Nehemiya 9:1-38
9 Mu nihiku na makhumi meeli naxexe na mweeri yoole, Aisarayeli yaathukumana vamoha; awo yaaniinanela olya ewanre isakhwi nave yiihenle echaya.
2 Mwawiihiiha, muyareriwo wa Aisarayeli waahiivalaanya ni achu oothene a ilapo sookhopela, nave yaaheemela wi elokohe soocheka saya ni soohesa sa makholo aya.
3 Voocharela, yeemenle vaavaa yaaryaayavo, aahaalakhanyiwa liivuru a Nlamulo na Yehova, Muluku aya, mu iwora raru;* nave awo yaamaliha iwora ikina raru elokohaka soocheka ni ekokhoraka vamiithoni va Yehova, Muluku aya.
4 Yesuwa, Pani, Katemiyeli, Sepanai, Puni, Serapiya, Pani ni Kenani yaaheemela vanipuro noocukhuwa na Alevi nave yaahivekela moovuwa wa Yehova, Muluku aya.
5 Alevi Yesuwa, Katemiyeli, Pani, Hasapeneiya, Serapiya, Hotiya, Sepaniya ni Petaiya yaahiloca eriki: “Mvinye nave mmucicimihe Yehova, Muluku anyu, okhala wookhala.* Nave nweemererye awo wi ecicimihe nsina nanyu noovuwa nenlo nnapwaha mareeliho oothene ni ncicimiho.
6 “Nyuwo pahiru mwa Yehova. Moopatuxa irimu, aa, erimu ya irimu ni anakhoco aya oothene, elapo ni soothene siri mwemmo, iphareya ni soothene siri mwemmo. Munnakhapelela soothene seiho wi ikhale ikumi, nave anakhoco a wirimu annookokhorelaani.
7 Nyuwo mwa Yehova, yoowo aamuthanlile Aparamu amviihaka elapo yo Uri ya Akalteu nave amvaha nsina na Aparahamu.
8 Mwaahoona wi murima awe waari woororomeleya wa nyuwo, mwa yeeyo mwaahipaka nlakano na waataana ni yoowo wi mumvahe elapo ya Akanani, ya Aheti, ya Amoreu, ya Aperisi, ya Ayepusi ni ya Akirikasi wi mvahe muyareriwo awe, nave mwaahaakhwaniherya soororomeliha sanyu woona wi muri awookololowa.
9 “Mwaahoona ohooxeya wa makholo ahu o Yikuputu nave mwaahiiwa okhuwela waya o eniya yoophilivila.
10 Voocharela, nyuwo mwaahipaka ineneeryo ni sootikhiniha wa Farawo ni wa anamuteko awe oothene vamoha ni wa achu oothene a elapo awe, woona wi nyuwo mwaahisuwela wi awo yeerano ichu mwawiirumiha ntakhara achu anyu. Mohiipakela nsina nenlo nniikhalelaru ophiyerya olelo.
11 Mwaakawanya ephareya vamiithoni vaya, nave awo elapuwa mu ephareya va echaya yawuuma; mwaahaavonyerya mmaahini awiixa amwiicani aya ntoko nluku nnavonyeryiwa mmaahini awuupa.
12 Othana, nyuwaano mwaahoolela nneeku naweemela, nave ohiyu ni mooro, wi omwaleeleke ephiro yaaphwanelaaya oviramo.
13 Mwaakhuruwela o mwaako Sinai munaloca ni yaawo orweela wirimu nave mwaahaavaha mathoriheryo awookololowa, malamulo eeparipari,* mahusiheryo aphaama ni ikano.
14 Mwaahaasuweliha yaawo Sapata anyu aweela, nave mwaahaavaha ikano, mahusiheryo ni nlamulo moorweela wa mulapeli anyu Mose.
15 Mwaahaavaha epaau yoorweela wirimu vaavaa awo yaavoliwaaya, mwaaheeriha wi maahi ekhume vanlukuni vaavaa awo yaaryaayano nthanana, nave mwaahaaleela wi yaahaala ovolowa ni okuxa elapo yeeyo mwaalipenlaanyu* waavaha.
