Masiposipo 24:1-34
24 Ohinaakhalela nrima achu oonanara murima,Naari mano ochuna okhala ni yaawo,
2 Tiwi, murima aya onuupuwelela weera ichu sa nlala,Nave iyano saya sinaloca ichu sootakhala.
3 Moorweela wa miruku empa* ennatekiwa,Nave moorweela wa wiiwexexa eyo ennatikitheryiwa.
4 Moorweela wa masuwelelo ikwartu saya sinnasareyaNi muhakhu woothene wookhweleya ni wooreera.
5 Muchu a miruku toowerya,Nave ni masuwelelo muchu onnaaceererya owerya wawe.
6 Ni ohoolela wa miruku* onarwa owaniha ekhoco aa,Ni alipa a miruku ancipale onnakhalavo ovootha.*
7 Miruku seeparipari iri ocai wa mulolo;Owo haano echu yooloca va mulako mutokweene wa epooma.
8 Yoole onuupuwelela weera soonanaraOnarwa iichaniwa namawaniha.
9 Muupuwelo oololo* yoocheka,Nave achu annamuthanya muchu oonyemula.
10 Wakhala ooceecheya mu nihiku na sawuukhula,*Ikuru saa sinnavukuwa.
11 Owaakihe yaale anakerihiwa wookhwani;Waavuluxe yaale anaphirikeya eyaaka wiiphiwa.
12 Wakhala wi wooloca oriki: “Nto hinaasuwela echu,”
Apwanne yoole onaalikhela mirima* hiiwexexa?
Aa, yoole onoovarerya* onamusuwelaNave onammukookiherya muchu ti muchu mwawiiwanana ni saweera sawe.
13 Mwanaka, olye enuwi, woona wi ti yaphaama;Enuwi ya mmahavuni ti yoosiva va nlumini.
14 Moolikana, osuwele wi miruku ti saphaama wa weyo.
Wakhala wi woophwanya, onamukhalano omwaahiyu waphaama,Nave hiwaakhiwa* ewehereryo aa.
15 Ohiipithe waacamela empa ya muchu awookololowa murima, ntoko muchu oonanara murima;Ohinyaanye nipuro nawe nawiichuuwavo.
16 Tiwi, naamwi muchu awookololowa murima uuwale ikwaha thanu napiili, owo onarwa avinya wanaawiili;Nto achu oonanara murima enarwa ekwaculiwa wa nthowa na epahu.
17 Mwiicani aa uuwa, ohihakalale;Nave akwaculiwa, ohichape mmurimani mwaa;
18 Moohiyana, Yehova onamoona nave hasiveliwa,Nave owo onamviihavo esara awe wa yoowo.*
19 Ohiphweeleye* wa nthowa na achu ootakhala;Ohinaakhalela nrima achu oonanara murima.
20 Woona wi hiwaavo omwaahiyu wa achu ootakhala;Epanthi ya achu oonanara murima enamuxipihiwa.
21 Mwanaka, omooveke Yehova vamoha ni mwene,Nave ohaataaneke ni achu oomwaryeya,*
22 Tiwi epahu aya enamphiya mootutuxa.
Taani onasuwela makacamiho taani oopiili* aneeraaya yaaruuhele yaawo?
23 Ala tho masu a alipa a miruku:
Tahi waphaama wooniherya nthalu mu othoriha.
24 Yoole onahaala oloca wa muchu oonanara murima ariki: “Weyaano wa muchu awookololowa murima,”
Onamuulumeliwa ni achu nave onamuthorihiwa ni maloko.
25 Nto yaale anamusamela, ichu sinanweecelaka phaamaNave anamureelihiwa ni ichu saphaama.
26 Achu anamumvaha epeexu yoole onavaha naakhulo neeparipari.*
27 Orehererye toko miteko saa mikina nave opachule emaca;Voocharela oteke empaa.*
28 Ohimweerele onamoona woonanara mwaacamani aa ohirino mathipelo,Ohipharihele iyano saa wi waawoke akina.
29 Ohiloce oriki: “Kinammweerela yeeyo okeerenleiye;Kinammukookiherya yeeyo eenreiye.”*
30 Kaavira mu emaca ya porora,Mu emaca ya uuva ya muchu oohilapa muru.*
31 Kaahoona ephimpe;Vachayani osaren’yevo oyele,Nave mukuso aya wa maluku ori milepe.
32 Kaahivarerya yeela nave kuupuwela;Kaahoona nave kihuseryavo nihusiheryo nla:*
33 Ikhove tonto, otuthela tonto,Okhuna miwono vakhaani ntakhara wiichuuwa,
34 Vaavaa nto ohaawa waa onamphiya ntoko mpava,Nave othoiwa waa ntoko muchu awoopiha.
Inoota
^ Naari: “achu aveechokoni.”
^ Naari: “wa mavyakelo.”
^ Naari: “okhumelela phaama; nivuluxo.”
^ Naari: “Muupuwelo a mulolo.”
^ Naari: “mu ilukuluku sa sawuukhula.”
^ Naari: “mathowa.”
^ Naari: “onavarerya okumi aa.”
^ Naari: “hekwasiwa.”
^ Ela tiwi, wa mwiicani.
^ Naari: “Ohikhale oonyeenyeya.”
^ Naari: “oorukunuwela.”
^ Ela tiwi, Yehova ni mwene.
^ Naari akhweya: “Waakhula mooluluwanya ori ntoko ovaha epeexo.”
^ Naari: “otikitherye echoko aa.”
^ Naari: “Kinammwinlela ikuhu.”
^ Mu Ehepiri, “ohirino murima.”
^ Mu Ehepiri, “keemererya olaka.”
