Mateyu 28:1-20
28 Nivinre nihiku na Sapata, oyaaka nooxa wa nihiku noopacerya na esumana,* Mariya Matalena vamoha ni Mariya mukina, yaaya woona nihiye.
2 Elukuluku yeele, iiso avinre mwaacikinye mutokotoko, woona wi munkeelo a Yehova aakhuruwa wirimu aya o nihiyeni, aapirikixa nluku na nihiye nave akiraathela.
3 Ethoi awe yaari ntoko overunya, nave soowara sawe saari saweela ntoko mucharapo.
4 Nthowa na woova, alipeleli yaale yaanathukumela nave ekhala ntoko ookhweene.
5 Nyenya munkeelo aaloca wa athiyana yaale: “Muhoove, koosuwela wi munamwaavya Yesu yoowo aathomeiwe va mwiri.
6 Haamo muumu, owo ooviihiwa mookhwani hiiha ntoko aalonceiye. Murwe, moone nipuro aakuhiweiyevo.
7 Vano, haweni mwawaakuveya mwaaleele oohuserya awe wi owo ooviihiwa mookhwani nave oohoola, onaya o Kalileya. Munammoona weiwo. Ti yeela kinooleelaakaani.”
8 Mwawiihiiha, yaavinya mwawaakuveya o nihiyeni, yoovaka ni esaren’ye ohakalala, echimaka wi yaaleele oohuserya awe.
9 Nave Yesu aahaathikirerya aloca ni yaawo ariki: “Mooni!” Awo yaamwaacamela, emphara inaani sawe nave emucicimiha* yoowo.
10 Voocharela Yesu aahi wa yaawo: “Muhikhale awoova! Haweni, mwaaleele asinnaka wi eye o Kalileya, nave weiwo anamukoona.”
11 Athiyana ale epwahaka, alipa oolipelela akina yaaya opooma wi yaaleele ahooleli a alipa a mukucho, ichu soothene seeren’ye.
12 Ahooleli a alipa a mukucho yaathukumannaaya ni asitokweene aachu, yaalakelela waavaha alipeleli ikhorowa sawaaca sa eparata
13 nave yaaleela eriki: “Muloceke wi: ‘Nrupaka ohiyu, yaarwa oohuserya awe, emwiiya.’
14 Pilatu iiwa sa yeela, nnamuyawo namuleeliherye,* nyuwo hamunaphwanela wuukhuwa.”
15 Mwawiihiiha, awo yaakuxa ikhorowa sa eparata, yeera hiihaa ntoko yaalamuleliwaaya, nave michaka seiha sinnavuwihiwa mwa Ayuta ophiyerya olelo.
16 Nto oohuserya khumi nammoha yaaya o Kalileya, o mwaako yoowo Yesu aathonyenreiyewo.
17 Vaavaa awo yaamonnaaya, yaamucicimiha,* nyenya akina yaanakhwa minikwa.
18 Yesu aawaacamela, alocano: “Koovahiwa owerya woothene wirimu ni veelaponi yavathi.
19 Mwawiihiiha, haweni wa achu a maloko oothene, mwaapakeke oohuserya, mwaapatisaka yaawo mu nsina na Atiithi, na Mwaana ni na munepa waweela,
20 mwaahusihaka yaawo wiiwelela ichu soothene koolamulenlaakaani. Nave, suwelani wi kiri ni nyuwo mahiku oothene ophiyerya omakuchuwelo wa mukhalelo yoola wa ichu.”*
Inoota
^ Nihiku nenlo nniichanaahu Namurunku. Wa Ayuta, nla naari nihiku noopacerya na esumana.
^ Naari: “emukokhorela.”
^ Mu Ekriki, “namulekeche.”
^ Naari: “yaamukokhorela.”
^ Naari: “elapo yeela yoonanara.” Moone Masu Atharihiwe.
