Mateyu 22:1-46
22 Yesu aahuuluula tho oloca ni yaawo moorweela wa maphwanaphwaniho, ariki:
2 “Omwene wa wirimu onalikana ni mwene yoowo aampakenle mwanawe efesta ya othela.
3 Owo aahaarumiha akapuro awe owiichana achu yaawopeliwe efesta ya othela, nto awo hiyaakhwenle orwa.
4 Aahaarumiha tho akapuro awe akina ni masu ala: ‘Mwaaleele oowompwa: “Koorehererya yoolya, imope saka ni inama sooneneva sohiiphiwa, nave ichu soothene soomalela. Rwaani va efesta ya othela.”’
5 Nyenya oowompwa ale hiyaapwanche, awo yaamwalamwala, akina eyaaka omaca waya, akina eyaaka omweeca nakoso aya;
6 nto akina yaahaaphara akapuro ale, yaahooxa nave ewiipha.
7 “Mwene aatepa onanariwa, aarumiha anakhoco awe, nave awo yaahaatoloxa ni yeeyela epooma ya oothene yaale yaawiiphale akapuro awe.
8 Voocharela, mwene aaloca wa akapuro awe: ‘Yoolya yoomalela, nto achu oowompwa haphwanelenle efesta ya othela.
9 Mwawiihiiha, haweni mu iphiro sinakhuma opooma, nave mwaawope achu oothene muneeraanyu mwaaphwanye wi erwe va efesta ya othela.’
10 Akapuro ale yaacimula, yaawopa achu oothene yaawo yaaphwanyaaya mphironi, oonanara ni ooreera murima; nave nipuro naapakiwavo efesta ya othela naasareya ni achu oowompwa.*
11 “Vaavaa mwene aavolonweiye wi aavarerye achu oowompwa, aamoona mulopwana yoowo ahaawanre yoowara ya voothelani.
12 Mwawiihiiha, mwene aamukoha: ‘Nthamwene, ovolonwemo hai ohiwanre yoowara ya voothelani?’ Nto owo haarino masu.
13 Mwene aahaaruma akapuro awe ii: ‘Mummake matata ni meco nave mmurihele vaate weepiphini. Weiwo toni okhalewo winla ni okhuuriha miino awe.’
14 “Tiwi oowompwa ari ancipale, nave oothanliwa ari avakhaani.”
15 Voocharela Afarisi yaapwahavo, ethukumana nave enavaanela mukhalelo wa omphara Yesu mmasu awe.
16 Hiihaa, Afarisi yaahaaruma oohuserya aya vamoha nnikhuuru na Heroti wa Yesu, wi eloce: “Muhusiha, noosuwela wi muri eeparipari nave munnahusiha mweeparipari ephiro ya Muluku, hamunaavya waahakalaliha achu woona wi hamunavarerya ethoi aya.
17 Vano munileele, munoona hai? Apwanne ti yaweemereryeya* oliva muxokho wa Kaisara naari hooye?”
18 Nto Yesu asuwelaka muupuwelo aya woonanara, aahi: “Anawiisootherye nyu, ntakhara heeni munakeehaanyu?
19 Mukoonihe ekhorowa ene ya muxokho.” Awo yaamunnya etenaariyu emoha.
20 Owo aahaakoha: “Eruku ela ni masu ari vaava tawani?”
21 Awo yaahaakhula: “Ta Kaisara.” Nave Yesu aahi wa yaawo: “Mveleele wa Kaisara ichu sa Kaisara, nave wa Muluku ichu sa Muluku.”
22 Yiiwalaaya yeela, yaatikhina, emuhiya yoowo nave erowa.
23 Mu nihiku nenle, Asatuki yaawo ahineemererya ovinya mookhwani, yaamwaacamela Yesu emukoha:
24 “Muhusiha, Mose aaloca: ‘Wakhala wi mulopwana ookhwa ahirino anamwane, munnawe onaphwanela omuthela naamukhwele owo wi amuyarele munnawe anamwane.’
25 Vano, yaakhalavo mwa hiyo alopwana athanu napiili yaawo yaari onna aya. Oopacerya aathenleiye, aakhwa ahirino anamwane, nave munna awe aahalano muthiyana yoole.
26 Yaaheereya emohamoha wa anaawiili, aneeraru ni oothene athanu napiili.
27 Wookuchulani waya, muthiyana ole aakhwa.
28 Vano, mu ovinya mookhwani, muthiyana yoole oni akhale awani wa yaala athanu napiili? Woona wi oothene yaamuthela.”
29 Yesu aaloca wa yaawo ariki: “Nyuwaano moohuwela, woona wi hamusuwenle Soorempwa naari mano ikuru sa Muluku;
30 tiwi, mu ovinya mookhwani, alopwana hanathela, naari mano athiyana hanatheliwa, nyenya awo anakhala ntoko ankeelo a wirimu.
31 Vooloca sa ovinya mookhwani, apwanne hamutonko waalakhanya yeeyo Muluku aalonceiye, ariki:
32 ‘Miyaano ka Muluku a Aparahamu, Muluku a Isaki, ni Muluku a Yakopo’? Owo Muluku, ohiya a achu ookhwa, nto a akumi.”
33 Yiiwalaaya yeela, muloko* wa achu waatikhina ni ohusiha wawe.
34 Afarisi yiiwalaaya wi Yesu aahaaviliha Asatuki, awo yaathukumana ekhala nikhuuru nimoha.
35 Nave mmoha a yaawo, muhusiha a Malamulo, aamweeha yoowo nnikoho nla:
36 “Muhusiha, nlamulo ntokweenexa na Mmalamulo tinivi?”
37 Yesu aahi wa yoowo: “‘Omusiveleke Yehova Muluku aa ni murima aa woothene, ni okumi* aa woothene ni muupuwelo aa woothene.’
38 Nla nlamulo ntokweenexa ni noopacerya.
39 Nanaawiili nnalikana ni nenla ti nla: ‘Omusiveleke mwaacamani aa ntoko oniisivelaawe weyo mwaneene.’
40 Masu oothene a Malamulo ni a Alipa a miririmu, anathipeleya mu malamulo yaala meeli.”
41 Afarisi ethukumanne, Yesu aahaakoha:
42 “Munoona hai vooloca sa Kristu? Owo mwaana awani?” Awo yaamwaakhula: “Mwaana a Tavite.”
43 Owo aahaakoha ariki: “Vano onaweryeya hai wi, moorweela wa munepa waweela, Tavite anamweera Kristu wi Pwiya, ariki:
44 ‘Yehova aaloca wa Pwiya aka: “Okiraathi o ntata naka noolopwana, ophiyerya kaakunhe amwiicani aa vathi va inaani saa”’?
45 Wakhala wi Tavite onamweera Pwiya, onaweryeya hai okhala tho mwanawe?”
46 Haavo aawenrye omwaakhula, nave ovinyerya nihiku nenle oya ohoolo, haavo eerenrye ompakela makoho makina.
Inoota
^ Naari: “yaahaamenle meesa.”
^ Naari: “yoophwanelela.”
^ Naari: “mucici.”
^ Moone Masu Atharihiwe.
