Saweeriwa ti Arummwa 9:1-43
9 Nyenya Sawulu, nlelo awoopopihaka ni owiipha oohuserya a Apwiya, aaya wa mutokweene a alipa a mukucho
2 nave aamveka yoowo ikaarata sa oyano mmapuro a malapelo* o Tamasku, wi aakerihe o Yerusalemu oomakiwa ene oothene yaawo anachara Ephiro yeeparipari eereiye aaphwanye, alopwana ni athiyana.
3 Variyari va mukwaha, aacamelaka o Tamasku, mootutuxa waarya woorweela wirimu waamurukurerya.
4 Owo aahuuwela vachayani nave aahiiwa nsu nriki: “Sawulu, Sawulu, onakiikarelani?”
5 Owo aakoha: “Pwiya, mwaani nyuwo?” Owo aahaakhula: “Ti miyo Yesu, yoowo onamwiikaraawe.
6 Nto vinya, ovolowe mpooma, nave weiwo onamuleeliwa echu onaphwanelaawe weera.”
7 Nave alopwana yaale yaari ni yoowo mmukwahani, yaaheemela ehikhalano yooloca, awo yaaniiwa nsu nto hiyaamoona muchu ene.
8 Hiiha, Sawulu aavinya vachayani, nave naamwi aawerya ohula miitho awe, haawerya woona echu. Mwawiihiiha awo yaampharela ntata emukeriha o Tamasku.
9 Aamaliha mahiku mararu ahoonaka, nave haalyile echu naari mano owurya.
10 O Tamasku aakhalawo oohuserya mmoha nsina nawe Ananiya, nave Apwiya yaaloca ni yoowo moolohani: “Ananiya!” Owo aahaakhula: “Miyo kiri va Apwiya.”
11 Apwiya yaahi wa yoowo: “Wiirehererye nave oye mphiro oniichaniwa Wookowa; vaate va Yuta, wamwaavye mulopwana awiichaniwa Sawulu o Tarsu. Woona wi hiihaano, owo onamvekela,
12 nave moolohani, owo aamoona mulopwana mmoha awiichaniwa Ananiya avolowaka, amukuheryaka mata wi akookele woona.”
13 Nto Ananiya aahaakhula: “Pwiya, koowiiwa achu ancipale elocaka sa mulopwana yoola, ni soonanara soothene oweerenleiye aweela murima anyu o Yerusalemu.
14 Nave wenno oruule ni owerya wa ahooleli a alipa a mukucho wi aaphare* oothene yaawo aniichana nsina nanyu.”
15 Nto Apwiya yaahi wa yoowo: “Hawe, ntakhara mulopwana ola yookuxerya* yoothanliwa wa miyaano, wi akuxe nsina naka wa maloko, wa mamwene ni wa anamwane a Isarayeli.
16 Yoomeene kinammooniha ichu sincipale owo onaphwaneleiye ohooxeya nthowa na nsina naka.”
17 Mwawiihiiha, Ananiya aapwaha, avolowa mpa, amukuherya mata yoowo nave aloca ariki: “Sawulu, munnaka, Apwiya Yesu, yaawo yoonen’ye wa weyo orwaaka mphironi, aakiruma miyo wi weyo okookele woona nave osareye munepa waweela.”
18 Nave mwawaakuveya, saamora ichu ntoko maakakhali* mmiithoni mwawe, nave aakookela woona. Owo aavinya, aya apatisiwa.
19 Owo aalya nave akhalano ikuru.
Owo aakhala vamoha ni oohuserya o Tamasku mahiku tonto.
20 Moohilekela, owo aapacerya olaleerya mmapuro a malapelo* vooloca sa Yesu, wi ola Mwaana a Muluku.
21 Nyenya oothene yaamwiiwa, yaatikhiniheya enaloca eriki: “Tahi mulopwana yoola aawiikara moowali o Yerusalemu oothene yaale yaaloca nsina nenla? Wenno haaruule ni yoolakelela ya waaphara ni waaveleela* wa ahooleli a alipa a mukucho?”
22 Nto Sawulu aamvira akhalakano ikuru nave aahaleelihaka Ayuta yaawo yaakhala o Tamasku, avahaka sawooniherya seeparipari wi Yesu ti Kristu.
