Salmu 73:1-28
Salmu a Asafi
73 Mweeparipari Muluku taphaama wa Isarayeli, wa yaale arinono murima waweela.
2 Wa miyo, inaani saka saahanle vakhaani ohuwela;Saahanle vakhaani oserekuwa.
3 Woona wi kaanaakhalela nrima achu awiikhoma,*Vaavaa koonaka murecele wa achu oonanara murima.
4 Tiwi awo hanoona wiicela wa okhwa;Mwiili aya ti waphaama.*
5 Awo hiyaano makacamiho yaawo achu akina aryaayano,Naari mano hanahooxeya ntoko achu akina.
6 Mwawiihiiha, wiirumiha ori ntoko kolaare wa yaawo;Nlala ninnaakhuneela ntoko yoowara.
7 Muhakhu aya* onneeriha miitho aya okhala awaarya;Annakhumelelaxa phaama opwaha vaavaa murima aya waanyiheryaaya.
8 Annaanyemula akina nave annaloca ichu soonanara;Mwawiirumiha, annoopopiha ni ohooxa.
9 Awo annaloca ntoko wi tavasuluxa olikana ni erimu,Nave anneeceeca veelaponi elocaka ni nlumi naya echu eri yoothene anachunaaya.
10 Mwawiihiiha, achu a Muluku* annaachara yaawoNave annawurya maahi aya awaaca.
11 Awo annaloca: “Muluku ani asuwele hai?
Apwanne Awiirimurimu onnasuwela chiryene ichu soothene?”
12 Aa, ala achu oonanara murima, yaawo ilukuluku soothene ahinuukhuwa.
Awo annatitelela waacererya muhakhu aya.
13 Mweeparipari, kaatitelenle weeliha murima aka mahaleeneNi onyawa matata aka mu ohikhalano nthowa.
14 Kaari mmakacamiho nihiku noothene;Wooxixelo woothene kaanalakiwa.
15 Nto waakhanle wi kooloca ichu seiha,Kaahaala okhala oohiroromeleya wa achu anyu.*
16 Vaavaa keerenryaaka wiiwexexa soothene seihaKaahihaleeliheya,
17 Ophiyerya kivolowa mu nipuro ntokweene naweela na MulukuNave kiiwexexa omwaahiyu aya.
18 Mweeparipari, munnaakuha awo vootherenyavo.
Mwawiihiiha, awo anahaala wuuwa ni otoloxiwa.
19 Moohilekela awo annatoloxiwa!
Mootutuxa awo annatoloxiwa, emalihiwa mwawoopiha!
20 Ntoko yooloha muchu amanle ovinya, khwoo Yehova,Vaavaa munahaalaanyu ovinya munanweeriha awo ocakanela.*
21 Nto murima aka waanakisoosa,Nave kaanoona wiicela otokweene mpuwa mwaka.*
22 Miyaano kaari khamiruku nave kaahiyeleela wiiwexexa;Kaari ntoko mwaaxinama oohuupuwela vamiithoni vanyu.
23 Nto vano, ilukuluku soothene kiri ni nyuwo;Moopharela ntata naka noolopwana.
24 Nyuwo munamukeeciha ni ikano sanyu,Nave voocharela munamukihoolela mu ncicimiho.
25 Taani mukina kiryaakano wirimu?
Voohikhala nyuwo, nkinachuna echu veelaponi yavathi.
26 Mwiili aka ni murima aka sinanwerya oceecheya,Nto Muluku ti mwala wa murima aka ni nikupa naka, okhala wookhala.
27 Mweeparipari, yaale anatitelela okhala ocai wa nyuwo anamukhwa.
Munamwaaruuhela makuchuwelo* oothene yaale anacapaheya* moorweela wa woohiyaani.
28 Nto wa miyaano, ti waphaama waacamela wa Muluku.
Koomweera Pwiya Ooweryaxa Yehova okhala voochawelavo vaka,Wi kilokohe saweera sawe soothene.
Inoota
^ Naari: “awiirumiha.”
^ Naari: “Erukulu aya ti yooneneva.”
^ Mu Ehepiri, “Oneneva waya.”
^ Naari: “achu awe.”
^ Mu Ehepiri, “wa muyareriwo wa anamwane anyu.”
^ Mu Ehepiri, “munamwaakhooca yaawo.”
^ Mu Ehepiri, “mu ikhopela saka.”
^ Mu Ehepiri, “Munamwaamaaliha.”
^ Naari: “oohiroromeleya.”
