Saweeriwa ti Arummwa 20:1-38
20 Vaavaa aavukunweiye namvutuka, Paulo aawiichaniha oohuserya nave amanle waalipiha, aahaalaanya yaawo, acimula ayaaka o Maketoniya.
2 Owo aaheeceeca makupa yaale alocaka wa oohuserya masu mancipale a nlipiho, nave voocharela aaphiya o Kresiya.
3 Owo aamaliha miyeeri miraru ari weiwo, nto woona wi Ayuta yaanamwaavyaavya elukuluku aayeiye o Siriya, aalakelela okookela o Maketoniya.
4 Owo aahooliwe ni Sopateru mwaana a Piru o Pereya, Aristarku ni Sekuntu o Tesalonika, Kayu o Terpe, Timotiyu, nave orweela o eprovinsiya yo Asiya Tikiku ni Trofimu.
5 Alopwana yaala yaahoola enaniweherya o Trowate;
6 nyenya naacimula o Filipi evinre mahiku a Ipaau Soohiheliwa Yooruruvaliha, nave mmahiku mathanu naahaaphwanya o Trowate, nimaliha mahiku mathanu nameeli weiwo.
7 Mu nihiku noopacerya na esumana, vaavaa naathukumannaahu wi nilye, Paulo aapacerya oloca ni achu yaari vaavale, woona wi aahaala ocimula mmeeloni mwaya; aatitelela oloca ophiyerya ohiyu eriyari.
8 Mwawiihiiha, saaparihiwa ipanthi sincipale mu esaala yoosulu weiwo naathukumannaahuwo.
9 Mmiravo mmoha iichaniwa Eutiku, aakiranthe vaxanelani, saamurweela ikhove sincipale vaavaa Paulo aaloceiye, ikhove imuconce, owo aamora empa yaneeraru yoosulu.* Yamviihalaaya, aari ookhweene.
10 Nto Paulo aakhuruwa, amuuramela mmiravo, amukhupaarela, aloca ariki: “Muhithanane, ola mukumi.”*
11 Paulo aawenleiye nipuro nenle noosulu aapacerya olya.* Owo aatitelela ovaanela ni anna ophiyerya oxilevo, nave voocharela aapwaha.
12 Mwawiihiiha, awo yaamukuxa mmiravo ari mukumi, nave yaahakalala vancipale.
13 Hiyaano naahoola ophiyerya aariwo pophoro, nave naanwela niyaaka o Asu, weiwo naahaalaahu omwaakhela Paulo wi anwele pophoro. Owo aanleela weerano yeeyo, woona wi aachunne oya weiwo ni meco.
14 Mwawiihiiha, vaavaa aaniphwannyeiye o Asu, naamwaakhela mpophoroni nipwaha niyaaka o Mitilene.
15 Nave mmeeloni mwaya naacimula vaavale niphiya o Kiyu. Nihiku noocharela, naanwela pophoro vahilekenle niyaaka o Samu nave mmeeloni mwaya naaphiya o Miletu.
16 Paulo aalakelela oheemela o Efesu, wi ahimalihe elukuluku eprovinsiya yo Asiya, woona wi aanaakuva wi aphiye o Yerusalemu, wakhala wooweryeya, mu nihiku na Efesta ya Pentekoste.
17 Mwawiihiiha, ari o Miletu, aawiichaniha atokweene a muloko wo Efesu.
18 Vaavaa yaaphin’yaaya, owo aaloca ni yaawo ariki: “Nyuwaano moosuwela phaameene meecelo aka variyari vanyu, ovinyerya nihiku noopacerya kaaphin’yaaka eprovinsiya yo Asiya,
19 koolapa ntoko kapuro a Apwiya, ni wiiyeviha woothene* ni miithori, kihooxeya ni saweeha nthowa na ovaaneleliwa ni Ayuta;
20 mweelukuluku emohamoha nkaahiyale wooleelaani soothene saari sookhweleya,* naari mano nkaahiyale woohusihani mmithukumanoni ni empa ni empa.