23 Vano evinre mahiku mancipale, Ayuta yaalakana omwiipha yoowo.
24 Nto Sawulu, aasuwela yeeyo yaachunaaya omweerela. Othana ni ohiyu, yaanamuwehererya mmilakoni ya epooma wi emwiiphe.
25 Mwawiihiiha, oohuserya awe yaamukuxa nave ohiyu, yaamukuha mmucankani emukuruxa va ephaka yaari vaxirini.
26 Aaphin’yeiye o Yerusalemu, owo aahiilipixerya okhala vamoha ni oohuserya, nto oothene yaanamoova woona wi awo hiyaaroromela wi owo aari oohuserya.
27 Hiihaa, Parnape aaya omukhaviherya nave amuhoola wa arummwa; voocharela aahaaleela ichu soothene seeren’ye muramphani, mukhalelo Sawulu aawoonneiye Apwiya ni oloca waya ni yoowo. Aaleela tho mukhalelo Sawulu aalonceiye moolipa murima o Tamasku mu nsina na Yesu.
28 Mwawiihiiha Sawulu aakhala ni yaawo, eecaka mootaphuwa o* Yerusalemu nave alocaka moolipa murima mu nsina na Apwiya.
29 Owo aanaloca nave aanavaanyihana ni Ayuta yaaloca Ekiriki, nto awo yaanamwaavyaavya wi emwiiphe.
30 Vaavaa anna yaasuwenlaaya yeela, yaakhuruwano eyaaka o Kaisareya, nave emurumiha o Tarsu.
31 Mwawiihiiha, miloko soothene so Yuteya, o Kalileya ni o Samariya saakhala mmureceleni nave saanatikitheryeya. Woona wi saaneeca simoovaka Yehova ni mu ohakararya wa munepa waweela, iho saanaaceereryeya.
32 Woona wi Petru aaneeceeca makupa oothene a muceche yoole, aakhuruwa tho wi aaxekurye aweela murima yaakhala o Lita.
33 Weiwo, owo aamphwanya mulopwana mmoha nsina nawe Eneya, aamalinhe miyakha mithanu nararu akonaka vakaama, woona wi aari oorakala.
34 Petru aahi wa yoowo: “Eneya, Yesu Kristu onnoopenuxa. Vinya nave orehererye ekaamaa.” Owo aavinya mwawaakuveya.
35 Vaavaa achu oothene yaakhala o Lita ni o mureyareya wa o Sarona yaamoonnaaya yoowo, yaarukunuwela wa Apwiya.
36 Oohuserya mmoha amwaamuthiyana aari o Yope nsina nawe Tapita, nenlo nnataphulela “Torika.”* Yoola aanaphara miteko sincipale saphaama, nnikhaviheryo aavaheiye oohaawa.*
37 Nto mmahiku yaale owo aahiiceliwa akhwa. Mwawiihiiha, awo yaarapiha muruchu ene nave yaatelela va esaala ya empa yoosulu.
38 Woona wi o Lita waahaacamela o Yope, vaavaa oohuserya yiiwalaaya wi Petru ori epooma yeele, yaahaarumiha alopwana eeli wi yamveke eriki: “Khwoo, murwe moohilekela.”
39 Mwawiihiiha, Petru aahiirehererya nave aachara. Vaavaa yaaphin’yaaya, yaamukuxa emukeriha esaala yoosulu; anaamukhwele oothene yaamurica yoowo yinlaka ni emoonihaka malaya mancipale* ni soowara Torika aapankeiye elukuluku aareiye ni yaawo.
40 Petru aahaakumiherya vaate achu oothene, akokhora avekela. Nave aarukunuwa aweha muruchu ii: “Tapita, vinya!” Owo aahula miitho awe, nave aamoonneiye Petru, aakiraathi.
41 Yoowo aapharela ntata na Tapita, amviiha, awiichana aweela murima ni anaamukhwele nave aaperekhela yaawo ari mukumi.
42 Mwaha yoola, waasuweliwa o Yope woothewene, nave ancipale yaanaaroromela Apwiya.
43 Nave aahikhala o Yope mahiku mancipale akhalaka ni mulipa oocikicha ixapala awiichaniwa Simoni.
Inoota
^ Mu Ekriki, “mu sinakooka.”
^ Mu Ekriki, “aamake, aawarihele ikurente.”
^ Naari: “evaasu.”
^ Naari: “maakakharu.”
^ Mu Ekriki, “mu sinakooka.”
^ Mu Ekriki, “waakuxa oomakiwa ene.”
^ Mu Ekriki, “avolowaka ni akhumaka o.”
^ Masina yaala Torika mu Ekriki ni Tapita mu Aramaiku anataphulela “Naahe.”
^ Naari: “ni samahala sa ikharari.” Moone Masu Atharihiwe, “Samahala sa ikharari.”
^ Naari: “ikaapa sincipale.”
