Masiposipo 27:1-27
27 Ohiithamale nnihiku noomeelo,Woona wi honasuwela enahaala weereya vanihiku.*
2 Ekhale akina eni yoothamalele,* ohiya eyano aa;Akhale muchu mukina* oni eereno, ohiya iyano saa.
3 Nluku ti noolimela nave ehaava murici,Nto onyeenyeya onatannyiwa ni mulolo ti woolimelaxa opwaha ichu seiha.
4 Onanariwa ti wawoopiha nave esara eri ntoko osareya wa maahi,Nto taani onawerya ovilela ehace?
5 Ti waphaama osameliwa mookwakwaleya opwaha osivela wookhuweya.
6 Makhwaca anatannyiwa ni nthamwene toororomeleya,Nto ipeexo sa mwiicani ti sawaaca.*
7 Muchu ovonne onnakhooca* enuwi ya mmahavuni;Nto wa yoole ovoliwe, ophiyerya tho echu yoowaawa ti yoosiva.
8 Ntoko palame yoowo ori ocai wa* epuuru aweTi muchu yoowo ori ocai wa vaate vawe.
9 Makhurwa ni sawunkhela sinnahakalaliha murima,Hiihaa ntoko onthamwene woosiva onaphacuwa moorweela wa ekano yeeparipari.
10 Ohimunyanyale nthamwene aa naari nthamwene a apapaa,Nave ohichimakele vaate va munnaa wakumanano epahu;Okhalano mwaacamani vakhiviru ti waphaamaxa ompwaha munnaa yoowo ori ocai.
11 Okhale a miruku mwanaka, nave ohakalalihe murima aka,Wi miyo kiwerye omwaakhula yoole onakinyemula.*
12 Muchu a miruku oona yawoopiha onniipitha,Nto achu oohisuwela annapwaherawo nave annahooxeya ni sookhumelela sene.*
13 Okuxe yoowara ya muchu yoowo opanke evaale ni muchu mukina,Nave yoole opanke evaale ni muthiyana* a elapo ekina, okuxe echu awe vyakala ntoko mweemeseryo.
14 Vaavaa muchu onamureeliheiye mukhweiye ni masu oovuwa wooxiixelo ene,Eyo enooniwa ni yoowo ntoko omuulumela.
15 Muthiyana oorucu* ori ntoko empa ehinamaala oconya nihiku na epula.
16 Yoowo onawerya omvareryela muthiyana yoola, onnawerya ophara echekuNave onnawerya ophuta makhurwa ni ntata nawe noolopwana.
17 Hiihaa ntoko muthipo onanolaaya muthipo mukina,Hiihaa tho muchu onnamunola nthamwene awe.*
18 Yoole onathokororya mwiri wa mukuukhu onamulya sawiima sene,Nave yoole onamuthokororya pwiya awe onamucicimihiwa.
19 Hiihaa ntoko ethoi ya muchu enooneelaaya mmaahini,Hiihaa tho murima wa muchu onnooniherya murima wa muchu mukina.
20 Mahiye nnipuro nootoloxa* hisinavonaru,Hiihaa tho miitho a muchu hanavona.
21 Hiihaa ntoko eparata ni ooru inarehereryiwaaya vamooroni,Hiihaa tho muchu onneereryiwa ni ncicimiho onaakheleiye.*
22 Naamwi omvonce mulolo ntoko yoolya mweeraweni,Ololo awe horwa omuhiya.
23 Onaphwanela osuwela phaama muhuwo aa,Okhapeleleke phaama* ipucepuche saa,
24 Tiwi muhakhu honiikhalelaru okhala wookhala,Naari mano korowa wa miyareriwo soothene.
25 Manaxi makithi annacakanela nave manaxi mavyaani annaphuwela,Nave munyepu wa mmiyaakoni onnathukumanyiwa.
26 Ipucepuche sinnoovaha soowara,Nave ipuri seelopwana sinnoovaha ikhorowa soothumano emaca.
27 Nave tho yookhalavo eleiti ya epuri yeethiyana,Yawaakhwana wi wiivakuleleno, waavakulele aveemusini vaa ni waakhaviherya anamuteko aa aasithiyana.
Inoota
^ Mu Ehepiri, “tiheeni nihiku nnahaalaaya oyara.”
^ Mu Ehepiri, “Muchu ohimusuwenlaawe akhale toni oothamalele.”
^ Mu Ehepiri, “muchu a elapo ekina.”
^ Naari akhweya: “soowoka; sookhinyererya.”
^ Mu Ehepiri, “onnanyikala.”
^ Naari: “ochanwe va.”
^ Naari: “onakiroha.”
^ Naari: “annalakiwa.”
^ Naari: “muchu.”
^ Naari: “awaapa.”
^ Mu Ehepiri, “onnanola ethoi ya nthamwene awe.”
^ Naari: “Seyoli ni Apitoni.”
^ Naari: “Hiihaa tho ti muchu ni ncicimiho nawe.”
^ Naari: “Otikitherye murima aa wa; Othokororyeke.”
