Salmu 33:1-22
33 Mukhuwele moohakalala wa nthowa na Yehova, nyuwo achu eekhaikhai.
Ti woophwanelela wi awookololowa emucicimiheke yoowo.
2 Mmuthamalele Yehova ni chakare;Mmwiipele macipo oomucicimihano* ni ekaruma ya mikoi khumi.
3 Mmwiipele ncipo nivyaani;Mwiipe mwa mavyakelo nave mukhuwele moohakalala.
4 Tiwi nsu na Yehova ti nawookololowa,Soothene owo oneereiye sinnaphwanela ororomeliwa.
5 Owo onnasivela wookololowa ni ekhaikhai.
Elapo yavathi yoosareya ni osivela woororomeleya wa Yehova.
6 Moorweela wa nsu na Yehova yoopakiwa erimu;Nave moorweela wa munepa* wa mwaano mwawe, soopakiwa soothene siri weiwo.*
7 Owo onnathukumanya maahi a mphareya ntoko wi ari vanchiyani;Owo oohela maahi awuupa mmapuro oothukumanyamo.
8 Elapo yoothene yavathi emooveke Yehova.
Oothene anakhala mwemmo emucicimiheke.
9 Owo aahiloca, nave soothene saahikhala;Owo aahivaha nlamulo, nave soothene saatikitheryeya.
10 Yehova onnananariha ikano sa maloko;Onnawaakanyerya apalanu a* achu.
11 Nto soolakelela* sa Yehova sinamutitelela okhala wookhala;Miyuupuwelo sa murima awe, wa muyareriwo ti muyareriwo.
12 Noohakalala nloko nenlo Muluku aya ori Yehova,Achu yaawo owo aathanlileiye wi ekhale awawe.
13 Yehova onnaweha vathi orweela wirimu;Owo onnawoona anamwane oothene a achu.
14 Orweela o nipuro onakhaleiyewo,Owo onnaavarerya achu anakhala veelaponi yavathi.
15 Ti yoowo onapaka mirima sa oothene;Onnaalikhela saweera saya soothene.
16 Haavo mwene onavuluxiwa wanthowa na okhalano anakhoco ancipale;Mukhoco hanoopoliwa wanthowa na okhalano ikuru sincipale.
17 Kavalo ewehereryo yatheru ya ovuluxiwa;*Ikuru sawe sincipale hasinaroromeliha woopowa.
18 Onani! Miitho a Yehova annaavarerya yaale anamoova,Yaale anaweherya osivela wawe woororomeleya,
19 Wi awoopole* wa okhwaNi waakhapelela mu elukuluku ya etala.
20 Hiyaano nnanweherya* Yehova.
Owo tori nikhaviheryo nahu ni eyaakiho ahu.
21 Murima ahu onnahakalala mwa yoowo,Woona wi ninnaroromela nsina nawe naweela.
22 Osivela wanyu woororomeleya okhale ni hiyo, khwoo Yehova,Vaavaa nnooweheryaahuni nyuwo.
Inoota
^ Naari: “Mumpakele ncipo.”
^ Naari: “nwiya.”
^ Mu Ehepiri, “aapakiwa anakhoco aya oothene.” Woonaru enaahiwa nsuwa, mweeri, ni itheneeri.
^ Naari: “Onnaakanyerya miyuupuwelo sa.”
^ Naari: “ikano.”
^ Naari: “ovootha.”
^ Naari: “oopole okumi aya.”
^ Naari: “Okumi ahu onanweherya.”
