Masiposipo 4:1-27
4 Anamwane aka, muwiriyaneke olaka wa apapa anyu;Nwiriyaneke phaama wi mukhaleno masuwelelo,
2 Tiwi, kinamoovahaani ovyakiha waphaama;Muhihiye mahusiheryo aka.*
3 Miyaano kaari mwaana aphaama wa atiithi aka,Ni mwaana yoowo amama aka yaamusivelaaya vancipale.
4 Apapa yaanakihusiha eriki: “Opharele masu aka mmurimani mwaa.
Okhapeleleke malamulo aka wi otitelele okhala.
5 Ophwanye miruku, ophwanye osuwelaxa.
Ohicuwaleru naari mano ohiya yeeyo kinooleelaaka.
6 Ohihiyeru miruku, nave iho inamookhapelela.
Osiveleke seiho, nave iho sinanwaakiha.
7 Miruku echu yoochuneyaxa,* mwawiihiiha, ophwanye miruku;Nave opwaha soothene oneeraawe ophwanye, ophwanye osuwelaxa.
8 Ovaheke esisapo etokweene, nave seiho inanwinnuwiha.
Wakhala wi wookhupaarela, iho inamoocicimiha.
9 Iho inamooreeriha ni ekuwo yooreera yoomakano mmuruni;Nave inamoowariha korowa ooreera.”
10 Mwanaka, owiriyane nave weemererye masu aka,Nave iyaakha sa okumi aa sinamwaaca.
11 Miyo kinamoohusiha ephiro ya miruku;Kinanweeciha mu iphiro sawookololowa.
12 Waaweecaka, manaani aa herwa epheruwa;Nave waachimakaka, horwa okwaculiwa.
13 Waakelele olaka, ohihiyeru.
Okhapelele yoowo, woona wi okumi aa.
14 Ohichareke meecelo a achu oonanara murima,Nave oheeceke mu ephiro ya achu ootakhala.
15 Osepeke, ohichareke yeeyo;Orapele yeeyo nave opwaheke.
16 Tiwi, awo hanawerya okona eheenre yoonanara.
Awo annayeleela ikhove yaahimuuwiha muchu.
17 Otakhala yoolya aya,Nave nlala eviinyu aya.*
18 Nto ephiro ya achu awookololowa eri ntoko ekamaama yawaarya ya wooxixeloYeeyo enaarya ni waarya ophiyerya oxilevo kwee.
19 Ephiro ya achu oonanara murima eri ntoko epiiphi;Awo hanasuwela yeeyo enaakwacula.
20 Mwanaka, owiriyane phaama masu aka;Wiiwe phaama sooloca saka.
21 Ohicuwale yaawo;Okhapelele phaama mmurimani mwaa,
22 Woona wi ari okumi wa yaawo anaphwanyaNi okumi wa mwiili aya woothene.
23 Opwaha soothene, okhapelele murimaa,Woona wi mwa yoowo tonaphacuwamo anaacuucu a okumi.
24 Ohiloceke sawootha,Nave orihele ocai wa weyo masu oowoka.
25 Miitho aa anaphwanela owehaka pahiru ohoolo,Aa, otikitherye oweha waa pahiru ohoolo.
26 Weereryanye* ephiro ntakhara inaani saa,Nave iphiro saa soothene inamukhala saphaama.
27 Ohihuweleru oyaaka moono woolopwana naari woothiyana.
Orapelihe inaani saa wa yeeyo eri yoonanara.
Inoota
^ Naari: “nlamulo naka.”
^ Naari: “echu yoopacerya.”
^ Naari: “Awo annalya ni owurya moorweela wa otakhala ni nlala.”
^ Naari akhweya: “Ovareryeke phaama.”
