Saweeriwa ti Arummwa 22:1-30
22 “Alopwana, anna ni asitiithi, nwiriyane wiisaakiha waka vamiithoni vanyu.”
2 Vaavaa yaamwiiwalaaya alocaka ni yaawo mu Ehepiri, yaamaala, nave owo aaloca ariki:
3 “Miyaano ka Muyuta, ooyariwa o Tarsu epooma yo Silisiya, nyenya kihusihiwe ni Kamaliyeli mu epooma yeela. Kaahusihiwa wi kichariheke vakhivirukhiviru Malamulo a makholo ahu, kamvai mu omulapa Muluku hiihaa ntoko oothene nyuwo mukhanlaanyu olelo.
4 Kaanawiikara yaale yaachara Ephiro yeela, kaamakaka ni waawalela mukariposo alopwana ni athiyana;
5 mulipa a mukucho mutokweene vamoha nnikhuuru noothene na asitokweene anneerela onamoona yeela. Yaala tho yaakinnya ikaarata sa oyano wa anna o Tamasku, nave kaacimula wi kaaruuhe achu yaale oomakiwa ene o Yerusalemu wi yoonihiwe ekoi.
6 “Nyenya kiri va mukwahani kaacamelaka o Tamasku, elukuluku ya mitiya, mootutuxa waarya wa wirimu wootutha waakirukurerya,
7 kaahuuwela vachayani, nave kiniiwa nsu nlocaka wa miyo nriki: ‘Sawulu, Sawulu, onakiikarelani?’
8 Miyaano kaahaakhula: ‘Pwiya, mwaani nyuwo?’ Awo yaakaakhula eriki: ‘Ti miyo Yesu o Nasareti, yoowo onamwiikaraawe.’
9 Nave alopwana yaawo yaari ni miyo yaahoona omwaleela, nyenya hiyiiwale nsu na yoole aaloca ni miyo.
10 Voocharela kaakoha: ‘Pwiya, tiheeni kinaphwanelaaka weera?’ Apwiya yaakaakhula: ‘Vinya, oye o Tamasku, nave weiwo onamuleeliwa soothene othanleliwaawe weera.’
11 Nyenya, woona wi nkaawerya woona nthowa na otutha wa omwaleela yoole, kaaphiya o Tamasku kiphareliwe ntata ni yaale yaari ni miyo.
12 “Voocharela, mulopwana mmoha awiichaniwa Ananiya, oomucicimiha Muluku mwawiiwanana ni Nlamulo, yoowo aalociwa phaama ni Ayuta oothene yakhala weiwo,
13 aarwa wa miyo. Owo aakaacamela nave aloca: ‘Sawulu, munna, okookele woona!’ Mweelukuluku ene yeele kaakookela woona nave kimoona yoowo.
14 Owo aahi wa miyo: ‘Muluku a makholo ahu ohoothanla wi osuwele yookhwela awe, omoone awookololowa ni wiiwe masu a mwaano mwawe,
15 woona wi onarwa okhala namoona awe, variyari va achu oothene vooloca sa ichu wonnaawe ni wiiwalaawe.
16 Vano tiheeni onaweheryaawe? Vinya, opatisiwe nave orapihe soocheka saa moorweela wa wiichana nsina nawe.’
17 “Nto kaakookenlaaka o Yerusalemu, kivekelaka mu empa ya Muluku, kaakhalano yawoona
18 nave kaawoona Apwiya elocaka ni miyo eriki: ‘Waakuve, ovinyemo mu Yerusalemu, nthowa nawi heni yeemererye onamoona onavahaawe vooloca sa miyo.’
19 Nave kaahi: ‘Apwiya, achu ala annasuwela wi miyo kaanawiikara mmapuro a malapelo,* kinaawalela mukariposo ni waawaxula achu yaawo yoororomelaani nyuwo.
20 Niyeehiwaka nikhami na Estefanu namoona anyu, miyaano tho kaakhalavo, keemereryaka okhwa wawe nave kaakhapelenle soowara sa yaale yaamwiipha.’
21 Nyenya owo aahi wa miyo: ‘Hawe, ntakhara kinamooruma wa maloko ociiwene.’”
22 Awo yanwiriyana Paulo ophiyerya alonce masu yaala. Voocharela yaaloca ni masu oovuwa eriki: “Mmurimeelihe mulopwana ola veelaponi, woona wi hanaphwanela okhala mukumi!”
23 Woona wi yaanakhuwela, erihaka soowara saya nave evonyeryaka osulu nchupi,
24 mutokweene a anakhoco aalamulela wi Paulo akerihiwe o kwarteli* nave awaxuliwe akohiwaka, wi asuwele eparipari ene ntakhara heeni awo yaakhuwelaaya wa Paulo mmukhalelo yoola.
25 Nyenya emanle ommaka wi enwaxuleke, Paulo aamukoha muhooleli a anakhoco eemenle vaavale ariki: “Apwanne onneemereryiwa wi nyuwaano mmuwaxule Muroma,* mulacu awe ohithorihiwe?”*
26 Muhooleli a anakhoco iiwaleiye yeela, owo aaya wa mutokweene a anakhoco amuleela ariki: “Tiheeni munakhwelaanyu weera? Mulopwana ola Muroma.”
27 Mwawiihiiha, mutokweene a anakhoco aamwaacamela Paulo amukoha ariki: “Okileele, apwanne wa Muroma?” Owo aahaakhula: “Aa.”
28 Mutokweene a anakhoco aahi: “Ophwanelela yoola wa okhala Muroma kithumme ni ikhorowa sincipale.” Paulo aahi: “Nto miyaano kirimuyariwano.”
29 Mwawaakuveya, alopwana ale yaachuna omukohakoha ni omuhooxa yaamuhiya; nave mutokweene a anakhoco aanoova vaavaa aasuwenleiye wi Paulo aari Muroma nave wi owo taammanke ni mithipo.
30 Mwawiihiiha, mmeeloni mwaya, achunaka osuwela eparipari ene ntakhara heeni Paulo aasomeliweiye ti Ayuta, owo aamutaphula nave alamulela wi ahooleli a alipa a mukucho ni Sineetriyu* oothene ethukumane. Voocharela, aamuruuha Paulo amweemexa veeri va yaawo.
Inoota
^ Mu Ekriki, “mu sinakooka.”
^ Naari: “nipuro na akhoco”
^ Naari: “Muroma oorepeliwa.”
^ Naari: “muhimuthorinhe?”
^ Moone Masu Atharihiwe.
