Salmu 144:1-15
Salmu a Tavite.
144 Acicimihiwe Yehova, Mwala aka,Yoowo onavyakiha matata aka ntakhara mukhico,Ikatha saka ntakhara ekhoco.
2 Owo ti osivela waka woororomeleya ni nipuro naka noolipihiwa,Nchawelo naka nookhapeleleya* ni moopoli aka,Eyaakiho aka ni Yoowo kinaphwanyaakawo nipuro nawiipithavo,Ti Yoowo onakinnyererya maloko.
3 Khwoo Yehova, muchu tiheeni wi munamvarerya,Mwaana a muchu tiheeni wi munanwiriyana moopwacha?
4 Muchu ori ntoko nwiya pahi;Mahiku awe ari ntoko muuruxi yoowo onacakanela.
5 Khwoo Yehova, muthitimanyihe* erimu anyu nave mukithe;Mukwannye miyaako nave mweerihe iho ochuwa mwiixi.
6 Murumihe overunya wi mwaamwaramwaxe amwiicani;Mvonye mavaka anyu nave nwaakanyerye.
7 Mookole matata anyu ovinyerya osulu;Mukaakihe nave mukivuluxe wa maahi ooruma,Mmatani mwa* anamarwa,
8 Yaawo analoca sawoothaNave anaviiha ntata naya noolopwana wi elipeleno ichu soowoka.*
9 Khwoo Muluku, kinanwiipelaani ncipo mvyaani.
Kinanwiipelaani macipo a woocicimihaani,* kicharihelaka ni ekaruma ya mikoi khumi,
10 Yoole onaavaha ovootha* mamwene,Yoole onamwaakiha mulapeli awe Tavite wa nlema nawiipha.
11 Mukaakihe nave mukivuluxe mmatani mwa anamarwa,Yaawo analoca sawoothaNi anaviiha ntata naya noolopwana wi elipeleno ichu soowoka.
12 Hiiha anamwane ahu aasilopwana anamukhala ntoko miri mivyaani seiho sininnuwa mwawaakuveya;Anamwane ahu aasithiyana, ntoko apoco oopharelano empa epachiwe ntakhara empa ya mwene.
13 Matatha ahu anamusareya ni soolya sa mukhalelo woothene;Mmapuro ahu oolyihamo muhuwo ipucepuche sahu sinamwaacereryeya macikhwi, macikhwi macikhweene.
14 Imope sahu sirupanle hisirwa siphoreya naari mano omorihamo irukulu;Hokhalamo okhuwela wa othanana mmapuro ahu awaaciwamo.
15 Oohakalala achu yaawo ari mmukhalelo yoola!
Oohakalala achu yaawo Muluku aya ori Yehova!
Inoota
^ Naari: “Voochawelavo, va nipuro noocukhuwa.”
^ Naari: “mukitihe.”
^ Naari: “Mu owerya wa.”
^ Mu Ehepiri, “Nave ntata naya noolopwana nri ntata noolopwana noowoka.”
^ Naari: “kinamoopakelaani ncipo.”
^ Naari: “nivuluxo.”
