Salmu 35:1-28
Salmu a Tavite.
35 Khwoo Yehova, mukaakihe wa amwiicani aka;Nwane ni yaale anawana ni miyo.
2 Mukuse sawiisaakihano, ekhaani ni etokweene,Nave murwe mukaakihe.
3 Theteyani nivaka nanyu ni epaso anyu ya ekhoco wa yaale anakiikara.
Mukileele muriki: “Miyo ka nivuluxo naa.”
4 Enyemuliwe nave elamwihiwe yaale anaavya omaliha okumi aka.
Ekookele muculi yuulihen’ye muru yaale anavaanela wi ekitolose.
5 Ekhale ntoko ikokhola inakusiwa* ni echeku;Munkeelo a Yehova awiikare.
6 Ephiro aya ekhale yeepiiphi ni yootherenya,Vaava munkeelo a Yehova oneereiye awiikare.
7 Tiwi, nihirivo nthowa, awo aareya mulapa wi ekiheyeno;Nihirivo nthowa awo aathipa nlici wi kimorelemo.
8 Epahu yaaphacuwele yaawo mootutusa;Eheiwe ni muraakho yoowo aren’yaaya;Emorele mwemmo nave etoloxiwe.
9 Nyenya kinahaala ohakalala* mwa Yehova,Kinarwa kichapa mmeerelo awe a ovulusa.
10 Makhuva aka oothene anamuloca eriki:
“Khwoo Yehova, taani onalikana ni nyuwo?
Nyuwo munnamoopola oohasuwa mmatani mwa yaale ari akuru,Oohasuwa ni oohaawa wa yaale anawiiyerya.”
11 Annarwa anamoona oonanara murima,Enakikoha ichu kihisuwenlaaka.
12 Annakikookiherya yaphaama ni yoonanara,Nave okumi aka onnahooseya.
13 Nto vaavaa awo yiiceliwaaya, kaanawara soowara sa isakhwi;Kaaniithananela* moorweela wa wiinanela olya,Nave vaavaa nivekelo naka naakookaaya nihaakhuliwe,*
14 Kaaneeca kinlaka, ntoko nthamwene naari munnaka;Kaanuuramela vathi kithananaka ntoko muchu onawunlela amama awe.
15 Nyenya vaavaa kaakwaculiwaaka, awo yaahakalala nave yaathukumana vamoha;Awo yaathukumana vamoha ekiipithela wi ekiphare;Yaakimwasanya nave hiyaamaanle.
16 Achu oonanara murima annakiroha mwamunyemu;*Annakhuuriha miino woona wi annakiica.
17 Khwoo Yehova, ophiyerya liini muneeraanyu mweerekemoona oweha pahi?
Mukoopole* wa ohiphela waya,Moopole okumi aka wasisapo mwaano mwa amwaco.
18 Hiiha kinarwa koothamalelaani mmuloko mutokotoko;Kinarwa koocicimihaani veeri va mucici wa achu.
19 Muheemererye wi yaale ari amwiicani aka nihirivo nthowa ehakalale wa nthowa na ohaawa waka,Muheemererye wi enyupulihe miitho aya moonanara yaale anakiica nihirivo nthowa.
20 Tiwi, hanaloca masu a murecele;Nto moowoka, annaphakana oweerela yoonanara achu a murecele a veelaponi yavathi.
21 Awo annahula eyano aya wi ekootherye,Eriki: “Ahaa! Ahaa! Noomoona ni miitho ahu.”
22 Nyuwo mohoona yeela, khwoo Yehova. Muhimaale.
Khwoo Yehova, muhikhale ocai wa miyo.
23 Mvinye nave murwe wi mukaakihe,Khwoo Yehova Muluku aka, mwaakihe mulacu aka.
24 Mukithorihe mwawiiwanana ni wookololowa wanyu, khwoo Yehova, Muluku aka;Muheemererye wi ehakalale ni ohooxeya waka.
25 Ehirwe eloce eriki: “Eya! Nohaakhwaniherya yeeyo naachunaahu.”
Ehirwe eloce eriki: “Hiyaano noomukhuura.”
26 Oothene yaawo yuulihiwe muru ni enyemuliwe,Yaale anahakalala ni epahu aka.
Yiiwarihe wuuliheya muru ni olamwa yaale anakikhaliha mwa wiirumiha.
27 Nto ekhuwele moohakalala yaale anasiveliwa ni wookololowa waka;Ilukuluku soothene eloceke eriki:
“Acicimihiwe Yehova, yoowo onasiveliwa ni murecele wa mulapeli awe.”
28 Hiiha nlumi naka nnarwa nloca sa* wookololowa wanyuNave nnarwa noocicimihaani nihiku noothene.
Inoota
^ Naari: “manasi anakusiwa.”
^ Naari: “okumi aka onahaala ohakalala.”
^ Naari: “Miyaano kaanathananiha okumi aka.”
^ Naari: “naakookelaaya vamurimani vaka.”
^ Naari akhweya: “Achu oonanara murima annaroha wa nthowa na yoolya yavakhaani.”
^ Naari: “Moopole okumi aka.”
^ Naari: “nnamuupuwelela sa.”
