Salmu 119:1-176
-
Wooniherya othamalela masu oochuneyaxa a Muluku
-
‘Amiravo eni ewerye hai otitelela weeliha ephiro aya?’ (9)
-
“Kinnasiveliwano vancipale sawuupuxerya sanyu” (24)
-
“Kinnasivela vancipale nlamulo nanyu!” (97)
-
“Mirukuxa waapwaha ahusiha aka oothene” (99)
-
“Masu anyu onyaari wa inaani saka” (105)
-
“Masu anyu oothene eparipari” (160)
-
Murecele wa yaala anasivela nlamulo na Muluku (165)
-
א [Alefi]
119 Oohakalala ti yaawo ahirino nthowa mu ephiro aya,Yaawo aneeca mu nlamulo na Yehova.
2 Oohakalala ti yaawo anachariha sawuupuxerya sawe,Yaawo anamwaavya yoowo ni murima aya woothene.
3 Awo hanapaka yoonanara;Awo aneeca mu iphiro sawe.
4 Nyuwo mwaahilamulela wi malamulo anyuEcharihiweke moopwacha.
5 Kinnachuna otitelela wiithipelaWi kaakhwaniherye malamulo anyu!
6 Mwawiihiiha, nkaahaala wuuliwaka muruVaavaa kinathokororyaaka malamulo anyu oothene.
7 Kinamoocicimihaani ni murima wawookololowaVaavaa kinasuwelaaka mathorihelo anyu eekhaikhai.
8 Kinahaala ochariha malamulo anyu.
Muhirwe mukinyanyale moomalela.
ב [Peti]
9 Mmiravo oni awerye hai otitelela weeliha ephiro awe?
Moorweela wa okhala awiilipelela ni weera ichu mwawiiwanana ni masu anyu.
10 Kinnawaavyaani ni murima aka woothene.
Muhemererye wi kipheruwe mmalamulo anyu.
11 Kinnakhapelela mmurimani mwaka masu anyu,Wi kihoochekeleeni.
12 Mucicimihiwe, khwoo Yehova;Mukihusihe malamulo anyu.
13 Ni iyano saka kinnalaleyaMathorihelo oothene muloncaanyu.
14 Kinnahakalala vancipale ni sawuupuxerya sanyu,Opwaha ni ichu ikina soothene sasisapo.
15 Kinahaala wuupuwelela* malamulo anyuNi otikitherya miitho aka mu iphiro sanyu.
16 Kinnasiveliwa vancipale ni malakiheryo anyu.
Nkini kicuwale masu anyu.
ג [Kimeli]
17 Mweerevo echu mooreera murima ni mulapeli anyuWi kikhale ni wiiwelela masu anyu.
18 Muhule miitho aka wi kooneke mookwakwaleyaIchu sootikhiniha sa mu nlamulo nanyu.
19 Pahiru ka namarwa mu elapo yeela.
Muhiipithihe wa miyo malamulo anyu.
20 Nchuno ntakhara malamulo anyuNinnalya omuchu aka* ilukuluku soothene.
21 Nyuwo munnaasamela awiikusererya,Yaale awuulumeliwa anapheruwa mmalamulo anyu.
22 Mviihevo wa miyo* orohiwa ni munyemu,Woona wi kinniiwelela sawuupuxerya sanyu.
23 Naamwi ahooleli ekiranthe vamoha nave enakiloca,Mulapeli anyu onnuupuwelela* malamulo anyu.
24 Kinnasiveliwano vancipale sawuupuxerya sanyu;Iho tisinakilaka.
ד [Taleti]
25 Miyo kookokhora* vanchupini.
Mukikhapelele, mwawiiwanana ni masu anyu.
26 Koolokoha iphiro saka wa nyuwo, nave nyuwo mookaakhula;Mukihusihe malamulo anyu.
27 Mukeerihe wiiwexexa yootaphulela* ya malamulo anyu,Wi kuupuweleleke* miteko sanyu sootikhiniha.
28 Nkinawerya orupa* wa nthowa na othananaxa.
Mukilipihe, mwawiiwanana ni masu anyu.