21 Nto kaavaha onamoona wawaakhwanela, wa Ayuta hiihaa ntoko Akriki, wi yaaphwanela ocharuwa, ni omukookela Muluku, ni okhalano nroromelo wa Apwiya ahu Yesu.
22 Nave vano, moorweela wa munepa,* kinaya o Yerusalemu naamwi kihisuwenle yeeyo enahaala okiphacuwela weiwo;
23 echu kisuwenlaaka tiwi, mu ipooma soothene, munepa waweela onnakileela wiiliwiili wi ophariwa ni ohooxiwa sinnakiweherya.
24 Nyenya nkinoona okumi aka okhala wasisapoxa wa miyaano;* nto echu yoochuneya wa miyo ori okwaaxa ochimaka waka ni muteko kaakhenlaaka wa Apwiya Yesu: Ovaha onamoona wawaakhwanela wa michaka saphaama vooloca sa mahala matokweene a Muluku.
25 “Vano, koosuwela wi haavo mwa nyuwo, koolaleenryaakaani sa Omwene, oni oone ethoi aka wanaawiili.
26 Mwawiihiiha, nyuwo mwa anamoona nihiku na olelo, wi nkaano nthowa na nikhami na achu oothene,
27 woona wi nkaahin’yeru wooleelaani yookhwela yoothene ya* Muluku.
28 Mwiiweheryeke aneene meekhiinyu ni muhuwo woothene, yoowo munepa waweela woothanlilaayaani ntoko ooweherya, wi mukukhuleke muloko wa Muluku, yoowo owo othummeiye ni nikhami na Mwanawe.
29 Koosuwela wi kimanle opwahavo, inamvolowavo veeri va nyuwo miici sooluwa, seiho inii ihikhaliheke phaama muhuwo,
30 nave mwa nyuwo, anamooneya alopwana eni enakhoromaniha eparipari wi yaalekeche oohuserya wi yaachareke yaawo.
31 “Mwawiihiiha, titelelani wiiwehererya nave muupuwele wi mu iyaakha raru, ohiyu ni othana, nkaahin’ye omulopola mmoha ti mmoha a nyuwo ni miithori.
32 Nave vano kinnooveleelaani mmatani mwa Muluku ni mwa masu vooloca sa mahala awe matokweene, masu yaawo anawerya woolipihaani ni woovahaani nipuro variyari va aweela murima oothene.
33 Nkaakhalenle nrima eparata, naari ooru, naari yoowara ya muchu.
34 Nyuwaano aneene moosuwela phaameene wi matata aka yaala ahaakhwaniha soothowa saka ni soothowa sa yaala yaari ni miyaano.
35 Koowoonihaani nyuwaano mu soothene, wi moorweela wa olapa mwakuru mmukhalelo yoola, nyuwaano munaphwanela waakhaviheryaka yaale ari ooceecheya ni wuupuwelaka masu a Apwiya Yesu, vaavaa yaaloncaaya eriki: ‘Wookhalavo ohakalala wawaaca mu ovaha, opwaha mu waakhela.’”
36 Nave amanle oloca ichu seiha, owo aakokhora ni oothene nave avekela.
37 Oothene yaapacerya winla vatokweenexa, emukhupaarela Paulo* nave emvaha epeexu.
38 Awo yaathanana nthowa na masu aalonceiye wi herwa yoona ethoi awe wanaawiili. Voocharela yaamuhoola weiwo aariwo pophoro.
Inoota
^ Naalakhanyeryaka empa yavathi ntoko yoopacerya.
^ Naari: “ekumi awe hemuchanwe.”
^ Mu Ekriki, “aahinnanya epaau akhuura.”
^ Naari: “wiiyeviha wa mmuupuweloni.”
^ Naari: “saphaama wa nyuwo.”
^ Mu Ekriki, “oophariwa ti munepa.”
^ Naari: “nkinoona okhala echweenevo.”
^ Naari: “miruku soothene sa.”
^ Mu Ekriki, “emuuwela Paulo vaxikoni.”
