Salmu 81:1-16
Wa muhooleli a macipo; vooloca sa Kitite.* Salmu a Asafi.
81 Mukhuwele moohakalala wa Muluku, ikuru sahu.
Mukhuwele moohakalala wa Muluku a Yakopo.
2 Mpacerye ncipo nave mukuxe ekoma,Chakare awiiweya phaama vamoha ni ekaruma ya mikoi.
3 Moope epusina vaavaa mweeri onooneyaaya,Mweeri wunnunwe, mu nihiku na efesta ahu.
4 Tiwi nna nlamulo wa Isarayeli,Yoolakelela ya Muluku a Yakopo.
5 Nenlo owo aatikithenryeiye ntoko onamoona* wa YosefeVaavaa aakhummeiye o elapo yo Yikuputu.
Kaahiiwa nsu nenlo* kaahisuwenlaaka:
6 “Miyaano kaaviihamo murici woohokola mmakhatani mwawe;Mata awe yaakhala ootaphuwa wa mucanka woohokola.
7 Weyo waakiichana mu wuukhuwa waa, nave miyo kaahiwaakiha;Kaawaakhula mu nihuruku nooripa.*
Kaaweeha va maahi o Meripa.* (Selaha)
8 Mwiiwe, achu aka, nave kinamoovahaani ekano.
Khwoo Isarayeli, waakiwiriyanne mano.
9 Veeri vanyu ahikhalevo muluku oohisuwanyeya,Nave weyaano honaphwanela omukokhorela muluku a elapo ekina.
10 Miyaano Yehova, ka Muluku aa,Yoole ooviihale o elapo yo Yikuputu.
Waathame phaama, nave miyo kinamusareiha eyano aa ni soolya.
11 Nto achu aka hiyaawiriyanne nsu naka;Isarayeli aakhooca okiiwelela.
12 Mwawiihiiha, kaahaahiya wi echareke murima aya wooturuwa;Awo yaapaka yeeyo yoonaaya okhala yaphaama.*
13 Waakhanle wi mano achu aka aakiwiriyana,Mano Isarayeli ence mu iphiro saka!
14 Miyaano kaahaala owunnyererya amwiicani aya mwawaakuveya;Kaahaala waavootha amwiicani aya ni ntata naka.
15 Yaale anamwiica Yehova anamwiikhuna nthowa na woova vamiithoni vawe,Nave makuchuwelo aya eni ekhale oohimala.*
16 Nto owo onamoocelekhela* ni tiriku aphaamaxa*Nave onamoovoniha ni enuwi ya mmwalani.”
Inoota
^ Moone Masu Atharihiwe.
^ Naari: “yawuupuxerya.”
^ Naari: “elocelo yeeyo.”
^ Mu Ehepiri, “mu nipuro etari eniipithaayamo.”
^ Enataphulela “Waakhulana.”
^ Mu Ehepiri, “Awo yeeca mu ikano saya.”
^ Mu Ehepiri, “elukuluku aya eni ekhale yoohimala.”
^ Ela tiwi, achu a Muluku.
^ Mu Ehepiri, “ni paanya a tiriku.”