29 Muviihevo wa miyo ephiro yoowoka,Nave mukooniherye mahala, mukihusihaka nlamulo nanyu.
30 Koothanla ephiro ya ororomeleyaKoosuwela wi mathorihelo anyu tawookololowa.
31 Kinnachariha vakhivirukhiviru sawuupuxerya sanyu.
Khwoo Yehova, muhikilamwihe.*
32 Miyo kinahaala waakuvela ochariha* ephiro ya malamulo anyu;Woona wi munnahula mpuro ntakhara yeeyo mmurimani mwaka.*
ה [He]
33 Khwoo Yehova, mukihusihe ephiro ya malamulo anyu,Nave miyo kinahaala ochara yeeyo ophiyerya omakuchuweloni.
34 Mukivahe wiiwexexa,Wi miyaano kiiwelele nlamulo nanyuNi okhapelela nenlo ni murima aka woothene.
35 Mukihoolele* mu ephiro ya malamulo anyu,Woona wi kinnasiveliwa ni yeeyo.
36 Mweerihe wi murima aka wiiweleleke sawuupuxerya sanyu,Ohiya okhala a nrima.*
37 Murapelihe miitho aka wi ehoone echu yatheru;Mukikhapelele mu ephiro anyu.
38 Mwaakhwaniherye yoororomeliha mpankaanyu wa mulapeli anyu,Wi mooviweke.*
39 Mukoopole wa wuuliheya muru onakoopopiha,Ntakhara mathorihelo anyu taphaama.
40 Moone mukhalelo kinachunaakaxa malamulo anyu.
Mukikhapelele mwawiiwanana ni wookololowa wanyu.
ו [Vawu]
41 Kilawihe osivela wanyu woororomeleya, khwoo Yehova,Nivuluxo nanyu mwawiiwanana ni yoororomeliha anyu;
42 Mwawiihiiha, kinammwaakhula yoole onakinyemula,Vawi kinnaroromela masu anyu.
43 Muhirweru mviihemo mwaano mwaka masu a eparipari,Woona wi kinnaweherya othoriha wanyu.
44 Kinahaala otitelela okhapelela nlamulo nanyuOkhala wookhala.
45 Nave kinahaala weeca mu nipuro nookhapeleleya,*Woona wi kinnaavya malamulo anyu.
46 Kinahaala olokoha vooloca sa sawuupuxerya sanyu vamiithoni va mamweneNave nkuuliheya muru.
47 Kinnasiveliwano vancipale malamulo anyu,Aa, kinnasiveliwano.
48 Kinamviiha mata aka ntakhara malamulo anyu, yaawo kinasivelaaka vancipale,Nave kinahaala wuupuwelela* malamulo anyu.
ז [Sayine]
49 Muupuwele masu anyu mwaaloncaanyu* wa mulapeli anyu,Yaawo munakivahaanyuno ewehereryo.*
50 Nla nihakararyo naka mu wuukhuwa waka,Tiwi masu anyu annakeeriha okhala mukumi.
51 Achu awiikusererya annakinyemula vancipale,Nto miyo nkinahiya nlamulo nanyu.
52 Kinnuupuwela mathorihelo anyu akhalai, khwoo Yehova,Nave awo annakihakararya.
53 Kinnatepaxa onyeenyeya wa nthowa na aweera soonanara,Yaawo anahiya nlamulo nanyu.
54 Malamulo anyu ari macipo wa miyo,Moohipwacha weiwo kinakhalaakawo.*
55 Ohiyu, kinnuupuwela nsina nanyu, khwoo Yehova,Wi kikhapeleleke nlamulo nanyu.
56 Ela yookhovelela akaWoona wi kinniiwelela malamulo anyu.
ח [Heti]
