Masiposipo 29:1-27
29 Muchu onatitelela wuumiha murima* amanle osameliwa ikwaha sincipaleOnarwa atoloxiwa mootutuxa, nave hokhalavo murece.
2 Awookololowa yaaca, muloko onnahakalala;Nto vaavaa achu oonanara murima analamulelaaya, muloko onnathukumela.
3 Yoole onasivela miruku onnaahakalaliha apapaawe,Nto yoole oneeca ni acapaheya hanapharihela phaama* muhakhu awe.
4 Moorweela wa ekhaikhai mwene onniichaaliha elapo,Nto muchu onaavya makhwankwa onnananariha elapo.
5 Muchu onamuthamalela moowoka mwaacamani aweOnareya muraakho wa inaani sa mwaacamani awe.
6 Ochekela wa muchu ootakhala ori muraakho wa yoowo,Nto awookololowa murima onnakhuwela moohakalala nave onnachapa.
7 Awookololowa murima onnuukhuwa ni ophwanelela wa achu oohaawa,Nto achu oonanara murima hanapwacha yeeyo.
8 Achu aniirumiha anneeyela epooma,Nto achu a miruku annamaaliha esara.
9 Vaavaa muchu a miruku onavaanyihaneiye ni mulolo,Enakhalavo manyakunyaku ni otheya, nto mwaha honamala.
10 Alipa awiipha annamwiica yoole ohirino nthowa,*Nave annaavya omaliha okumi wa muchu awookololowa murima.*
11 Mulolo onnakumiherya vaate esara awe yoothene,*Nto muchu a miruku onnatitelela okhala oomaaleleya nave onniivareryela.
12 Wakhala wi mulamuleli onnawiriyana sawootha,Alapeli awe oothene anakhala oonanara murima.
13 Oohaawa ni ohooxa analikana mmukhalelo ola:*
Yehova onnavaha miitho aya omwaleela.*
14 Wakhala wi mwene onnaathoriha achu oohaawa moohikhala nthalu,Munyukhu awe onamukhala wookhapeleleya ilukuluku soothene.
15 Ekopo* ni osamela sinnavaha miruku,Nto mwaana onahiiwa aneeca ochuna wawe, onnawuuliha muru amama awe.
16 Vaavaa oonanara murima anaaceereryeyaaya, ochekela onnaaceereryeya;Nto awookololowa murima anarwa yoona omorihiwa waya.
17 Omulake mwanaa, nave owo onanwiichuuwihaNi onamoovaha ohakalala otokweene.
18 Ohirivo yawoona,* muloko onnahuwela,Nto yaale aniiwelela nlamulo toohakalala.
19 Namuteko hanlopoliwa ni masuru,Tiwi naamwi iiwexenxe, owo hiiwelela.
20 Woomoona muchu yoowo onaakuvela oloca ahuupuwelenle?
Yookhalavo ewehereryo wa mulolo ompwaha yoowo.
21 Wakhala wi kapuro onneepesiwa ovinyerya ari mwaana,Ohoolo waya, owo onarwa akhala oohithamalela.
22 Muchu onaakuvela onyeenyeya otannya owanawana,Nave yoole onaakuvela osarasareya onnapaka soocheka sincipale.
23 Wiikhoma wa muchu onammuyeviha,Nto yoole ori awiiyeviha mmunepani onamphwanya ncicimiho.
24 Yoole ori nthamwene a mpava onniisiica mwaneene.
Owo onniichaniwa wi eerele onamoona,* nto hanalokoha echu.
25 Othukumela vamiithoni va* achu muraakho,*Nto yoole onamuroromela Yehova onamukhapeleliwa.
26 Ancipale annaavya oloca ni* mulamuleli,Nyenya ori moorweela wa Yehova muchu onaphwanyeiye ekhaikhai.
27 Muchu oohookololowa murima toothanyeya wa awookololowa murima,Nave yoole oneeca mu ephiro yawookololowa toothanyeya wa oonanara murima.
Inoota
^ Naari: “ociya maaru.”
^ Naari: “onnanariha; hanapwacha.”
^ Naari: “muchu aphaama.”
^ Naari akhweya: “Nto muchu awookololowa murima onnaavya okhapelela murima awe.”
^ Naari: “miyoonelo sawe soothene.” Mu Ehepiri, “munepa awe woothene.”
^ Mu Ehepiri, “anakumana va.”
^ Ela tiwi, Owo onnaavaha okumi.
^ Naari: “Olaka; Owaxula.”
^ Naari: “yawoona ya miririmu; yawuupulula.”
^ Naari: “olipela onavolowela wuulumeliwa.”
^ Naari: “Owoova.”
^ Naari: “oreya muraakho.”
^ Naari akhweya: “annaavya mahala a.” Mu Ehepiri, “annaavya ethoi ya.”
