Masiposipo 30:1-33
30 Masu a Akuri, mwaana a Yaki. Muchaka woochuneya yoowo aamulenleiye Itiyeli; Itiyeli ni Ukali.
2 Miyaano kamuchu oohiisuwela ompwaha muchu mukina,Nave nkaano wiiwexexa yoowo muchu aaphwaneleiye okhalano.
3 Nkihusenrye miruku,Nave nkaano masuwelelo a Aweelaxa.
4 Taani ontoko owela wirimu nave akhuruwawo?
Taani ontoko ophuta echeku mmatatani?
Taani ontoko omaka maahi va yoowara awe?
Taani otikithenrye* makuchuwelo a elapo?
Nsina nawe taani nave nsina na mwanawe taani, waakhanle wi woosuwela?
5 Masu oothene a Muluku taweela.*
Owo eyaakiho wa yaale anachawela wa yoowo.
6 Ohaaceererye masu awe,Weerano, owo onamoosamelaNave enamooneya wi weyaano wa nawoothe.
7 Kinnoovekaani ichu piili;Muhikikhwatiiherye ichu seiha kihaakumve okhwa:
8 Mviihevo wa miyo owoka ni wootha,Nave muhikivahe ohaawa naari oreela.
Mukivahe pahiru yoolya enakaakhwana.
9 Wi kihiipeliwe nave kookhooceeni, kiriki: “Yehova taani?”
Naari mano okhala oohaawa nave kiiye, ni kinyemule * nsina na Muluku aka.
10 Ohimootherye namuteko vamiithoni va pwiyawe,Weerano owo onanwuulumela, nave weyo onamooniwa okhalano nthowa.
11 Wookhalavo muyareriwo onawuulumela apapaaya,Nave ohinaareeliha amamaaya.
12 Wookhalavo muyareriwo oniisoona okhala waweela,Nto oheelihiwe wa sooriipiheya saya.*
13 Wookhalavo muyareriwo orino miitho awiikhomaxaNave onaaweha akina ni eserekule!
14 Wookhalavo muyareriwo miino aya ari malemaNave ilakhutha saya siri miyaalo;Awo annaakhuura oothoiwa a veelaponi yavathiNave annaatoloxa oohaawa variyari va achu.
15 Mituthu sookhalano anamwane eeli aasithiyana anakhuwela eriki: “Kivahe! Kivahe!”
Sookhalavo ichu raru sihinaakhwaneliwa,Xexe sihintonko oloca siriki: “Waaca vaava”:
16 Mahiye* ni erukulu yoohiyara,Echaya enakhwa nthanana na maahi,Ni mooro, yoowo ohintonko oloca oriki: “Waaca vaava!”
17 Yoole onaaweha apapaawe mwa munyemu ni onathanya owiiwelela amamaaweMiitho awe ananwosoliwamo ni anakhuku opopaniNave anamuthumpwa ni asaana a enaka.
18 Sookhalavo ichu raru siri sootikhiniha wa miyaano,Ichu xexe kihiniiwexexaaka:
19 Mphiro wa enaka osulu,Mphiro wa enowa vamwala,Mphiro wa pophoro veeri va ephareya,Ni mphiro wa mulopwana ori nnamwali.
20 Mphiro wa muthiyana ooraruwa tuula:
Owo onnalya, apupucha iyano nave aloca:
“Hiyaavo yoonanara keenraaka.”
21 Sookhalavo ichu raru inacikinya elapo,Ichu xexe seiho eyo ehinaweryaaya ovilela:
22 Kapuro yoowo onakhala mwene,Mulolo iipeliwe ni yoolya,
23 Muthiyana awiiciwa* yoowo onatheliwa,Ni namuteko amwaamuthiyana onakuxa nipuro na asenyora awe.*
24 Sookhalavo soopatuxiwa xexe siri sooyevaxa veelaponi,Nto iri sa mirukuxa:*
25 Ineneele tahi soopatuxiwa sakuru,*Naamwiihiiha, sinnarehererya yoolya aya mu elimwe.
26 Amachika* tahi soopatuxiwa soowerya,*Nto annapaka ipa saya mmiyalani.
27 Misope hisaano mwene,Nto iho sinnavava ipheremanne.*
28 Nimara ninnaphara soothene ni mata aya,Nave ninnavolowa mu empa ya mwene.
29 Sookhalavo ichu raru sineeca mmukhalelo wootikhiniha,Ichu xexe siri sootikhiniha saaweecaka:
30 Mwaco, yoowo ori akuruxa waapwaha axinama oothene,Nave haavo onamukookiherya oculi,
31 Mwanapwa oochimakaxa, nakhoro apuriNi mwene yoowo onahooliwa ni anakhoco awe.
32 Waakhanle wi wohooniherya ololo nave wiisinnuwiha mukhataa,Naari waakhanle wi wohuupuwelela weerano yeela, ophute* eyano aa.
33 Hiihaa ntoko otannyerya* eleiti* onamukumihaaya manteekaNave ocikicha ephula onakumihaaya nikhami,Hiihaa tho otetheeryela esara otannya waakhulana.
Inoota
^ Mu Ehepiri, “oviinhe.”
^ Naari: “aaheereryiwa vamooroni.”
^ Naari: “kihiphele.”
^ Mu Ehepiri, “wa mari aya.”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “ohinachuniwa.”
^ Naari: “onatheliwa ni iya a pwiyawe.”
^ Naari: “iri sa miruku moopwahaxa.”
^ Mu Ehepiri, “Ineneeli tahi muloko wakuru.”
^ Ari axinama analikana ni anamarokolo yaawo anakhala mmiyalani.
^ Mu Ehepiri, “Amachika tahi muloko woowerya.”
^ Naari: “mmakhuuru.”
^ Naari: “ophupwe.”
^ Naari: “omana.”
^ Naari: “mukaka.”
