Titu 1:1-16
1 Miyaano Paulo, kiri kapuro a Muluku ni murummwa a Yesu Kristu mwawiiwanana ni nroromelo na oothanliwa a Muluku ni masuwelelo awaakhwanela a eparipari ari mwawiiwanana ni omulapa Muluku.
2 Ichu seiha inathipeleya mu ewehereryo ya ekumi yoohimala, yeeyo Muluku ohinootha, ororomelinheiye ovinyerya khalai.
3 Nyenya mu elukuluku awe, owo aasuweliha masu awe, moorweela wa olaleerya yoowo kinnyereryiwaaka mwawiiwanana ni olamuleliwa wa mvuluxa ahu, Muluku.
4 Kinnoorepela weyo Titu, mwaana eeparipari mwawiiwanana ni nroromelo nnuukaahu:
Mahala matokweene ni murecele wa Muluku, Atiithi vamoha ni a Kristu Yesu, Mvuluxa ahu ekhale ni weyo.
5 Kohoohiya o Kereti wi wookololeke ichu seiho saaphwanela wookololiwa ni waathanla atokweene muceche ti muceche, mwawiiwanana ni sooleeliherya iha koovanhaaka:
6 Mutokweene onaphwanela okhala muchu oohiphwanyeryiwa nthowa, mulopwana a muthiyana mmoha, nave orino anamwane oororomela yaawo ahinaphwanyeryiwa nthowa wi aakhalano meecelo oonanara naari toomwaryeya.
7 Tiwi, ntoko muhooleli othanliwe ni Muluku ooweherya onaphwanela okhala muchu oohiphwanyeryiwa nthowa, ahikhale a wiisunnuwiha, naari awaakuvela onanariwa, naari oohapaliwa, naari oowali,* naari awaavyaavya muhakhu mmukhalelo woohiphwanelela.
8 Nyenya onaphwanela okhala oowaakhela aleco, oosivela yeeyo eri yaphaama, amiruku,* awookololowa, ororomeleya, awiihiiha,
9 awaakeelela masu* oororomeleya mwawiiwanana ni mukhalelo awe wa ohusiha, wi awerye waalipiha* moorweela wa mahusiho aphaama* ni waasamela yaale anavaanyiha.
10 Tiwi aakhalamo alopwana ancipale oomwaryeya, eemwaanomwaano ni oowoka, xaxaxa yaale anacicimiherya othikiliwa.
11 Ti woochuneya omaaliha iyano saya, woona wi alopwana ala annatitelela omwarya ichoko soothene, ehusihaka ichu soohiphwanelela, yaavyaavyaka wiiphwanyerya.
12 Mmoha a yaawo, mulipa a miririmu aya, aaloca: “Achu o Kereti tawootha okhala wookhala, axinama ooluwa,* anamalya ooporora.”
13 Onamoona ola ti weeparipari. Wanthowa nenla, otitelele waasamela moolipa murima, wi ekhale akumi mu nroromelo
14 nave ehithokororyeke ithale sa Ayuta ni malamulo a achu yaawo anakhoromanyiha eparipari.
15 Ichu soothene ti saweela wa achu aweela murima; nto wa ale ari ooriipiheya ni oohikhalano nroromelo, hiyaavo eri yaweela, woona wi muupuwelo aya ni yawuupuxerya-ya-murima aya ti soonanara.*
16 Awo annalokoha vanlakani vene wi aamusuwela Muluku, nto annamukhooca moorweela wa miteko saya, ntakhara ari oothanyeya, oohiiwelela ni ooheemereryiwa wa miteko soothene saphaama.
Inoota
^ Naari: “oomana; anlala.”
^ Naari: “awiisuumaaliha.”
^ Naari: “michaka soororomeleya.”
^ Naari: “waaceenyerya.”
^ Naari: “ookumi; amphurelo.”
^ Naari: “awoopiha.”
^ Naari: “soohoweleya.”
