Salmu 55:1-23
Wa muhooleli a macipo, wi ncharihiweke ni ikaruma sa mikoi. Masikili.* Salmu a Tavite.
55 Khwoo Muluku, mwiiwe nivekelo naka.
Nave muthokororye yooveka aka ntakhara ikharari.*
2 Mukiwiriyane nave mukaakhule.
Wuukhuwa waka onnakeeriha ohimaaleleya,Nave kiri oohaleeliheya
3 Wa nthowa na yeeyo mwiicani onaloceiyeNi okhinyererya wa achu aweera soonanara.
Tiwi annakuukelela makacamiho,Nave esarasaren’ye awo annakikuherya mathowa.
4 Murima aka ori woothanana mpuwa mwaka,Nave woopopiha wa okhwa onnakiwerya.
5 Woova ni othukumela sinnakirweela,Nave othukumela wookiphwanya.
6 Kinnaloca: “Yaamukhala phaama kaarino muuphelo ntoko ekakaiya!
Kaahaala ovavela ociiwene nave kaamukhala mu nipuro nookhapeleleya.
7 Kaahaala ochawela ociiwene,Kaahaala okayela otakhwani. (Selaha)
8 Kaamuya mwawaakuveya o nipuro noochawelawo,Ocai wa owali wa echeku, ocai wa echeku yawuupa.”
9 Muwaakanyerye, khwoo Yehova, nave mwaakanyerye marehereryo* aya,*Tiwi kohoona nlala ni owanawana mu epooma.
10 Othana ni ohiyu awo anneeceeca vasulu va ixiri saya;Mpuwa mwaya sookhalamo sootakhala ni makacamiho.
11 Veeri vaya wookhalavo ipahu;Ohooxiwa ni wootha hisintonko opwahavo va nipuro naya nawaaciwavo.
12 Yoole onakiruwana tahi mwiicani;Yaari hiiha, kaahaala ovilela.
Yoole onakivinyerya tahi mwiicani;Yaari hiiha, kaahaala wiipitha.
13 Nto ti weyaano, muchu ntoko miyo,*Nthamwene aka, yoowo kimusuwenlaaka phaama.
14 Onthamwene wa vanikuthani waananiiwananiha,Neeca vamoha ni muloko niyaaka o empa ya Muluku.
15 Otoloxa waaphwanye!
Ekhuruwele Mmahiye* eri akumi,Woona wi otakhala onakhala variyari vaya ni mpuwa mwaya.
16 Nto miyo, kinamukhuwela wa Muluku;Nave Yehova onamukivuluxa.
17 Waawiilakavo ni waasaakavo, hiiha ntoko variyari va nihiku, kinnakhala awaakanyeryeya, nave kinniicha miwiya,*Nave owo onniiwa nsu naka.
18 Owo onamukivaha* murecele, akaakihaka* wa yaale anawana ni miyo,Tiwi miloko sa achu sinnarwa wi iwane ni miyo.
19 Muluku onahaala wiiwa nave onahaala owaakhula,Yoole okiranthe va munyukhu awe opacerya khalai. (Selaha)
Awo anamukhooca otoroka makhalelo aya oonanara,Yaale ahinamoova Muluku.
20 Owo* ohaahiphela yaale yaari mmureceleni ni yoowo,Oonanariha nlakano aapankeiye.
21 Masu awe toovyavyalaaxa ompwaha manteeka,Nto mmurimani mwawe orimo owanawana.
Masu awe toosivaxa opwaha makhurwa,Nto ari masipaatha ahululiwe.
22 Omvonyerye Yehova sawuukhula saa,*Nave owo onarwa ookhaviherya.
Harwa eemererya wi awookololowa uuwe.*
23 Nto nyuwo, khwoo Muluku, munamweeriha wi awo ekhuruwele onlicini nawiixasa;Achu yaala arino nthowa na nikhami ni oowoka hekhala naari mano eriyari ya mahiku aya.
Nto miyo, kinahaala woororomelakaani.
Inoota
^ Moone Masu Atharihiwe.
^ Naari: “Nave muhiipithe vaavaa kinavekelaaka ntakhara nikhaviheryo.”
^ Naari: “apalanu.”
^ Naari: “mwaakanyerye ilocelo saya.”
^ Naari: “muchu oophwanaphwana ni miyo.”
^ Naari: “Seyoli,” ela tiwi, nipuro achu oothene anavithiwayaawo. Moone Masu Atharihiwe.
^ Naari: “nave kinnuupulela.”
^ Naari: “onamvaha okumi aka.”
^ Naari: “akoopolaka.”
^ Ela tiwi, nthamwene akhalai, onalociwa mu iversikulu 13 ni 14.
^ Naari: “murici aa; mucholo aa.”
^ Naari: “aphirikeye.”
