Salmu 32:1-11
Salmu a Tavite. Masikili.*
32 Oohakalala ti yoole oleveleliwe yoohesa awe, yoole yoocheka awe ekhuneeliwe.*
2 Oohakalala muchu yoowo Yehova ohinamweereiye okhalano nthowa,Ni yoowo ohirino muupuwelo woowoka.
3 Vaava kaamaanlaaka, makhuva aka yaaceecheya wa nthowa na othukumela nihiku noothene.
4 Tiwi othana ni ohiyu ntata nanyu naanakihokola.*
Ikuru saka sooweleela* ntoko maahi mu elukuluku ya elimwe. (Selaha)
5 Vookuchulani kaahilokoha wa nyuwo yoocheka aka;Nkikhuneenle yoohesa aka.
Miyaano kaahi: “Kinahaala olokoha soohesa saka wa Yehova.”
Nave nyuwo mwaalevelela yoohesa ya soocheka saka. (Selaha)
6 Ti nthowa nene oothene yoole ori ororomeleya oneereiye avekele wa nyuwaanoVaavaa munaweryaanyu ophwanyiwa.
Mwawiihiiha, naari mano maahi oorweela hemphwanya.
7 Nyuwo muri nipuro nawiipithavo wa miyo;Nyuwo munamukikhapelela wa sawuukhula.
Nyuwo munamukirukurerya ni okhuwela woohakalala wa woopoliwa. (Selaha)
8 Nyuwo mwaaloca: “Kinamoovaha miruku ni woohusiha mu ephiro onaphwanelaawe weecakamo.
Kinamoovaha ikano koovareryaka.
9 Muhikhale ntoko kavalo ni puuru, yaawo ahirino wiiwexexa,Yaawo anaphwanela ovareryeliwaka ni mukoi omakeleliwe mwaano mwayaWi yiiweleleke.”*
10 Sawiicela sincipale sinnaaphacuwela achu oonanara murima;Nto yoole onamuroromela Yehova onnarukureryiwa ni osivela Wawe woororomeleya.
11 Muhakalaleke mwa Yehova nave muchapeke, nyuwo awookololowa murima;Mukhuwele moohakalala, oothene nyuwo muri awookololowa murima.
Inoota
^ Moone Masu Atharihiwe.
^ Naari: “eleveleliwe.”
^ Naari: “oximwa wanyu waanakihokola.”
^ Naari: “Esenya ya okumi aka yoothatuwa.”
^ Naari: “Ehaakumve owaacamela weyo.”
