Masiposipo 6:1-35
6 Mwanaka, wakhala wi woopaka evaale ni mwaacamani aa,Wakhala wi moovahana ntata, ororomelihaka echu ni muchu mukina,
2 Waakhanle wi woomorela mmuraakhoni wanthowa na yoororomelihaa,Waakhanle wi woophariwa ni masu a mwaano mwaa,
3 Mwanaka, weere ela wi wiisoopole,Woona wi woomorela mmatani mwa mwaacamani aa:
Hawe, wiiyevihe vamiithoni vawe nave mwawaakuveya wamveke ni murima woothene mwaacamani aa wi okhale ootaphuwa.
4 Ohiwale miitho aa wi orupelevo,Naari mano makwikhwi aa owaphila.
5 Wiisoopole ntoko naahe mmatani mwa mulipa oosaya,Ntoko palame mmatani mwa mulipa oosaya.
6 Porora we, hawe wahuserye ni ineneele;Wavarerye iphiro saya nave okhale a miruku.
7 Naamwi sihirino muhooleli, mutokweene, naari mulamuleli,
8 Iho sinnarehererya yoolya aya mu elimwi,Nave sinniithukumanyerya yoolya mu elukuluku ya ohepha.
9 Porora we, ophiyerya liini orikimukona?
Oni ovinye liini mu ikhoveni saa?
10 Ikhove tonto, otuthela tonto,Okhuna miwono vakhaani ntakhara wiichuuwa,
11 Vaavanto ohaawa waa onamphiya ntoko mpava,Nave othoiwa waa ntoko muchu awoopiha.
12 Muchu oonanara murima ni ootakhala onneeca alocaka sawootha;*
13 Onnanyupuliha niitho, onnapaka ineneeryo ni nnaani, nave onnaloca ni ikatha.
14 Ni murima wootakhala,Ilukuluku soothene onnuupuwela opaka soonanara ni omisa ohiiwanana.
15 Wanthowa nenla, epahu awe enamphiya mootutuxa;Moohilekela onamunyaanyiwa nave hokhalavo murece.
16 Sookhalavo ichu thanu nammoha Yehova oniiceiye,Aa, ichu thanu napiili owo* onathanyeiye:
17 Miitho awiirumiha, nlumi nawootha, matata anayeeha nikhami noohikhalano nthowa,
18 Murima onuupuwela weera sootakhala, inaani inachimakela weera soonanara,
19 Namoona awootha yoowo pahiru onaloca sawootha,Ni oothene yoole onaala ohiiwanana variyari va anna.
20 Mwanaka, ochariheke nlamulo na apapaa,Nave ohihiye ikano sa* amamaa.
21 Ilukuluku soothene omakelele seiho va murimani vaa;Oware seiho musikoni mwaa.
22 Vaavaa oneeraawe weeceke, iho inamoohoolelaka;Waakonaka, iho inamoolipeleleka;Nave waavinyaka, iho inamulocaka ni weyaano.*
23 Tiwi, nlamulo epanthi,Nave ikano* omwaleela,Nave osameliwa wa olaka eri ephiro yooyano wookumini.
24 Iho inanwaakiha wa muthiyana aweera soonanara,Wa nlumi noolekecha na muthiyana aweeca pure.*
25 Ohimuchune mmurimani mwaa wa nthowa na oreera waweNaari ohiwokeye wa nthowa na miitho awe awaalula murima,
26 Namararuwe, onnamweeriha mulopwana okhala ntoko nipatuso na epaau,Nto muthiyana a mulopwana mukina onasaya okumi wookhweleya.
27 Apwanne muchu onnawerya wuukela makhala a mooro vachirima nave ikuwo sawe ihivya?
28 Naari mano weeca vamakhalani a mooro nave inaani sawe ihivya?
29 Ti yeela eneereya ni muchu yoowo onakona ni mwaara a muchu mukina;Yoole oni amutannye hooceela olakiwa.
30 Achu hanamuthanya mpavaWakhala wi oniiya yoolya wi iipheno etala.
31 Nto aphariwa, onamukookiha ikwaha thanu napiili;Owo onarwa aveleela ichu soothene sookhweleya sa vaate vawe.
32 Yoole onapaka mararuwo ni muthiyana muru awe honalapa;*Yoole oneerano oniipahula mukhateiye.*
33 Owo onahaala ohalano pahiru makhwaca ni onyemuwa,Nave onyemuwa wawe horwa oxipha.
34 Tiwi ehace ennatannya esara ya iyawe;Owo hooniherya ikharari vaavaa oneereiye inle ikuhu.
35 Owo harwa eemererya oliviwa;*Owo hamaala moohipwacha waaca wa yamahala oneeraawe omvahe.
Inoota
^ Naari: “masu ootakhala.”
^ Naari: “okumi awe.”
^ Naari: “ nlamulo na.”
^ Naari: “inamoohusihaka.”
^ Naari: “nlamulo.”
^ Mu Ehepiri, “a elapo ekina.” Moone Masiposipo 2:16.
^ Mu Ekriki, “haano murima.”
^ Naari: “onapahula okumi awe.”
^ Naari: “woopola.”
