Ncipo na Solomoni 3:1-11
3 “Ohiyu va ekaama aka,Koomwaavya yoole kinamusivelaaka.*
Koomwaavya, nto nkimphwannye.
2 Kinamvinya nave keeceece epooma;Muramphani ni mmapuro awaaciwamo,Kinammwaavya yoole kinamusivelaaka.*
Koomwaavya, nto nkimphwannye.
3 Alipeleli yeeceeca vapooma yaahikiphwanya.
Kaakoha: ‘Apwanne moomoona yoole kinamusivelaaka?’*
4 Kirikimwaapwaharu yaaleKaamphwanya yoowo kinamusivelaaka.*
Kaamphara nave kihimuhiyaOphiyerya kimukeriha vaate va amama,Okwartu wa yaale akiyanre.
5 Nyuwo anamwane aasithiyana o Yerusalemu, kinnoovekaani wi mulipeleWa anaahe ni ikhomace sa mutakhwani:
Muheererye oviiha naari otannya mwa miyo osivela ophiyerya ephin’ye elukuluku aya.”
6 “Tiheeni yeela enakhuma otakhwani ntoko mwiixi waweemela,Yiihenle makhurwa awunkhela a miira ni oliipanu,Ni makhurwa awunkhela oothene aalipa ootumiha?”
7 “Moone! Ti ekatera* ya Solomoni.
Voorukurerya vaya aakhalavo alopwana akuru awaakhwana makhumi mathanu nammoha,*Alopwana akuru a Isarayeli,
8 Oothene eteenxe malema,Oothene evyakihiwe ntakhara ekhoco,Mmoha ti mmoha arino nlema nawe muyuununiWi amwaakihe wa yawoopiha ohiyu.”
9 “Ekatera* yoomwene ya Mwene SolomoniYeeyo owo opankeiye ntakhara yoowo mwaneene apharihelaka miri so Lipanu.
10 Apoco aya owo aapanke ni eparata;Sooxeeryano ti sa ooru.
Munyukhu opakiwe ni soowara saphaamaxa sooxeerya;Mpuwa mwaya oreerihiwemo ni osivelaNi anamwane aasithiyana o Yerusalemu.”
11 “Khwoo anamwane aasithiyana o Siyoni, murwe,Mmutikhine Mwene Solomoni,Yoowo owanre ekorowa ya othela* yeeyo amamaawe yaampakenlaayaMu nihiku na othela wawe,Mu nihiku nawe na ohakalala.”*
Inoota
^ Naari: “okumi aka onamusivelaaya.”
^ Naari: “okumi aka onamusivelaaya.”
^ Naari: “okumi aka onamusivelaaya.”
^ Naari: “okumi aka onamusivelaaya.”
^ Yaari ekatera yoohuruweliwa, yeeyo yaaphariheliwa wi ateexiweno muchu oochuneyaxa.
^ 60.
^ Yaari ekatera yoohuruweliwa, yeeyo yaaphariheliwa wi ateexiweno muchu oochuneyaxa.
^ Naari: “ekorowa ya ithutu.”
^ Naari: “ohakalala wa murimaawe.”