16 “Nyenya, makholo ahu yaaheera ichu mwawiirumiha. Awo yaahikhala awiikhoma nave hiyawiriyanne ikano sanyu.
17 Awo yaakhooca owiriyana, nave hiyaawuupuwenle miteko sootikhiniha seiho mwenraanyu wa yaawo, nyenya awo yaakhala awiikhoma nave emuthanla muhooleli wi ekookele wookapuroni o Yikuputu. Nto nyuwo mwa Muluku ori ooreheryeya okhurumuwela,* a niphwanya* ni aikharari, oopixa murima* ni oosareya osivela woororomeleya,* nave himwawaanyanyanle.
18 Naamwi yiipakenle yoophwaniherya* ya emetaale ya mwaasaana a emope, enaloca eriki: ‘Ola Muluku anyu, ookuminheeni o Yikuputu,’ nave awo yeerano ichu itokweene ehoocicimihakaani,
19 wa nthowa na ikharari sanyu itokweene, himwaanyanyanle otakhwani. Himwaawaankhe neeku naweemela nenlo naahoola othana mumphironi, naari mooro, yoowo waamwaleela mumphironi yaaphwanelaaya oviramo.
20 Nave nyuwo mwaahaavaha munepa anyu waphaama wi yeereke ichu mwa miruku, himwaawatihenrye mana anyu nave mwaahaavaha maahi vaavaa yaaryaayano nthanana.
21 Mu iyaakha makhumi maxexe mwaanaavaha yoolya mutakhwani. Hiyaavo yaathowa. Soowara saya hisaahuwa, nave meco saya hisiipa.
22 “Mwaahaavaha omwene ni achu, mwaakawelaka ilapo; mwawiihiiha awo yaahikusa elapo yo Sihoni, ela tiwi, elapo ya mwene o Hisponi, nave tho elapo ya o Oki, mwene o Pasa.
23 Nave mwaaheeriha wi anamwane aya yaace ntoko itheneeri sa wirimu. Mwaahaakeriha mu elapo yeeyo mwaaroromelinhaanyu makholo aya wi awo yaahaala ovolowamo ni okuxa.
24 Mwawiihiiha, anamwane aya yaavolowa ekuxa elapo, nave nyuwo mwaawana ni Akanani vamiithoni vaya, yaawo yaari akaneene a elapo yeele, nave mwaahaaveleela mmatani mwaya, mamwene aya ni achu yaakhala mu elapo yeeyo, wi Aisarayeli eweereleke yeeyo yaakhwelaaya.
25 Awo yaakuxa ipooma soolipihiwa ni ilapo* sawuucelana, nave ekuxa ipa saasaren’ye ni ichu saphaama sa mukhalelo ori woothene, ihime soothimpwa sene, miri sa uuva, sa oliveira ni miri sinavaha sawiima sawaaca. Mwa yeeyo awo yaalya, evona, eneneva ni opuha oreera wanyu murima otokweene.
26 “Nyenya, awo yaakhala oohiiwelela ni woomwareelaani, nave yaakakhela oculi Malamulo anyu.* Yaawiipha alipa miririmu anyu, yaawo yaalopola wi yookookeleeni, nave yaapaka ichu itokweene ehoocicimihakaani.
27 Wa nthowa na yeeyo, mwaahaavonyerya mmatani mwa amwiicani aya, yaawo yaaruuhela makacamiho. Nyenya awo yaanakhuwela wa nyuwo mu elukuluku ya sookacamiha, nave nyuwo mwaanawiiwa orweela wirimu. Wa nthowa na ikharari sanyu itokweene, mwaanaavaha alipa a woopola wi yaavuluxe mmatani mwa amwiicani aya.
28 “Nto vaavaa awo yaakhalaaya mmureceleni, yaanakookela weera echu yoonanara vamiithoni vanyu. Nave nyuwo mwaanaanyanyala mmatani mwa amwiicani aya, yaawo yaahooxa. Voocharela, awo yaanakooka enakhuwela wa nyuwo evekaka nikhaviheryo, nave nyuwo mwaanawiiwa orweela wirimu ni waavuluxa wiiliwiili wa nthowa na ikharari sanyu itokweene.