57 Yehova ti nikupa naka;Koororomeliha okhapelela masu anyu.
58 Kinnachimakela wa nyuwo* ni murima aka woothene;Mukooniherye mahala, mwawiiwanana ni yoororomeliha anyu.
59 Kinnathokororya iphiro sakaWi keerihe inaani saka okookela mu sawuupuxerya sanyu.
60 Miyaano kinnaakuvela nave nkinalekelaOkhapelela malamulo anyu.
61 Mikoi sa aweera soonanara sinnakirukurerya,Nave nkinacuwala nlamulo nanyu.
62 Ohiyu eriyari kinnavinya wi koothamaleleeniWa nthowa na mathorihelo anyu awookololowa.
63 Ka nthamwene a oothene yaawo anawoovaaniNi a yaawo anachariha malamulo anyu.
64 Osivela wanyu woororomeleya, khwoo Yehova, onnasareya veelaponi;Mukihusihe malamulo anyu.
ט [Tete]
65 Moomukhaliha phaama mulapeli anyu,Khwoo Yehova, mwawiiwanana ni masu anyu.
66 Mukihusihe okhala a miruku ni a masuwelelo,Vawi kinnaroromela malamulo anyu.
67 Kihaakumve ohoolela sawuukhula, kaanahuwela,*Nto vano kinnakhapelela masu anyu.
68 Nyuwo mwa aphaama nave miteko sanyu ti saphaama.
Mukihusihe malamulo anyu.
69 Achu awiikusererya annakikhuneela ni sawootha,Nyenya miyo kinniiwelela malamulo anyu ni murima aka woothene.
70 Mirima saya hisinamoriwa ikharari,Nyenya miyaano kinnasivela vancipale nlamulo nanyu.
71 Ti yaphaama kihoolenlaaka sawuukhulaWi kihuserye malamulo anyu.
72 Nlamulo mulalen’yaanyu ti naphaama wa miyo,Opwaha macikhwi a ikaruma sa ooru ni sa eparata.
י [Yoti]
73 Mata anyu takipanke ni takuupale.
Mukivahe wiiwexexa,Wi miyo kihuserye malamulo anyu.
74 Yaale anawoovaani annahakalala yaakoonaka,Tiwi masu anyu tari ewehereryo aka.*
75 Koosuwela, khwoo Yehova, wi mathorihelo anyu tawookololowa,Nave wi mookihooxa* wa nthowa na ororomeleya wanyu.
76 Khwoo, osivela wanyu woororomeleya okihakararye,Mwawiiwanana ni yoororomeliha mpankaanyu wa mulapeli anyu.
77 Mukimorele ikharari, wi kititelele okhala,Woona wi kinnasivela vancipale nlamulo nanyu.
78 Yuulihiwe muru achu awiikusererya,Ntakhara annakikhaliha moonanara nihirivo nthowa.*
Nto miyo kinamuupuwelela* malamulo anyu.
79 Yaale anawoovaani ekookele okhala ni miyo,Yaale anasuwela sawuupuxerya sanyu.
80 Murima aka ohikhaleno nthowa vaavaa kiniiwelelaaka malamulo anyu,Wi kihuulihiwe muru.
כ [Kafe]
81 Miyo kinnachunaxa nivuluxo nanyu,*Tiwi masu anyu tari ewehereryo aka.*
82 Miitho aka annachunaxa masu anyu,Vaavaa kinalocaaka kiriki: “Ti liini muneeraanyu mukihakararye?”
83 Tiwi miyo kiri ntoko nipotoro na nnyapara nuumelenle mwiisi,Nto nkinacuwala malamulo anyu.
84 Mahiku makavi mulapeli anyu onaphwaneleiye oweherya?
Muni mwaathorihe liini yaale anakiikara?
85 Achu awiikusererya, yaawo anaakaaha nlamulo nanyu,Annathipa malici wi kimorelemo.
86 Malamulo anyu oothene toororomeleya.
Kinniikariwa nihirivo nthowa. Mukikhaviherye!
