Ruti 3:1-18
3 Nowemi, asookora* a Ruti, yaaloca ni yoowo eriki: “Mwanaka, kinachuna owaavyerya echoko aa* wi okhale phaama.
2 Powasi, mmusi ahu. Anamuteko yaale aasithiyana waaryaaweno ti anamuteko awe. Olelo ohiyu onaya omwiipicha sevata awe.
3 Mwawiihiiha, orape nave wiicikichele makhurwa awunkhela; voocharela oware soowara saa sooreeraxa nave okhuruwele weiwo onaya wiipichiwawo sevata. Nto ohiisooneihe wa yoowo ophiyerya amalinhe olya ni owurya.
4 Vaavaa onayeiye okona, ovarerye phaama vachu onahaaleiye okonavo. Voocharela oyevo, okhunule inaani sawe nave okone. Owo onahaala wooleela echu onaphwanelaawe weera.”
5 Ruti aahaakhula: “Soothene mukileenlaanyu kinahaala weerano.”
6 Mwawiihiiha owo aakhuruwelawo nave eerano soothene asookora* awe yaamuleenlaaya wi eere.
7 Powasi aalya ni owurya nave aahakalala. Voocharela aaya okona muxerexere wa nipuro nuukeliwevo soolya. Vahoolo vaya Ruti aahiita, akhunula inaani sa Powasi nave akona vaavale.
8 Ohiyu eriyari Powasi aapacerya othukumela, nave vaavaa aarukununweiye aamoona muthiyana akonne wiinaani sawe.*
9 Owo aamukoha: “Weyaano waani?” Owo aahaakhula: “Ti miyaano Ruti, namuteko anyu. Mmukhuneele namuteko anyu ni ekuwo anyu,* woona wi muri moopoli.”
10 Voocharela Powasi aahi: “Yehova ooreelihe mwanaka. Ekwaha ela, weyaano wohooniherya vancipale osivela waa woororomeleya opwaha ekwaha yoopacerya, woona wi howaamvye amiravo naari oohaawa naari ooreela.
11 Vano mwanaka, ohoove. Kinamweerano soothene oloncaawe, woona wi achu oothene a epooma aasuwela wi weyaano wa muthiyana aphaama.
12 Nyenya naamwi kiri moopoli, ookhalavo moopoli mukina yoowo ori mmusi enexa okipwaha miyo.
13 Okhale vaava ohiyu yoola, nave wakhala wi omeelo wooxiixelo oowoopola, sookwanela! Yoowo awoopole. Nto wakhala wi hawooponle, kinnalipela wa Yehova, Muluku mukumi wi miyaano kinahaala owoopola. Okone vaava ophiyerya oxilevo.”
14 Owo aakona o inaani sawe ophiyerya wooxiixelo nave aavinya ohaakumve oxavo wi ahisuweliwe. Nave Powasi aahi: “Ahikhale ani asuwele wi muthiyana aahirwa o nipuro na omwiipichavo sevata.”
15 Powasi tho aahi: “Oruuhe ekuwo aa onawaraawe nave otapuruxe.” Hiihaa owo aatapuruxa, nave Powasi aahelavo miphimo mithanu nammoha* sa sevata, amwiireiha; voocharela owo aavolowa mpooma.
16 Owo aachikela wa asookora* awe, nave awo yaamukoha: “Weence hai* mwanaka?” Owo aahaaleela soothene Powasi aamweerenleiye.
17 Owo aahaaceererya: “Owo ookivaha miphimo iha mithanu nammoha sa sevata nave aloca: ‘Ohikookele wa asookoraa* mataru.’”
18 Vaavaa Nowemi aahi: “Opixe murima mwanaka, ophiyerya osuwenle mwaha ola oneeraaya okotelevo, tiwi mulopwana ola murima homukhurumuwa ophiyerya amalinhe mwaha yoola olelo vaava.”
Inoota
^ Naari: “apwiya mwaana.”
^ Naari: “oothelanano.” Mu Ekriki, “nipuro nawiichuuwavo.”
^ Naari: “apwiya mwaana.”
^ Naari: “waamweco wawe.”
^ Naari: “yawiikhuneelano anyu.”
^ Akhweya iseiya thanu nammoha, naari echu ya iliitru 44. Mmoone Apentisi B14
^ Naari: “apwiya mwaana.”
^ Mu Ehepri, “Weyaano waani?”
^ Naari: “apwiya mwaanaa.”
