Masiposipo 26:1-28
26 Hiihaa ntoko mucarapo elukuluku ya elimwi ni epula elukuluku yoohepha,Hiihaa tho ncicimiho tahi noophwanelela wa mulolo.
2 Hiihaa ntoko epalame enakhalaayano mathowa a ochawa nave naakhaare onakhaleiyeno mathowa a ovava,Hiihaa tho wuulumela honarwa nihirivo nthowa.*
3 Nwaxuxo ti wa kavalo, muthipo wa mwaano ti wa puuru,Nave ekopo eri ntakhara iculi sa alolo.
4 Ohimwaakhule mulolo mwawiiwanana ni ololo awe,Wi weyo ohiphwanaphwaneno.*
5 Omwaakhule mulolo mwawiiwanana ni ololo awe,Wi owo ahuupuwele wi tamiruku.
6 Hiihaa ntoko muchu onakwasa manaani awe nave iihooxa yoowo mwaneene,*Hiihaa tho ti yoowo onamuroromela mulolo wi apake ichu sawe.
7 Hiihaa ntoko meco sooceecheya* sa muchu oorakala,Hiihaa tho ti masiposipo mwaano mwa alolo.
8 Hiihaa ntoko omakelela nluku va mpilimani,Hiihaa tho, ori omvaha ncicimiho mulolo.
9 Hiihaa ntoko mwiri wa miiwa mmatani mwa mvona,*Hiihaa tho ti masiposipo mwaano mwa alolo.
10 Hiihaa ntoko mulipa oovonya munra onaphoreiha purepure,*Hiihaa tho, ti yoole onampaka mulolo ntoko namuteko awe naari muchu pure onaamvira.
11 Hiihaa ntoko mwanapwa onakookela marapheyo awe,Hiihaa tho mulolo onnakookela ololo awe.
12 Woomoona muchu yoowo oniiseera okhala a miruku?
Yookhalavo ewehereryo wa mulolo ompwaha yoowo.
13 Porora oni: “Muramphani ookhalamo mwaco awoopiha,Veeri va mphiro* ookhalavo mwaco!”
14 Hiihaa ntoko nsele nnarukunuwaaya vaava-vaava,*Hiihaa tho porora onnatitelela wiirukunusa vakaamani vawe.
15 Porora onnakeriha ntata nawe mutixelani,Nto onnatepa okoma wi akerihe yoolya mwaano.
16 Porora onaanyiherya wi tamirukuxaWaapwaha achu athanu napiili anaakhula mwa miruku.
17 Ntoko muchu onaphara maaru a mwanapwa,Muchu yoowo oni aviraka akhala oosarasareya wa nthowa na* waakhulana wa akina.
18 Ntoko naanepa onavonya mavaka ooveya oovarela ni mavaka awiipha,*
19 Hiihaa tho muchu yoowo onanwoka mwaacamani awe nave aloca: “Miyaano kaamuthata pahi.”
20 Ohirivo mawuuni, mooro onnaxipha;Nave ohirivo nawoothe, waakhulana onnamala.
21 Hiihaa ntoko ohela makhala vamakalumeni ni ohela mawuuni vamooroni,Hiihaa tho muchu oorucu onnaaceererya waakhulana.
22 Masu a nawoothe ari ntoko ipetisku soosiva,*Seiho inamiryiwa mookhweya nave ikhuruwela mmirimani.
23 Ntoko nivali na oloko nihuruweliwe ni eparata,Hiihaa tho masu aphaama anakhuma mmurimani* wootakhala.
24 Yoole onawiica akina onnapharihela masu wi iipithihe wiica wawe,Nto mmurimani mwawe osaren’yemo owoka.
25 Naamwi alocaka mwaphaama, ohimuroromele yoowo,Tiwi, sookhalamo ichu thanu napiili soothanyeya mmurimani mwawe.*
26 Naamwi avithaka wiica wawe moorweela wa owoka,Otakhala wawe onamooneya mmulokoni.
27 Yoole onathipa nlici onammorelamo,Nave yoole onapirikixa nluku nnammuphita.
28 Nlumi nawootha ninnawiica yaale nnaahooxaaya,Nave eyano yoowoka ennatoloxa.
Inoota
^ Naari akhweya: “Hiihaa tho wuulumela woohookololowa honaakhwaniheryeya.”
^ Naari: “ohikhale oolikana ni yoowo.”
^ Mu Ehepiri, “onawurya nlala.”
^ Naari: “sookhoropowa.”
^ Naari: “namuhapaliwa.”
^ Naari: “onaaphoreiha oothene.”
^ Naari: “Nipuro nawaaciwavo.”
^ Naari: “mu toopratisa.”
^ Naari akhweya: “aviraka avolowela.”
^ Naari: “mavaka ni okhwa.”
^ Naari: “ntoko ichu inamiryiwa mwawaakuveya.”
^ Mu Ehepiri, “iyano soolucuwa ni murima.”
^ Naari: “Tiwi, murima awe ti woothanyeya moomalela.”
