Mateyu 10:1-42
10 Yesu aahaawopa oohuserya awe khumi napiili nave aahaavaha owerya wa wiikara minepa soothanyeya, openuxa ireca soothene vamoha ni masooso a mukhalelo woothene.
2 Masina a arummwa yaala khumi napiili taala: Oopacerya, Simoni iichaniwa tho Petru ni munnawe awiichaniwa Antreya; Tiyaku mwaana a Sepeteyu ni munnawe awiichaniwa Yohani;
3 Filipi ni Partolomewu; Tomasi ni Mateyu yoowo aari mulipa ooliviha muxokho; Tiyaku mwaana a Alfewu; ni Tateyu;
4 Simoni yoowo aari Mukaanani;* ni Yutasi Iskariyoti, yoowo ohoolo waya aamutuminhe Yesu.
5 Yesu aahaarumiha yaala khumi napiili, aaleelaka ariki: “Muhivolowe mu ilapo sa amalapo naari mu ipooma sa o Samariya;
6 nyenya mwaavyeke ipucepuche soorimeela sa nloko na Aisarayeli.
7 Munaviraanyumo mulaleeryeke muriki: ‘Omwene wa wirimu wohaacamela.’
8 Mwaapenuxeke awiiceliwa, mwaaviiheke alipa ookhwa, mwaapenuxeke alipa a mareca, mwiikareke masololo. Mwaakhenle mahaleene, mvaheke mahaleene.
9 Mmukwahani muhikuxeke eparata, ooru naari muchove mmurupani mwanyu,
10 muhikuxeke tho murupa wa yoolya, naari soowara piili,* naari asantaalya, naari cooco, woona wi namalapa onnaphwanela waakhela yoolya awe.
11 “Mu ipooma naari mmicecheni muneeraanyu mvolowemo, nwaavyeke yaale anachuna woowiriyanaani, nave mukhale ni yaawo ophiyerya opwaha wanyu.
12 Mwaphiya vaate, mwaaloceleke akaneene.
13 Wakhala wi annachuna woowiriyanaani, murecele anyu okhale ni yaawo; nto wakhala wi hanachuna woowiriyanaani, murecele anyu wookookeleeni.
14 Weiwo achu eneeraaya ehiwaakheleeni naari woowiriyanaani, mwaavinyaka vaate naari epooma eyo, mutathe nchupi mu inaani sanyu.
15 Chiri kinnooleelaani wi, mu Nihiku na Othoriha, olakiwa wa epooma eyo onahaala okhala otokweene opwaha wa o Sotoma ni Komora.
16 “Miyaano kinnoorumihaani ntoko ipucepuche veeri va miici; mwawiihiiha, mukhale oovyaka ntoko inowa ni oomaala ntoko ikakaiya.
17 Mukhaleno ephoole ni achu yaawo, woona wi anamooveleelaani mmapuro oothoriha ni woowaxulaani mmapuro aya a malapelo.*
18 Nave nyuwo munarwa mveleeliwa wa alamuleli ni wa mamwene wa nthowa naka, wi mvahe onamoona wa yaawo ni wa maloko oothene.
19 Nyenya, mwaveleeliwa wa yaawo, muhikhale awuukhuwa vooloca sa mukhalelo wa oloca ni echu ya oloca, woona wi yeeyo munahaalaanyu oloca munarwa mvahiwa elukuluku ene yeeyo.
20 Ntakhara wi onaloca tahi nyuwo, nto munepa wa Atiithi anyu tonaloca mwa nyuwo.
21 Ohiya yeeyoru, munna onarwa amveleela munnawe wi iiphiwe, tiithi onarwa amveleela mwanawe, nave anamwane enarwa yaarukunuwela makholo aya wi ewiiphihe.
22 Nave nyuwo munarwa mwiiciwa ni achu oothene vanthowa na nsina naka, nyenya yoole oni avilele* ophiyerya omakuchuwelo, toni avuluxiwe.
23 Yawiikaraani epooma emoha, muchawele epooma ekina. Chiri kinnooleelaani wi, himweeceeca ipooma soothene sa Aisarayeli ahiphin’ye Mwaana a muchu.