87 Yaahanle vakhaani okirimeeliha veelaponi,Nyenya miyo nkihin’ye malamulo anyu.
88 Mukikhapelele wa nthowa na osivela wanyu woororomeleya,Wi kikhapelele sawuupuxerya sanyu seiho mwaaloncaanyu.
ל [Lameti]
89 Okhala wookhala, khwoo Yehova,Masu anyu anahaala otitelela wirimu.
90 Ororomeleya wanyu onniikhalelaru wa miyareriwo soothene.
Mootikitherya elapo, mwawiihiiha eyo ennatitelela okhala yoohicikinyeya.
91 Mwawiiwanana ni malamulo anyu,* miteko sanyu sinnatitelela* ophiyerya olelo,Vawi nyuwo munavareryela ichu soothene.
92 Waakhanle wi nkinasivela nlamulo nanyu,Kaahaala okhwa mu wuukhuwa waka.
93 Nkirwa kicuwala malamulo anyu,Ntakhara wi mookikhapelela moorweela wa yaawo.
94 Miyaano ka awinyu. Mukivuluxe,Woona wi kinnaavya malamulo anyu.
95 Achu oonanara murima annakiweherya wi ekitoloxe,Nto miyaano kinnapwacha moomalela sawuupuxerya sanyu.
96 Kinnoona wi ophaameya woothene wookhalano makuchuwelo.
Nyenya nlamulo nanyu hinaano makuchuwelo.*
מ [Meme]
97 Kinnasivela vancipale nlamulo nanyu!
Kinnuupuwelela* nenlo nihiku noothene.
98 Nlamulo nanyu ninnakeeriha okhala amirukuxa waapwaha amwiicani aka,Woona wi nlo nri ni miyo okhala wookhala.
99 Kookhalano mirukuxa waapwaha ahusiha aka oothene,Nthowa nawi kinnuupuwelela* sawuupuxerya sanyu.
100 Kinneerano ichu mwa mirukuxa waapwaha awuuluvala,Vawi kinniiwelela malamulo anyu.
101 Kinnakhooca weeca mu ephiro yoonanara,Wi kikhapelele masu anyu.
102 Nkinakhooca mathorihelo anyu,Ntakhara nyuwo mookihusiha.
103 Masu anyu toosiva vanlumini vaka,Toosivaxa opwaha enuwi mwaano mwaka!
104 Wa nthowa na malamulo anyu, kinneerano ichu mwa miruku.
Ti nthowa nene kiniicaaka ephiro eri yoothene yoowoka.
נ [Nuni]
105 Masu anyu onyaari wa inaani saka,Ni omwaleela wa ephiro aka.
106 Koolipela nave kinamwaakhwaniherya:
Kinahaala wiiwelela mathorihelo anyu awookololowa.
107 Koohooxeya vancipale,Khwoo Yehova, mukikhapelele mwawiiwanana ni masu anyu.
108 Mweemererye moohakalala soovaha soolakelela sa mwaano mwaka,* khwoo Yehova,Nave mukihusihe mathorihelo anyu.
109 Okumi aka ori va yawoopiha yootitelela,*Nyenya nkinacuwala nlamulo nanyu.
110 Achu oonanara murima aakireela muraakho,Nyenya nkinahuwela mmalamulo anyu.
111 Sawuupuxerya sanyu iri muhakhu aka okhala wookhala,*Vawi iho ohakalala wa murima aka.
112 Koolakelela wiiwelela* malamulo anyuMu ilukuluku soothene, ophiyerya omakuchuwelo.
ס [Sameki]
