Masiposipo 7:1-27
7 Mwanaka, wiiweleleke masu aka,Nave okhapelele mmurimani malamulo aka.
2 Wiiweleleke malamulo aka nave onamukhala.
Okhapelele ikano* saka ntoko erukuruku ya niitho naa.
3 Omakelele yaawo mwiikathani mwaa;Orepe yaawo va ethaapwa ya murimaa.
4 Oloce wa miruku: “Weyo wa murokora aka,”
Nave wiichane wiiwexexa ntoko “mmusi aka,”
5 Wi iwaakihe wa muthiyana oocheka,*Wa muthiyana aweeca pure* vamoha ni masu awe oolekecha.
6 Va xanelani ya empa aka,Kaaweha vathi orweela va xanelani,
7 Nave kaavareryaka achu oohisuwela,Variyari va amiravo, kaamoona mmiravo mmoha muru awe wahaalapa.*
8 Owo aavira waacamela mphiro onakeriha wa muthiyana yoole,Nave aahapuwa anaya vaate va muthiyana yoole
9 Oxekuwa, nsuwa nneenle,Ohalaka vakhaani ophiya ohiyu, ni epiiphi.
10 Voocharela kaamoona muthiyana amuthikireryaka mmiravo,Awanre ntoko* capaheya, ni ovyaka wa murima.
11 Owo muthiyana eelavilavi ni ooroxa.
Nave hanakiraathiru* vaate.
12 Vakina vaya ori muramphani, naari mmapuro awaaciwamo;Owo onniipitha waacamele mmakhulukano.
13 Owo onnamphara mmiravo nave onnamvaha epeexu;Ni oweha woolekecha, owo onnaloca wa mmiravo:
14 “Miyaano kaaphwanela ovaha mukucho wa murecele;Olelo kohaakhwaniherya malakano aka.
15 Ti nthowa nene koothikirenryaaka,Wi kiwaavye, nave kohoophwanya!
16 Kohaatelelavo ekuwo yasisapoxa vakaamani vaka,Ya mathepa* oohiyanahiyana yeeyo enarwa o Yikuputu.
17 Koomiserya vakaamani vaka makhurwa awunkhela a miira, aloyesi ni kanela.
18 Orwe, nihapaliwe ni osivela ophiyerya wooxiixelo;Hanko napuhe vamoha osiva wa osivela,
19 Tiwi, aiyaka haawowo owaani;Awo aapaka mukwaha woorekama.
20 Awo aakuxa murupa wa ikhorowa,Nave hekookawo mweeri ohiphiyale veeri vaya.”
21 Owo onnanwoka mmiravo ni masu mancipale.
Onnamulekecha ni masu ookurumuxa murima.
22 Moohilekela mmiravo onnamuchara, ntoko emope enaya wiiphiwa,Ntoko mulolo onaya olakiwa va mwiri,*
23 Ophiyerya nivaka nimuthoronle hapa awe;Hiihaa ntoko epalame enavavela va muraakhoni, owo hanasuwela wi eyo enahaala omaliha okumi awe.
24 Vano, anaaka, mukiwiriyane;Nwiriyane phaama yeeyo kinalocaaka.
25 Ohihiye wi murimaa ohuwele, wookerihaka mu iphiro sa muthiyana yoole.
Ohichare iphiro sawe,
26 Tiwi, owo ohaatoloxa ancipale,Nave yaawo owo owiiphaleiye aatepa waaca.
27 Empa awe enakeriha o Mahiye;*Ennamukuruxela muchu mmapuro yaawo arimo alipa ookhwa.
Inoota
^ Naari: “nlamulo.”
^ Mu Ehepiri, “a nloko nikina.” Moone Masiposipo 2:16.
^ Mu Ehepiri, “a elapo ekina.” Moone Masiposipo 2:16.
^ Mu Ehepiri, “ahaarino murima.”
^ Naari: “Awanre yoowara ya.”
^ Mu Ehepiri, “inaani sawe hasinakhalaru.”
^ Naari: “malepa.”
^ Naari: “amakiwe ni ikorenti.”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