24 “Oohuserya hanampwaha muhusiha awe, naari kapuro hanampwaha pwiya awe.
25 Oohuserya onaphwanela ohakalala akhala oolikana ni muhusiha awe naari kapuro okhala ntoko pwiya awe. Waakhanle wi mwaneene a vaate anamweera Pelsepu,* hanka vooloca sa a vaate vawe?
26 Mwawiihiiha, muhiwoove achu yaawo; vawi hiyaavo echu eri yoovitheya eni ehooniwe, nave hiyaavo yawiiphiini eni ehisuweliwe.
27 Seiho kinooleelaakaani wiiphiini, muloceke vanlakani, ni soothene kinawiitiheryaakaani, mulaleeryeke vasulu va empa.
28 Nave muhiwooveke achu yaawo aniipha mwiili nto ehinawerya wiipha okumi;* nyenya, mmooveke yoole onawerya wiipha mwiili ni okumi o Kehena.*
29 Hanatumihiwa asipalame apiili ni ekhorowa ya esisapo tonto?* Naamwi hiihaa, hiyaavo emoharu mano enamorela vathi Atiithi anyu ehisuwenle.
30 Ophiyerya tho wi miihi oothene a mmuruni mwanyu ahaalakhanyiwa.
31 Mwa yeeyo, muhoove; nyuwo muri ookhweleyaxa waapwaha asipalame ancipale.
32 “Oothene yoole oni akeemererye vamiithoni va achu, miyo tho kinahaala omweemererya vamiithoni va Atiithi aka yaawo ari wirimu.
33 Nto yoole oni akikhooce vamiithoni va achu, miyo tho kinahaala omukhooca vamiithoni va Atiithi aka yaawo ari wirimu.
34 Muhuupuwele wi orwa waka, kaaruuha murecele veelaponi yavathi; nkiruuhale murecele, nto nlema.
35 Kirwenle otannya okawanyeya veemusini: Mwaana amwaamulopwana ni apapa awe, mwaana amwaamuthiyana ni amama awe, nave pwiyamwana ni asookora awe.
36 Mweeparipari, amwiicani a muchu anaya okhala a veemusini vawe.
37 Yoole onaasivela vancipale apapa awe naari amama awe okipwaha miyo, hari oophwanelela wa miyo; nave yoole onamusivela mwanawe amwaamulopwana naari amwaamuthiyana okipwaha miyo, hari oophwanelela wa miyo.
38 Nave oothene yoole ohineemererya oteexa mwiri awe wa ohooxiwavo* ni okichara, hari oophwanelela wa miyo.
39 Yoole onakhapelela okumi awe onamuyeleela, nave yoole onayeleela okumi awe wa nthowa naka onamphwanya.
40 “Yoole onawaakhelaani nyuwo, onakaakhela tho miyo, nave yoole onakaakhela miyo, onamwaakhela tho Yoole okirumme.
41 Yoole onamwaakhela mulipa a miririmu amweerelaka okhala mulipa a miririmu, onamwaakhela nchuwelo na mulipa a miririmu; nave yoole onamwaakhela muchu awookololowa amweerelaka okhala awookololowa, onamwaakhela nchuwelo na awookololowa.
42 Nave yoowo onamvaha maahi, naari ari koopho mmoharu a maahi ooriirya, mmoha a akhaani yaala, amweerelaka okhala oohuserya aka, chiri kinnooleelaani wi yoowo, hooceela waakhela nchuwelo nawe.”
Inoota
^ Woonaru nsu nla nnataphulela “museloti,” ohiya wi aari o Kanani.
^ Naari: “soowara sikina.”
^ Mu Ekriki, “mmasinakooka mwaya.”
^ Naari: “yoole onavilela.”
^ Nsina nla oniichaneliwa Satana, mutokweene, naari mulamuleli, a masololo.
^ Ela tiwi, ewehereryo ya okumi.
^ Moone Masu Atharihiwe.
^ Mu Ekriki, “asariyu mmoha.”
^ Moone Masu Atharihiwe.
