Salmu 99:1-9
99 Yehova ti Mwene. Achu ethukumele.
Owo okiraanthe va munyukhu awe vasulu va* akerupi. Elapo ya vathi ethukumele.
2 Yehova mutokweene o Siyoni,Nave owo ta vasuluxa waapwaha achu oothene.
3 Awo ecicimiheke nsina nanyu ntokweene,Woona wi ti nawoopiha nave ti naweela.
4 Owo mwene oowerya onasivela ekhaikhai.
Nyuwo mootikitherya moolipa yeeyo eri yawookololowa.
Moomuruuhela Yakopo ekhaikhai ni wookololowa.
5 Mumvuwihe Yehova, Muluku ahu, nave mukokhore* va nipuro noonyikalavo inaani sawe.
Owo taweela.
6 Mose ni Aroni yaari variyari va anamukucho awe,Nave Samuwele aari variyari va yaale yiichana nsina nawe.
Awo yaanamwiichana Yehova,Nave owo aanawaakhula.
7 Owo aanaloca ni yaawo orweela mu neeku naweemela.
Awo yaanakhapelela sawuupuxerya sawe ni malamulo yaawo aavaheiye.
8 Khwoo Yehova, Muluku ahu, nyuwo mwaanawaakhula yaawo.
Mwaari Muluku oolevelela wa yaawo,Nto mwaahaalaka* wa nthowa na soocheka saya.
9 Mumvuwihe Yehova, Muluku ahu,Nave mukokhore* ohoolo wa mwaako awe waweela,Woona wi Yehova, Muluku ahu, taweela.
Inoota
^ Naari akhweya: “veeri va.”
^ Naari: “mmulapele.”
^ Mu Ehepiri, “mwaahinla ikuhu ni yaawo.”
^ Naari: “mmulapele.”
