Salmu 89:1-52
Masikili.* Salmu a Etani, a nihimo na Esira.
89 Kinarwa kiipa vooloca sa sawooniherya sa osivela woororomeleya wa Yehova okhala wookhala.
Ni eyano aka kinamusuweliha ororomeleya wanyu wa miyareriwo soothene.
2 Aa, Miyo kaaloca: “Osivela woororomeleya onamutikitheryeya* okhala wookhala,Nave nyuwo mootikitherya moolipa wirimu ororomeleya wanyu.”
3 Nyuwo mwaahi: “Koopaka nlakano ni oothanliwa aka;Koolipela wa Tavite, mulapeli aka:
4 ‘Kinamutikitherya moolipa muyareriwo* awe okhala wookhala,Nave kinamutikitherya munyukhu awe wa omwene wa miyareriwo soothene.’” (Selaha)
5 Khwoo Yehova, erimu ennoocicimihaani wa nthowa na miteko sootikhiniha seiho munapakaanyu.
Aa, eyo ennoocicimihaani mmuloko wa aweela wa nthowa na ororomeleya wanyu.
6 Tiwi, taani wirimu oni aphwanaphwanihiwe ni Yehova?
Variyari va anamwane a Muluku taani onalikana ni Yehova?
7 Muluku onnacicimihiwa va muloko wa* aweela;Owo mutokweene nave tawoopiha wa oothene yaale amurukurenrye.
8 Khwoo Yehova, Muluku a anakhoco,Taani ori oowerya ntoko nyuwo, khwoo Yehova?
Ororomeleya wanyu ori voorukurerya vanyu.
9 Nyuwo munnalamulela esara ya ephareya;Vaavaa macumuxaaya anavinyaaya, nyuwo munnakurumuxa yaawo.
10 Nyuwo moomunyaanya Rahapi, aa, mmuhiya owo ntoko ookhweene.
Ni nwono anyu wakuru, mohaamwaramwaxa amwiicani anyu.
11 Erimu ti yawinyu, nave elapo yavathi ti yawinyu;Elapo yavathi yawuucelana ni soothene siri mwemmo, nyuwo mpanke.
12 Nyuwo mpake omoko ni ohico;Tapori ni Herimoni annacicimiha moohakalala nsina nanyu.
13 Nwono anyu ti woowerya;Ntata nanyu ti nakuru;Ntata nanyu noolopwana ti na vasulu.
14 Wookololowa ni ekhaikhai tari mathipelo a munyukhu anyu;Osivela woororomeleya ni ororomeleya siri vamiithoni vanyu.
15 Oohakalala achu yaawo anasuwela okhuwela moohakalala tiheeni.
Khwoo Yehova, awo anneeca mu omwaleela wa ethoi anyu.
16 Awo annahakalala mu nsina nanyu nihiku noothene,Nave anninnuwihiwa ni wookololowa wanyu.
17 Tiwi, nyuwo muri ncicimiho na ikuru saya,*Nave ni mahala anyu ikuru sahu sinnaaceereryeya.
18 Tiwi eyaakiho ahu enarweela wa Yehova,Nave mwene ahu onarweela wa Aweela a Isarayeli.
19 Mu elukuluku yeele nyuwo mwaahiloca mu yawoona wa oororomeleya anyu nave mwaahi:
“Koomvaha ikuru mukhoco awuupa;Koomunnuwiha yoole kimuthanlilaaka variyari va achu.
20 Koomphwanya Tavite, mulapeli aka;Koomuthanla owo ni makhurwa aka aweela.
21 Ntata naka nnammukhaviherya yoowo,Nave nwono aka onammulipiha yoowo.
22 Haavo mwiicani oni amukhinyererye oliva musokho;Nave haavo muchu ohookololowa oni amuhooxe.
23 Kinamwaataasa amwiicani awe vamiithoni vaweNave kinanwiipha yaale anamwiica.
24 Ororomeleya waka ni osivela waka woororomeleya iri ni yoowo,Nave ikuru sawe* inamwaaceereryeyaka orweela mu nsina naka.
