Salmu 90:1-17
Nivekelo na Mose, mulopwana a Muluku eeparipari.
90 Khwoo Yehova, nyuwo mwa nipuro nahu nookhalavo* wa miyareriwo soothene.
2 Miyaako ihaakumve oyariwaNaari muhaakumve opaka elapo* vamoha ni echaya yawuucelana,Nyuwo mwa Muluku opacerya ilukuluku ihirino mapacereryo ophiyerya ilukuluku soohimala.*
3 Munnamweeriha muchu okookela o nchupini;Munnaloca: “Mukookelewo, nyuwo anamwane a achu.”
4 Tiwi vamiithoni vanyu, iyaakha ncikhwi iri ntoko osilo ovirale,Pahiru ohiyu omoha.
5 Nyuwo munnaarowiha achu; awo ari pahiru ntoko ikhove;Wooxixelo ari ntoko munyepu onaphuwela:
6 Wooxixelo onnaphuwela ni otaphuruwa,Nto ohiyu onnanyaala ni wuuma.
7 Tiwi ninnatoloxiwa ni onanariwa wanyuNave ninnoopopihiwa ni esara anyu.
8 Nyuwo munnakuha soohesa sahu vamiithoni vanyu;*Sawiiphiini sahu sinnooneya wa nthowa na omwaleela wa ethoi anyu.
9 Mahiku ahu annacakanela* wa nthowa na esara anyuIyaakha sahu sinnamala ntoko nwiya.
10 Olekela wa okumi ahu onakhala iyaakha 70,Naari 80, wa yaale ari akuruxa.*
Nto iyaakha seiha ti soosareya makacamiho ni othanana.
Sinnavira mwawaakuveya nave ninnacakanela moohilekela.*
11 Taani onawerya waalikhela owerya wa onanariwa wanyu?
Esara anyu etokweenexa ntoko wooviwa yoowo munaphwanelaanyu.
12 Munihusihe waalakhanyerya mahiku ahuWi niwerye okhalano murima wa miruku.
13 Mukooke, khwoo Yehova! Mano, ela eni elekele ophiyerya liini?
Mwaamorele ikharari alapeli anyu.
14 Munisareihe wooxixelo ni osivela wanyu woororomeleya,Wi nikhuwele moohakalala ni ochapa, variyari va mahiku ahu oothene.
15 Muneerihe okhala oohakalala mahiku mancipale oolikana ni yaale munihoonxaanyu,Iyaakha seiho naahooxeyaahu ni ipahu.
16 Alapeli anyu yoone miteko sanyu;Nave anamwane aya, yoone ovuwa wanyu.
17 Mahala a Yehova, Muluku ahu, ekhale ni hiyo;Mweerihe* miteko sa matata ahu wi ikhumelele phaama.
Aa, mweerihe* miteko sa matata ahu wi ikhumelele phaama.
Inoota
^ Naari akhweya: “nchawelo.”
^ Naari: “opaka elapo ntoko wi ni wiicela wa oyara.”
^ Naari: “okhala wookhala.”
^ Naari: “Nyuwo moosuwela soohesa sahu.”
^ Naari: “Okumi ahu onnacakanela.”
^ Naari: “wa nthowa na ikuru savameekhaaya.”
^ Naari: “nave ninnavava.”
^ Naari: “Mutikitherye moolipa.”
^ Naari: “mutikitherye moolipa.”
