Masiposipo 31:1-31
31 Masu a mwene Lemuwele. Masu oochuneya yaawo amama awe yaamuleenlaaya wi emuhusihe:
2 Tiheeni kinaphwanelaaka wooleela, mwanaka?
Eheeni, mwaana eerukulu aka?
Eheeni, mwaana a malakano aka?
3 Ohaavahe athiyana ikuru saa,Naari ochara iphiro seiho inaatoloxa mamwene.
4 Lemuwele, tahi woophwanelela wa mamwene,Tahi woophwanelela wa mamwene owurya eviinyu,Naari alipa oolamula oloca eriki: “Eri woowi yoowurya aka?”
5 Wi ehiwurye nave ecuwale malamulo yaawo etikitheryiwe,Nave wi ekhooce ophwanelela wa alipa oohaawa.
6 Waavahe yoowurya yoohapaliha yaale anakhwaNave eviinyu yaale murima owiinne.
7 Ewurye nave ecuwale ohaawa waya.
Ehuupuwele tho makacamiho aya.
8 Oloceke mu nipuro na yaale ahinawerya oloca;Waakiheke ophwanelela wa oothene yaale anakhwa.
9 Oloceke mu nipuro naya nave othoriheke mwawookololowa;Waakiheke ophwanelela wa* oothoiwa ni oohaawa.
א [Alefi]
10 Taani onawerya omphwanya muthiyana oowerya* wi amuthele?
Esisapo awe etokweenexa opwaha maluku ookhweleya.*
ב [Peti]
11 Aiyawe annamuroromela ni murima aya woothene,Nave wa yaawo hiyaavo echu yasisapo enaathowa.
ג [Kimeli]
12 Owo onnaachuwela ni yaphaama, ohiya ni yoonanara,Mahiku oothene a okumi awe.
ד [Taleti]
13 Owo onnaphwanya yoowara yaphaamaxa yooxeerya ni eliinyu,Nave onnahakalala olapa ni matata awe.
ה [He]
14 Owo ori ntoko apophoro a mulipa a maroca;Owo onnaruuha yoolya awe ociiwene.
ו [Vawu]
15 Owo tho onnavinya oyaaka nuuxa, wi aavahe yoolya a vaate vawe,Nave wi aakawele miteko anamuteko awe aasithiyana.
ז [Sayine]
16 Owo onnalakelela okhalano emaca nave onnathuma;Onnaala miri sa uuva ni sookhumelela sa muteko awe.*
ח [Heti]
17 Owo onniirehererya ntakhara muteko wakuru,*Nave onnalipiha miwono sawe.
ט [Teti]
18 Owo onnoona wi maroca awe annakumiherya mphurelo;Ohiyu epanthi awe henaxipha.
י [Yoti]
19 Ni matata awe owo onnakuxa ekopo ovitikeleliwevo oxalo,Nave ni matata awe onnakuxa ekopo yoovitikelelano oxalo.
כ [Kafe]
20 Owo onnookola ntata nawe wa oothoiwa,Nave onnahula matata awe wa oohaawa.
ל [Lameti]
21 Owo hanuukhuwa ni achu a veechokoni vawe vaavaa onariiryaaya,*Woona wi oothene anawara soowara sooviha.*
מ [Meme]
22 Owo onnapaka manta awe.
Soowara sawe ti sa eliinyu ni sa ekuwo yaphaama yooxeerya.
נ [Nuni]
23 Aiyawe toosuweliwa phaama mmilako mitokweene sa epooma,Mwemmo awo anakiraathaayamo vamoha ni asitokweene a elapo.
ס [Sameki]
24 Owo onnapaka soowara sa eliinyu nave onnatumiha,Nave onnaatumiherya isintu alipa a maroca.
ע [Ayini]
25 Owo onniiwariha ikuru ni ncicimiho,Nave hanuukhuwaru ni omwaahiyu.*
פ [Pe]
26 Owo onnahula eyano awe mwa miruku;Nlamulo na oreera murima* nri vanlumini vawe.
צ [Tsate]
27 Owo onnavareryela miteko sa vaate vawe,Nave hanalya yoolya yooporora.
ק [Kofi]
28 Anaawe annavinya nave emuthamalela;*Aiyawe tho annavinya nave emuthamalela.
ר [Rexi]
29 Aakhalavo athiyana ancipale oowerya,*Nto weyo onnaapwaha oothene yaawo.
ש [Xini]
30 Akhweya ophwaneliwa onanwerya okhala woowoka, nave akhweya oreera onanwerya okhala wa elukuluku tonto,*Nto muthiyana onamoova Yehova onarwa acicimihiwa.
ת [Tawu]
31 Owo achuweliwe wa nthowa na yeeyo onapakeiye,*Nave acicimihiwe mmilako mitokweene sa epooma wa nthowa na miteko sawe.
Inoota
^ Naari: “Waakiheke miyaha sa.”
^ Naari: “aphaama.”
^ Moone Masu Atharihiwe.
^ Mu Ehepiri, “ni yawiima ya matata awe.”
^ Mu Ehepiri, “Owo onnamakelela ikuru muyuununi mwawe.”
^ Mu Ehepiri, “soowara soothitaanyeryiwa.”
^ Naari: “vaavaa eneeve enamoraaya.”
^ Naari: “Nave onnatheya sa omeelo.”
^ Naari: “Ohusiha moosivela; Nlamulo na osivela woororomeleya.”
^ Naari: “emweera oohakalala.”
^ Naari: “aphaama.”
^ Naari: “wasiiyo.”
^ Mu Ehepiri, “Mumvahe yawiima ya matata awe.”
