Salmu 46:1-11
Wa muhooleli a macipo. Salmu a anamwane a Kora. Mwawiiwanana ni miipelo a Alamote.* Ncipo.
46 Muluku ti nchawelo nahu ni ikuru sahu,Nikhaviheryo nnaphwanyeya mwawaakuveya mu ilukuluku sa sawuukhula.
2 Ti nthowa nene hinrwa noova, naamwi elapo etoroken’ye,Naamwi miyaako imorenle mu ephareya yawiixa,
3 Naamwi maahi a mphareya erumaka ni okumiha niphweru,Naamwi otekhuma waya weerihaka miyaako ocikinyeya. (Selaha)
4 Wookhalavo muhice mutokotoko okawanyen’ye mmihice mikhaani seiho inahakalaliha epooma ya Muluku,Tapernaakulu aweela ni mutokotoko a Awiirimurimu.
5 Muluku ori mu epooma, eyo hewerya otoloxiwa.
Muluku onamurwa wi akhaviherye yeeyo wooxixelo ene.
6 Maloko yaahuukhuwa, mamwene yaamwariwa;Owo aaloca nave elapo yaatothowa.
7 Yehova a anakhoco ori ni hiyo;Muluku a Yakopo ti nchawelo nahu nookhapeleleya.* (Selaha)
8 Murwe mweerele onamoona saweera sa Yehova,Mukhalelo owo onapakeiye ichu sootikhiniha veelaponi.
9 Owo onnamaliha ikhoco soothene veelaponi yavathi.
Onnantaka munra nave onnanyaanya nivaka,Owo onneeyela ikaaro* sakhoco vamooroni.
10 “Mwiiperekhe nave musuwele wi miyo ka Muluku.
Kinarwa kivuwihiwa variyari va maloko;Kinarwa kivuwihiwa veelaponi.”
11 Yehova a anakhoco ori ni hiyo;Muluku a Yakopo ti nchawelo nookhapeleleya wa hiyo. (Selaha)
Inoota
^ Moone Masu Atharihiwe.
^ Naari: “voochawelavo, va nipuro noocukhuwa.”
^ Naari akhweya: “iyaakiho.”