25 Kinamukuha ntata nawe* vasulu va ephareyaNave ntata nawe noolopwana va mihice.
26 Owo onamukiichana, ariki: ‘Nyuwo mwa Atiithi aka,Muluku aka ni Mwala wa nivuluxo naka.’
27 Nave kinammweera owo okhala oopacerya oyariwa,Mutokweene a mamwene a veelaponi yavathi.
28 Osivela waka woororomeleya wa yoowo onamutitelela okhala wookhala,Nave nlakano kipankaaka ni yoowo hinrwa nimala.
29 Kinamutikitherya muyareriwo* awe okhala wookhalaNave kinamweeriha munyukhu awe olekelaxa ntoko erimu.
30 Wakhala wi anaawe aahiya nlamulo nakaNave ehineeca mwawiiwanana ni mathorihelo aka,
31 Wakhala wi aananariha ikano sakaNave ehinakhapelela malamulo aka,
32 Kinamwaalaka ni ekopo wa nthowa na ohiiwelela* waya,Nave kinamwaawaxula ni miwaxuxo wa nthowa na yoohesa aya.
33 Nto nkirwa kihiya wooniherya osivela waka woororomeleya wa yoowoNaari mano okhala oohiroromeleya wa yoororomeliha aka.*
34 Nkinanariha nlakano nakaNaari mano otoroka yeeyo iyano saka iloncaaya.
35 Mu weela waka, koolipela ekwaha emoha wa soothene;Nkinwoka Tavite.
36 Muyareriwo* awe onamutitelela okhala wookhala;Munyukhu awe onamulekela ntoko nsuwa vamiithoni vaka.
37 Hiiha ntoko mweeri, onamutikitheryiwa moolipa okhala wookhalaNtoko namoona oororomeleya wirimu.” (Selaha)
38 Nto nyeenyu ene moomunyanyala ni moomukhooca;Moonyeenyeya ni oothanliwa anyu.
39 Mookhooca nlakano ni mulapeli anyu;Moomunanariha korowa awe, mumvonyerya vachayani.
40 Mookumula ixiri sawe soothene sa* maluku,Mutatuxa mapuro awe oolipihiwa okhala milepe.
41 Oothene anavira annamwaakha ichu sawe;Owo ookhala echu yoonyemuwa wa amwaacamani awe.
42 Mohaavaha ovootha amwiicani awe;*Moheeriha wi amwiicani awe oothene ehakalale.
43 Moheeriha tho wi nlema nawe nikookele muculi,Nave moheeriha wi owo ayeleele elapo va mukhico.
44 Moomaliha ovuwa waweNave moomorihela vathi munyukhu awe.
45 Mookukuca mahiku a omiravo awe;Moomukhuneela ni wuuliheya muru. (Selaha)
46 Ophiyerya liini muneeraanyu mutitelele wiipitha, khwoo Yehova? Mano, okhala wookhala?
Apwanne esara anyu enamutitelela ovarela ntoko mooro?
47 Muupuwele mukhalelo okumi aka oryaaya wookhuveya!
Apwanne nyuwo mwaapatunxe achu oothene mahala ene?
48 Muchu taani onawerya okhala nave ahoonaru okhwa?
Apwanne ookhala onawerya wiivuluxa* mu owerya wa Mahiye?* (Selaha)
49 Siri woowi miteko sanyu sakhalai sa osivela woororomeleya, khwoo Yehova,Seiho mwaalipenlaanyu wa Tavite, mu ororomeleya wanyu?
50 Khwoo Yehova, muupuwele oruwaniwa wa alapeli anyu,Muupuwele mukhalelo kinaphwanelaaka ovilela ni* oruwana wa achu oothene;
51 Khwoo Yehova, muupuwele oruwana wa amwiicani anyu,Mukhalelo oothanliwa anyu oruwaniweiye ni yaawo makupa oothene weiwo aayeiyewo.
52 Yehova acicimihiwe okhala wookhala. Aamen ni Aamen.
Inoota
^ Moone Masu Atharihiwe.
^ Naari: “onamukhala.”
^ Mu Ehepiri, “mmiso.”
^ Naari: “nikhuuru na.”
^ Mu Ehepiri, “nnyaka naya.”
^ Mu Ehepiri, “nnyaka nawe.”
^ Naari: “owerya wawe.”
^ Mu Ehepiri, “mmiso.”
^ Naari: “omwaryeya.”
^ Mu Ehepiri, “Naari mano okhala oowoka mu yoororomeliha aka.”
^ Mu Ehepiri, “Mmiso.”
^ Naari: “mapuro awe awiipithamo a.”
^ Mu Ehepiri, “Mooviiha ntata noolopwana na amwiicani awe.”
^ Naari: “ovuluxa okumi awe.”
^ Mu Ehepiri, “ntata na Seyoli,” ela tiwi, nipuro achu oothene anavithiwayaawo. Moone Masu Atharihiwe.
^ Mu Ehepiri, “oteexa vachirima vaka.”
