Masiposipo 22:1-29
22 Othanla nsina naphaama* ti waphaama opwaha muhakhu muncipale;Ocicimihiwa* ti waphaama opwaha eparata ni ooru.
2 Muchu ooreela ni oohaawa analikana mmukhalelo ola:*
Oopiili apakiwe ni Yehova.
3 Amiruku oona yawoopiha onniipitha,Nto achu oohisuwela annapwaherawo nave annahooxeya ni sookhumelela sene.*
4 Yookhumelela ya wiiyeviha ni omoova YehovaOri muhakhu, ncicimiho ni okumi.
5 Mu ephiro ya muchu ootakhala wookhalamo miiwa ni miraakho,Nto yoole onavaha esisapo okumi onnakhala ocai wa seiho.
6 Omuhusihe* mwaana mu ephiro onaphwaneleiye weecamo;Naamwi uuluvanle, harwa apheruwa mwa yeeyo.
7 Ooreela onnamulamulela oohaawa,Nave yoole onapoleya kapuro a yoole ompolen’ye.
8 Yoole onaala soohookololowa onarwa ahepha makacamiho,Nave ekopo ya esara awe enammala.
9 Muchu oovaha* onarwa areelihiwa,Woona wi onnakawana yoolya awe ni oohaawa.
10 Omwiikare muchu oonyemula,Nave owanawana onarwa ocakanela;Waakhulana ni oruwanana onarwa omala.
11 Yoole onamusivela weela wa murima nave onaloca masu aphaamaOnamukhala nthamwene a mwene.
12 Miitho a Yehova annakhapelela masuwelelo,Nto owo onnaakanyerya masu a achu oowoka.
13 Porora oni: “Vaate ookhalavo mwaco!
Kinamukhwa veeri va muxewe!”*
14 Eyano ya muthiyana aweeca pure* nlici nawiixa.
Yoole onathorihiwa ni Yehova onarwa amorelamo.
15 Ololo onakhala mmurimani mwa anamwane,*Nto ekopo ya olaka ennaviihamo ololo owo mwa yaawo.
16 Yoole onamwiiyera oohaawa wi areeleVamoha ni yoole onamvaha samahala ooreelaAnarwa ehaawa.
17 Owiriyaneke nave wiiweke masu a achu a miruku,Wi weemererye masuwelelo aka ni murima woothene;
18 Tiwi, onamukhala oohakalala wakhapelela ichu seiha mmurimani mwaa,Wi soothene ikhaleke mu iyano saa.
19 Wi omuroromeleke Yehova,Olelo kinnoovaha masuwelelo.
20 Apwanne nkoorepenle,Wi koovahe ikano ni masuwelelo,
21 Wi koohusihe masu eeparipari ni oororomeleya,Wi owerye okooka ni muchaka wawaakhwanela wa yoole oorumme?
22 Ohimwiiyerye oohaawa omweerelaka okhala oohaawa,Nave ohimuhooxe oothoiwa va mulako mutokweene wa epooma,
23 Tiwi mwaneene Yehova onarwa aakiha mulacu ayaNave onamviihavo okumi wa yaale anawiiyera.
24 Oheeceke ni muchu yoole onaakuvela onyeenyeya,Naari okhala vamoha ni yoole awaaca esara,
25 Wi ohirwe ohuserye iphiro saweNi wiireela muraakho mukhataa.
26 Ohikhale ntoko yaale anavahana ntata,*Yaawo anapaka ivaale.
27 Waahikhalano echu wi oliveno,Ophiyerya ekaamaa yeeyo onakonelaawe onamwaakhiwa!
28 Ohixovihe minlaano sakhalaiSeiho saathipeliwe ni makholo aa.
29 Apwanne woomoona muchu ori amavyakelo mmuteko awe?
Owo onarwa eemela vamiithoni va mamwene,Ohiya vamiithoni va achu pure.
Inoota
^ Naari: “ovuwa waphaama.” Mu Ehepiri, “nsina.”
^ Mu Ehepiri, “Weemereryiwa.”
^ Mu Ehepiri, “anakumana va.”
^ Naari: “nave annalakiwa.”
^ Naari: “Omuvyakihe.”
^ Mu Ehepiri, “Yoole orino niitho naphaama.”
^ Naari: “rampha.”
^ Mu Ehepiri, “a nloko nikina.” Moone Masiposipo 2:16.
^ Naari: “maponkwe; amiravo.”
^ Ela tiwi, ororomeliha echu ni muchu mukina.
