Salmu 141:1-10
Salmu a Tavite.
141 Khwoo Yehova, miyo kinnawiichanaani;
Murwe mwawaakuveya wi mukikhaviherye.
Nwiriyane moopwacha vaavaa kinawiichanaakaani.
2 Nivekelo naka nikhale ntoko sawunkhela irehereryiwe vamiithoni vanyu,Matata kiviihalaaka ekhale ntoko sooveleela sa soolya sa osekuwa.
3 Mmukuhe mulipa oolipelela mwaano mwaka, khwoo Yehova;Mmukuhe mulipeleli va mulako wa iyano saka.
4 Muhihiye wi murima aka othitimanele wa echu yoonanara,Wi ohipake saweera sootakhala vamoha ni achu oonanara murima;Miyo kihirwe kisiveliwe ni soolya saya soosiva.
5 Waakhanle wi muchu awookololowa ookilaka, yaahaala okhala meerelo a osivela woororomeleya;Waakhanle wi ookisamela, yii ekhale ntoko makhurwa vamuru vaka,Yaawo muru aka wahaahaalaaya okhooca.
Kinamutitelela ovekela, naamwi variyari va sookacamiha saya.
6 Naamwi athoriha aya evonyiwaka va nikumukumu,Achu ananwiriyana moopwacha masu aka, woona wi awo toohakalaliha.
7 Hiiha ntoko olima ni othipa echaya,Makhuva ahu aamwaryamwaxeliwa mwaano mwa Mahiye.*
8 Nto meetho aka anatikitheryeya mwa nyuwo, khwoo Pwiya Ooweryaxa Yehova.
Miyo kichawenle wa nyuwo.
Muhimalihe okumi aka.*
9 Mukikhapelele wa muraakho orehereryiwe ntakhara miyo,Wa milapa sa amutakhali.
10 Aweera soonanara oothene anammorela mmilapani mwaya,Kiniiha miyo kivinre mookhapeleleya.
Inoota
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “Muhiyeehe okumi aka.”