113 Kinnawiica yaale ari ni murima wookawanyeya,*Nto kinnasivela nlamulo nanyu.
114 Nyuwo muri nipuro naka nawiipithavo ni eyaakiho aka,Vawi masu anyu ti ewehereryo aka.*
115 Mukivinyeryevo nyuwo aweera soonanara,Wi kiiwelele malamulo a Muluku aka.
116 Mukikhaviherye, ntoko mwaaroromelinhaanyu,*Wi kititelele okhala;Muheemererye wi ewehereryo aka ekhale echu yoothananiha.*
117 Mukikhaviherye, wi kivuluxiwe;Mwawiihiiha, ilukuluku soothene kinamutikitheryeya wa malamulo anyu.
118 Nyuwo munnaakhooca oothene yaale anapheruwa mu malamulo anyu,Vawi awo toowoka ni awootha.
119 Nyuwo munnaarihela okhwipi aweera soonanara oothene a veelaponi ntoko ikokhola,Ti nthowa nene kinasivelaaka sawuupuxerya sanyu.
120 Owoovaani nyuwo onneeriha mwiili aka othukumela;Nave kinnoova mathorihelo anyu.
ע [Ayini]
121 Kinneera yeeyo eri yeekhaikhai ni yawookololowa.
Muhikinyanyale mmatani mwa yaale anakihooxa!
122 Muroromelihe omukhaviherya mulapeli anyu;Wi achu awiikusererya ehikihooxe.
123 Miitho aka aavelavela, eweheryaka nivuluxo nanyuNi waakhwanela wa yoororomeliha anyu yawookololowa.
124 Mooniherye osivela wanyu woororomeleya wa mulapeli anyu,Nave mukihusihe malamulo anyu.
125 Ka mulapeli anyu, mukivahe wiiwexexa,Wi kisuweleke sawuupuxerya sanyu.
126 Yoophiya elukuluku wi Yehova eerevo echu,Vawi awo aachekela nlamulo nanyu.
127 Ti nthowa nene kinasivelaaka malamulo anyuOmpwaha ooru, aa, ompwaha ooru oorehereryiwa.
128 Mwawiihiiha kinnoona mahusiheryo* anyu oothene okhala oophwanelela;Kinniica ephiro eri yoothene yoowoka.
פ [Pe]
129 Sawuupuxerya sanyu ti sootikhiniha.
Ti nthowa nene miyo kinacharihaaka.*
130 Wuupululiwa wa masu anyu onnaruuha omwaleela,Waavahaka wiiwexexa oohisuwela.
131 Kinnahula eyano aka nave kinniicha miwiya,*Woona wi kinnachunaxa malamulo anyu.
132 Mukookele wa miyo nave mukooniherye mahala,Mwawiiwanana ni othoriha wanyu wa yaale anasivela nsina nanyu.
133 Muhoolele inaani saka mookhapeleleya* ni masu anyu;Wi ehikhale yoonanara eni ekiwerye.
134 Mukaakihe* mu ohooxa wa achu,Nave kinahaala ocharihaka malamulo anyu.
135 Mweerihe wi ethoi anyu emwaaryele* mulapeli anyuNave mukihusihe malamulo anyu.
136 Miithori annavuuva mmiithoni mwakaWoona wi achu hanakhapelela nlamulo nanyu.
צ [Tsate]
137 Nyuwo mwa awookololowa, khwoo Yehova,Nave mathorihelo anyu toohikhalano nthalu.
138 Sawuupuxerya munavahereryaanyu ti sawookololowaNave ti soororomeleya mwawaakhwanela.
139 Mvai aka onnakilya,Woona wi amwiicani aka aacuwala masu anyu.
140 Masu anyu taweelaxa,*Nave mulapeli anyu onnasivela yaawo.
141 Hikeechweenevo nave kinnanyemuliwa;Naamwi hiiha, nkinacuwala malamulo anyu.
142 Wookololowa wanyu wookololowa woohimala,Nave nlamulo nanyu eparipari.
143 Naamwi wuukhuwa ni makacamiho ekirweenle,Miyaano kinnatitelela osiveliwano vancipale malamulo anyu.
144 Wookololowa wa sawuupuxerya sanyu ti woohimala.
Mukivahe wiiwexexa, wi kititelele okhala.
