Ncipo na Solomoni 1:1-17
-
Ncipo na macipo (1)
-
Namwali (2-7)
-
Anamwane aasithiyana o Yerusalemu (8)
-
Mwene (9-11)
-
“Nnamoopakela ichu sooreera sa ooru” (11)
-
-
Namwali (12-14)
-
‘Oosiveliwa aka ori ntoko murupa mukhaani wa miira’ (13)
-
-
Mukukhula (15)
-
“Wootepa oreera, oosiveliwa aka”
-
-
Namwali (16, 17)
-
“Mootepa oreera, oosiveliwa aka” (16)
-
1 Ncipo na macipo* na Solomoni:
2 “Okivahe epeexu ni iyano saa,Woona wi okichuna waa ti waphaama opwahana eviinyu.
3 Makhurwaa ta wunkhela phaama.
Nsina naa nri toko wunkhela wa makhurwa ayeehen’ye.
Ti nthowa nene asimwali anoosivelaaya.
4 Okikuxe* nave nichawe;
Woona wi amwene aakikeriha o nipuroni naya!
Nihakalale nave nchape vamoha.
Nloce sa osivela waa, woona wi owo ti waphaama opwaha eviinyu.
Ti nthowa nene awo* anoosivelaaya.
5 Nyuwo anamwane aasithiyana o Yerusalemu, miyo ka ooriipa, nto oophwaneliwa,Ntoko mixakala sa o Ketari, ntoko ikuwo sa muxakala wa Solomoni.
6 Muhikivareryeke nthowa na oriipa waka,Woona wi nsuwa ti nikiripinhe.
Anamwane aamamaaka ti yaakiximwenle;Ekiruma wi kalipeleleke imaca sa uuva,Nto emaca aka ene ya uuva nkaalipelela.
7 Okileele, weyaano kinoosivelaaka vancipale,*Onalyiha woowi muhuwo aa?Elukuluku ya mitiya oniichuuwiha woowi?
Ntakhara heeni kaahaalaaka okhala ntoko muthiyana iikhuneenle ni eveewu*Variyari va muhuwo wa asinthamwene aa?”
8 “Waahisuwenle, weyo ooreeraxa wapwaha athiyana akina,Ochareke inaani sa muhuwoNave okuxe ipuri saa wakukhuleke waacamela omixakalani wa akukhula.”
9 “Oosiveliwa aka, kinoolikanyiha ni kavalo* eethiyana a ikaaro sa Farawo.
10 Ethoi* aa ennatepa ophwaneliwa ereerihiwe,*Vamoha tho ni akolaare a maluku awaarya muxikoni mwaa.
11 Nnamoopakela ichu sooreera sa ooruNi sa eparata.”
12 “Mwene akiranthe va meesa vawe,Makhurwa aka awunkhela* annamwaryamwaxa wunkhela waya.
13 Oosiveliwa aka tawaka ntoko murupa mukhaani wa miira a wunkhela,Owo onahaala wiichuuwa ohiyu woothene vachirima vaka.
14 Oosiveliwa aka tawaka ntoko ithutu sawunkhela sa mwiri wa heenaVariyari va imaca sa uuva so En-Keti.”
15 “Chiri wootepa oreera, oosiveliwa aka!
Chiri wootepa oreera! Miitho aa ari ntoko ale a ikakaiya.”*
16 “Chiri nyuwaano tho mootepa oreera ni oophwaneliwa, oosiveliwa aka!
Ekaama ahu makukhu.
17 Iviika sa empa ahu* miri sa seetru,Ipatho saya miri sa Xuniperu.
Inoota
^ Naari: “Ncipo nooreeraxa.
^ Mu Ehepiri, “Okichimakiheke.”
^ Ela tiwi, asimwali.
^ Naari: “okumi aka onoosivela vancipale.”
^ Naari: “eveewu ya othanana.”
^ Naari: “kavalo aka.”
^ Naari: “Marama.”
^ Naari akhweya: “ochamve miihi; olunwe miihi.”
^ Mu Ehepiri, “Naartu aka.”
^ Naari: “ipompa.”
^ Naari: “empa ahu etokweene.”
