Ruti 4:1-22
4 Powasi aawela aya vamulako wa epooma nave akiraathi vaavale. Nave voocharela vaya, moopoli yoole Powasi aamulonceiye aanavira. Vaavaa Powasi aamwiichana: “Nexe, nkarwa okiraathi va.” Nave owo aarwa akiraathi.
2 Mwawiihiiha Powasi aahiwiichana asitokweene khumi a epooma nave aloca: “Mukiraathi va.” Nave awo yaahikiraathi.
3 Vanonto Powasi aahi wa moopoli: “Nowemi yoowo okoonke elapo yo Mowape, onnaphwanela otumiha emaca yeeyo yaari ya munnihu Elimeleki.
4 Mwa yeeyo kaahoona wi kaanaphwanela woosuweliha mwaha yoola ni wooleela: ‘Othume vamiithoni va achu yaala amanke wenno ni va asitokweene aachu aka. Wakhala wi onahaala woopola, woopole. Nto, wakhala wi honachuna woopola, okileele wi kisuwele, woona wi weyaano torino ophwanelela wa woopola, nave miyo kiri oocharela.’” Owo aahaakhula: “Miyaano kinamoopola.”
5 Voocharela Powasi aahi: “Nihiku oneeraawe othume emaca ya Nowemi, onaphwanela tho othuma ya Ruti o Mowape, mwaara a yoole okhwile, wi okookihe nsina nawe ntakhara muyareriwo awe.”
6 Mwa yeela, moopoli owo aahi: “Nkiwerya woopola, wi kihipahule muyareriwo aka. Moopole nyeenyu ni ophwanelela waka wa woopola, ntakhara miyaano nkiwerya woopola.”
7 Mu ilukuluku sakhalai, yookhovelela yo Isarayeli vooloca sa ophwanelela wa woopola ni otoroka, wi yooniherye weemererya wa othaamiha vyakala, yeerano ha: Mulopwana aaphwanela omurula santaalya awe ni omunnya mukhwaawe, nave hiiha waaneereliwa onamoona wa weemereryana o Isarayeli.
8 Mwawiihiiha, vaavaa moopoli aalonceiye wa Powasi, ariki: “Nyeenyu muthume,” owo aamurula santaalya awe.
9 Voocharela Powasi aaloca wa asitokweene ni wa muloko woothene ariki: “Olelo nyuwo mwa anamoona wi kinathuma ni Nowemi soothene saari sa Elimeleki, ni soothene saari sa Kiliyoni ni Maloni.
10 Kinnamukuxa tho Ruti o Mowape ntoko mwaaraka, yoowo aari mwaara a Maloni, wi kikookihe nsina na mulopwana yoole okhwile ni muyareriwo awe nave wi nsina nawe nihirimeele variyari va asinnawe ni va mulako wa epooma. Olelo nyuwo muri anamoona.”
11 Mwa yeela, achu oothene yaari vamulako wa epooma ni asitokweene yaaloca: “Hiyo na anamoona! Yehova amureelihe muthiyana yoowo omuthenlaawe wi akhale ntoko Rakeli ni Leiya, moorweela wa yaala apiili naayariwe nloko na Aisarayeli. Oreele o Efrata nave opake nsina* naphaama o Petelehemu.
12 Nave wi moorweela wa muyareriwo Yehova oneereiye oovahe ni mwali ola, echoko aa ekhale ntoko echoko ya Peresi, yoowo Tamari aamuyanreiye ni Yuta.”
13 Mwawiihiiha, Powasi aamukuxa Ruti akhala mwaarawe. Owo aakonano, nave Yehova aaheeriha wi arupale ni omuyara mwaana amwaamulopwana.
14 Athiyana yaahi wa Nowemi: “Acicimihiwe Yehova, yoowo olelo ohoohin’ye ohirino moopoli. Nsina na mwaana ola nilaleiwe o Isarayeli!
15 Mwaana ola* oolipiha* okumi aa nave onahaala woohakararya mu wuuluvala waa, ntakhara ola* oyariwe ni mwaara a mwanaa, yoowo onoosivela nave ori oophwanelela waapwaha anamwane athanu napiili.”
16 Nowemi aamukuxa mwaana amuupaara, nave anamuthokororya yoowo.
17 Vano athiyana awaacamanano yaamuchuwa nsina. Awo yaani: “Nowemi ooyareliwa mwaana,” nave yaamuchuwa mwaana ni nsina na Opeti. Owo tiithi a Yese, apapaawe Tavite.
18 Ala masina a makholo a nloko na Peresi: Peresi aamuyara Esironi;
19 Esironi aamuyara Rami; Rami aamuyara Aminatapi;
20 Aminatapi aamuyara Naxoni; Naxoni aamuyara Salmoni;
21 Salmoni aamuyara Powasi; Powasi aamuyara Opeti;
22 Opeti aamuyara Yese; nave Yese aamuyara Tavite.
Inoota
^ Mu Ekriki, “ovuwihe nsina.”
^ Ela tiwi, musulwa a Nowemi.
^ Naari: “ookookiherya.”
^ Ela tiwi, musulwa a Nowemi.
