.
31 Kavalo onarehereryiwa ntakhara nihiku na ekhoco,Nto ovuluxa ti wa Yehova.
Inoota
^ Naari: “mathowa.”
^ Naari: “Marehereryo.”
^ Naari: “annakumiherya mphurelo.”
^ Naari akhweya: “mucarapo ohinalekela wa yaale anaavya okhwa.”
^ Naari: “awaapa.”
^ Naari: “onaakheleiye miruku.”
^ Naari: “onnasuwela echu yaweera.”
^ Mu Ehepiri, “makhwankwa a vachirimani.”
^ Naari: “opuha.”
^ Naari: “awaapa.”
^ Naari: “onnananariha; hanapwacha.” Mu Ehepiri, “onnamirya.”
^ Naari: “ovootha.”
^ Naari: “onnoopola okumi awe wa.”
^ Naari: “ni meecelo awuuliha muru.”
^ Mu Ehepiri, “onamuloca okhala wookhala.”
^ Naari: “oneeriha ephiro awe okhala yaphaama.”