ק [Kofe]
145 Kinnakhuwela ni murima aka woothene. Mukaakhule, khwoo Yehova.
Kinahaala ocharihaka malamulo anyu.
146 Kinnawiichanaani; mukivuluxe!
Kinahaala okhapelela sawuupuxerya sanyu.
147 Kinnavinya ohisilevo* wi kikhuwele ntakhara nikhaviheryo,Tiwi masu anyu ewehereryo aka.*
148 Miitho aka ennahuleya ohiyu eriyari,*Wi kuupuwelele* masu anyu.
149 Nwiriyane nsu naka wa nthowa na osivela wanyu woororomeleya,Khwoo Yehova, mukikhapelele mwawiiwanana ni ekhaikhai anyu.
150 Yaale aniivoliiherya mmeecelo awuuliha muru annaacamela;Awo eri ocai wa nlamulo nanyu.
151 Nyuwaano muri vakhiviru, khwoo Yehova,Nave malamulo anyu oothene ti eparipari.
152 Kihusenrye khalai sawuupuxerya sanyu,Seiho mutikithenryaanyu wi siikhaleleru okhala wookhala.
ר [Rexe]
153 Moone wuukhuwa waka nave mukikhaviherye,Woona wi nkinacuwala nlamulo nanyu.
154 Mukaakihe* nave mukoopole;Mukikhapelele mwawiiwanana ni yoororomeliha anyu.
155 Nivuluxo nri ocai wa achu oonanara murima,Woona wi awo hanaavya malamulo anyu.
156 Ikharari sanyu itokweene, khwoo Yehova.
Mukikhapelele mwawiiwanana ni ekhaikhai anyu.
157 Yaale anakiikara vamoha ni amwiicani aka ancipale;Nyenya miyo nkinapheruwa wa sawuupuxerya sanyu.
158 Kinnaaweha yaale ari oohiroromeleya moothanyeya,Woona wi awo hanakhapelela masu anyu.
159 Moone mukhalelo kinasivelaaka malamulo anyu!
Khwoo Yehova, mukikhapelele wa nthowa na osivela wanyu woororomeleya.
160 Masu anyu oothene eparipari,Nave mathorihelo anyu oothene awookololowa enniikhalelaru okhala wookhala.
ש [Sini naari Xini]
161 Ahooleli annakiikara nihirivo nthowa,Nto murima aka onnoova masu anyu.
162 Kinnahakalala wa nthowa na masu anyuNtoko muchu yoowo onakuxa ichu sincipale sookhoconi.
163 Kinniica owoka nave kinnathanya yoowo.
Miyo kinnasivela nlamulo nanyu.
164 Kinnoocicimihaani ikwaha thanu napiili vanihikuniWa nthowa na mathorihelo anyu awookololowa.
165 Yaale anasivela nlamulo nanyu aakhalano murecele wawaaca;Hiyaavo eni eweerihe okwaculeya.*
166 Kinnaweherya saweera sanyu sa ovuluxa, khwoo Yehova,Nave kinniiwelela malamulo anyu.
167 Kinnakhapelela* sawuupuxerya sanyu,Nave kinnasivela seiho mwawiiseela.
168 Kinniiwelela malamulo anyu ni sawuupuxerya sanyu,Woona wi moosuwela soothene kinapakaaka.
ת [Tawu]
169 Okhuwela waka ntakhara nikhaviheryo ophiye wa nyuwo, khwoo Yehova.
Mukivahe wiiwexexa mwawiiwanana ni masu anyu.
