Salmu 30:1-12
-
Othanana otokweene onnatorokeya okhala ohakalala
-
Mahala a Muluku ta okumi woothene (5)
-
Salmu a Tavite. Ncipo na oveleeliwa empa.
30 Kinarwa koothamalaani, khwoo Yehova, woona wi mookiviiha;*Himweemerenrye wi amwiicani aka ehakalale wa nthowa naka.
2 Khwoo Yehova, Muluku aka, kaakhuwela wa nyuwo ntakhara nikhaviheryo, nave nyuwo mookipenuxa.
3 Khwoo Yehova, nyuwo mookiviiha* Mmahiyeni.*
Mookikookiherya okumi, mookikhaviherya wi kihikhuruwele onlicini.*
4 Mwiipe macipo oomucicimihano* Yehova, nyuwo muri oororomeleya wa yoowo;Muthamalele nsina nawe naweela;*
5 Tiwi okhala mu esara ya Muluku pahiru ti wa elukuluku tonto,Nto okhala mwa mahala awe* ti wa okumi woothene.
Waawiilakavo akhweya onanwerya okhalavo winla, nto wooxiixelo onnakhalavo okhuwela woohakalala.
6 Vaavaa kiisoonnaaka okhala ookhapeleleya, kaahi:
“Nkirwa kicikinyeya.”*
7 Khwoo Yehova, vaavaa kaaryaakano mahala anyu,* mwaakeeriha okhala oolipa ntoko mwaako.
Nto vaavaa mwiipithinhaanyu ethoi anyu, kaakhala awoova.
8 Wa nyuwo, khwoo Yehova, kaanakhuwela;Nave wa Yehova kaanaveka omoreliwa ikharari.
9 Mphurelo taani onahaala okhalavo kakhwa,* wakhala wi kookhuruwela onlicini?*
Apwanne nchupi nnamoovuwihaani? Apwanne nnahaala olaleya ororomeleya wanyu?
10 Khwoo Yehova, mwiiwe nave mukooniherye mahala.
Khwoo Yehova, mukhale mukhaviheryi aka.
11 Mootatusa winla waka okhala wiina;Mooviihavo yoowara aka ya esakhwi nave mukiwariha ohakalala,
12 Wi kiwiipeleeni* ncipo, nave kihimaale.
Khwoo Yehova, Muluku aka, kinamoocicimihaani okhala wookhala.
Inoota
^ Naari: “mookivuluxa.”
^ Naari: “mooviiha okumi aka.”
^ Naari: “mu Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “mmahiye.”
^ Naari: “Mpake ncipo wa.”
^ Mu Ehepiri, “wuupuweleliwa wawe.”
^ Naari: “mwa okhwela wawe waphaama.”
^ Naari: “kiphirikeya.”
^ Naari: “okhwela wanyu waphaama.”
^ Mu Ehepiri, “mu nikhami naka.”
^ Naari: “mmahiye.”
^ Naari: “ncicimiho naka niipe.”