29 Naamwi nyuwo mwaalopola wi ekookele Malamulo anyu, awo yaanakhala a wiirumiha nave hiyaachuna owiriyana ikano sanyu. Yaachekela mathoriheryo anyu, yaawo enahaala omvaha muchu okumi wakhala wi ohiiwelela. Awo yaari oohiiwelela yoorukunuwelakaani, yaari awiikhoma nave hiyaachuna woowiriyanaani.
30 Mwaari oopixa murima ni yaawo mu iyaakha sincipale nave mwaatitelela waalopola moorweela wa munepa anyu mwaapharihelaka alipa a miririmu; nyenya awo yaakhooca owiriyana. Vookuchula vaya, mwaahaaveleela mmatani mwa achu a ilapo soorukurerya.
31 Wanthowa na ikharari sanyu itokweene, nyuwaano himwaatolonxe yaawo, naari waanyanyala, woona wi nyuwaano mwa Muluku a niphwanya* ni a ikharari.
32 “Vano khwoo, Muluku ahu, Muluku mutokweene, oowerya, ni awoopiha yoowo onakhapelela nlakano nawe ni wooniherya osivela woororomeleya, muhinikhalihe moohiyana wa nthowa na makacamiho oothene yaala eniphacuwenle, wa mamwene ahu, wa ahooleli ahu, wa alipa mukucho ahu, wa alipa a miririmu ahu, wa makholo ahu, ni wa achu anyu oothene ovinyerya mmahiku a mamwene o Asiriya ophiyerya olelo.
33 Nyuwaano mwaari awookololowa wa soothene seiho saaniphacuwela woona wi mwaaneerano ichu moororomeleya; nyenya hiyaano neenreno ichu soonanara.
34 Vooloca sa mamwene ahu, ahooleli ahu, alipa a mukucho ahu ni makholo ahu, awo hiyiiwelenle nlamulo nanyu naari othokororya ikano sanyu naari sawuupuxerya sanyu seiyo mwaalopolaanyuno.
35 Naamwi vaavaa awo yaaryaaya mu omwene anyu, epuhaka oreera murima yoowo moonihenryaanyu wa yaawo, mu elapo etokweene ni yawuucelana mwaavanhaanyu, awo hiyoorumeenleeni nave hiyaahin’ye meecelo aya oonanara.
36 Vano hiyo na akapuro olelo, aa, na akapuro mu elapo yeeyo mwaavanhaanyu makholo ahu wi elye sawiima ni ichu saphaama sa mummo.
37 Soolya sawaaca elapo yeela enavahaaya inakerihiwa wa mamwene yaawo munruuhenlaanyu wa nthowa na soocheka sahu. Awo annanlamulela hiyaano* ni mihuwo sahu ntoko enachunelaaya, nave hiyaano ninnahooxeya vancipale.
38 “Mwa soothene seiha, ninnapaka yoororomeliha yeeparipari moorweela wa wiimurepa, nave eyo enneereliwa onamoona ni eseelu ya ahooleli ahu, Alevi ahu, ni alipa mukucho ahu.”
Inoota
^ Mu Ehepiri, “makupa aneexexe a nihiku.”
^ Naari: “ilukuluku soothene.”
^ Naari: “malamulo oororomeleya.”
^ Mu Ehpiri, “mwaaviihalaanyu ntata nanyu.”
^ Naari: “Muluku oneerano ichu moolevelela.”
^ Naari: “a mahala.”
^ Naari: “oolekela onyeenyeya.”
^ Naari: “ooreera murima.”
^ Naari: “yoophwaniherya yawiimuupiwa.”
^ Naari: “imaca.”
^ Mu Ehepiri, “yaavonyerya oculi waya Malamulo anyu.”
^ Naari: “a mahala.”
^ Mu Ehepiri, “miili sahu.”