170 Yooveka aka ntakhara omoreliwa ikharari, ephiye wa nyuwo.
Mukivuluxe, ntoko muroromelinhaanyu.*
171 Iyano saka ivuuveke ncicimiho,Woona wi nyuwo munnakihusiha malamulo anyu.
172 Nlumi naka niipeke masu anyu,Woona wi malamulo anyu oothene tawookololowa.
173 Ntata nanyu nikhale nooreheryeya okikhaviherya,Woona wi koothanla wiiwelela malamulo anyu.
174 Kinnachunaxa nivuluxo nanyu, khwoo Yehova,Nave kinnasivela vancipale nlamulo anyu.
175 Mukeemererye okhala* wi koocicimihekeeni;Mathorihelo anyu ekhale nikhaviheryo naka.
176 Koohuwela ntoko epuchepuche yoorimeela. Murwe mmwaavye mulapeli anyu,Woona wi nkicuwanle malamulo anyu.
Inoota
^ Naari: “ohuserya.”
^ Naari: “okumi aka.”
^ Mu Ehepiri, “Mpirikise vasulu va miyo.”
^ Naari: “onnahuserya.”
^ Naari: “Okumi aka wookokhora.”
^ Mu Ehepiri, “ephiro.”
^ Naari: “kihuseryeke.”
^ Naari: “Okumi aka honawerya orupa.”
^ Naari: “muhikuulihe muru.”
^ Mu Ehepiri, “kinamuchimaka mu.”
^ Naari akhweya: “munneeriha murima aka okhalano nroromelo.”
^ Naari: “Mukeerihe weeca.”
^ Naari: “awiiphwanyerya.”
^ Naari akhweya: “Munaweerelaanyu yaale anawoovani.”
^ Naari: “nawiinnuwa.”
^ Naari: “ohuserya.”
^ Naari: “yoororomeliha anyu mwaapankaanyu.”
^ Naari: “mwaakeerinhaanyu owehererya.”
^ Naari: “mu empa kinakhalaakamo ntoko namarwa.”
^ Naari: “Kinneepesa (Kinnaavya otheya wa) ethoi anyu.”
^ Naari: “kaanacheka moohilakelela.”
^ Naari: “Tiwi kinawehererya masu anyu.”
^ Naari: “mookilaka.”
^ Naari akhweya: “annakootherya.”
^ Naari: “kinamuhuserya.”
^ Naari: “Okumi aka onnanyaala ntakhara nivuluxo nanyu.”
^ Naari: “Tiwi kinawehererya masu anyu.”
^ Ela tiwi, soopatuxiwa sawe soothene.
^ Naari: “mathorihelo anyu.”
^ Mu Ehepiri, “mphimo.”
^ Naari: “Kinnahuserya.”
^ Naari: “kinnahuserya.”
^ Naari: “soovaha saka soolakelela sa ncicimiho.”
^ Naari: “Okumi aka ori mmatani mwaka ilukuluku soothene.”
^ Naari: “yoohiyeryiwa aka yoohimala.”
^ Mu Ehepiri, “Koothitimaniha murima aka wi wiiwelele.”
^ Naari: “achu a mirima miili.”
^ Naari: “Tiwi kinaweherya masu anyu.”
^ Naari: “mwawiiwanana ni masu anyu.”
^ Naari: “yuulihiwe muru.”
^ Naari: “malamulo.”
^ Naari: “okumi aka onacharihaaya.”
^ Mu Ehepiri, “kinnamumulaxa.”
^ Naari: “Mweerihe inaani saka okhala sootikitheryeya.”
^ Mu Ehepiri, “Mukoopole.”
^ Naari: “etheye wa.”
^ Naari: “aheereryiwa va mooroni moomalela.”
^ Naari: “oyaka nuuxa.”
^ Naari: “Tiwi kinaweherya masu anyu.”
^ Naari: “Miitho aka ennahuleya ohaakumve olipelela wa ohiyu.”
^ Naari: “kihuserye.”
^ Naari: “Mwaakihe mwaha aka.”
^ Naari: “Wa yaawo, hiinaavo nluku nookwaculiha.”
^ Naari: “Okumi aka onnakhapelela.”
^ Naari: “mwawiiwanana ni masu anyu.”
^ Naari: “Mweemererye okumi aka wi okhale.”
