Wupulula 16:1-21
16 Kaahiiwa nsu noovuwa naakhuma o nipuro naweela nlocaka wa ankeelo athanu napiili nriki: “Haweni nave mwayeeherye veelaponi yavathi itixela thanu napiili sa esara ya Muluku.”
2 Oopacerya aapwaha nave aayeeherya etixela awe veelaponi yavathi. Nave nikhwaca noonanara ni nootakhala naahaahoosa achu yaawo yaarino eneneeryo ya mwaaxinama awoopiha ni yaalapa eruku awe.
3 Anaawiili aayeeherya etixela awe mphareya. Nave ephareya yaathatuwa ekhala nikhami ntoko na muchu ookhwa, nave soopatuxiwa soothene saarino okumi saakhwa, aa, ichu sa mphareya.
4 Aneeraru aayeeherya etixela awe mmihiceni ni mu ihime sa maahi. Nave iho saathatuwa nikhami.
5 Kaamwiiwa munkeelo aalamulela maahi ariki: “Nyuwo, Yoole ori nave aari, Nyuwo oororomeleya, muri awookololowa, woona wi mulamulenle othorihiwa yoola,
6 ntakhara awo aayeeha nikhami na aweela murima ni na alipa a miririmu, nave nyuwo mohaavaha nikhami wi ewurye, awo annaphwanela yeeyo.”
7 Nave kaamwiiwa altare ariki: “Aa, Yehova Muluku, Aikuru Soothene, othoriha wanyu* ti weeparipari ni wawookololowa.”
8 Aneesese aayeeherya etixela awe vansuwani, nave nsuwa nlo naaheemereryiwa waapaha achu ni mooro.
9 Achu yaapahiwa ni oviha otokotoko, nyenya awo yaanyemula nsina na Muluku, yoowo orino owerya wa olamulela ipahu seiha, nave awo hiyaacharunwe naari mano omucicimiha yoowo.
10 Aneethanu aayeeherya etixela awe va munyukhu wa mwaasinama awoopiha. Omwene awe waahikhala epiiphi, nave achu yaapacerya oluma nlumi naya wa nthowa na wiicela,
11 nyenya awo yaanamunyemula Muluku a wirimu wa nthowa na wiicela yoonaaya vamoha ni makhwacaaya, nave hiyaacharunwe wa miteko saya.
12 Aneethanu nammoha aayeeherya etixela awe mmuhice mutokotoko Eufrate, nave maahi yaahuuma wi ereheryiwe ephiro ya mamwene a makupa onakhumawo nsuwa.
13 Nave kaahoona masu mararu ooveereliwa oothanyeya,* yaalikana ni anaphulu, yaakhuma mwaano mwa enowa yawoopiha, mwaano mwa mwaasinama awoopiha ni mwaano mwa mulipa a miririmu oowoka.
14 Mweeparipari ala masu ooveereliwa ni masololo nave annapaka sootikhiniha; awo annaya wa mamwene a elapo yoothene, wi yaathukumanye vamoha ntakhara ekhoco ya nihiku ntokotoko na Muluku Aikuru Soothene.
15 “Owiriyane! Kinarwa ntoko mpava. Oohakalala ti yoole onakhala oovinya nave onakhapelela soowara sawe, wi owo aheece epwitikiri ene nave achu emoone ni uuliheye muru.”
16 Nave yaahaathukumanya yaawo mu nipuro nenlo mu Ehepiri nniichaniwa Armaketo.*
17 Aneethanu napiili aayeeherya etixela awe osulu. Ohoolo waya, naakhuma nsu noovuwa o nipuro naweela, orweela omunyukhuni, nriki: “Eyo yoheereya!”
18 Nave waakhalavo overunya, masu ni itari, nave aakhalavo mwaacikinye mutokotoko, oohiyana ni oothene yaale yeeren’ye ovinyerya elukuluku achu akhanlaaya veelaponi, mwaacikinye owo aatepa winnuwa nave aari mutokotokoxa.
19 Epooma etokotoko yaakawanyeya mmakupa mararu, nave miceche sa maloko saahuuwa; nave Muluku aamuupuwela Papulu Mutokotoko wi amvahe koopho a eviinyu ya onyeenyeya wa esara awe.
20 Nave tho ivilivili saachawa nave miyaako saacakanela.
21 Voocharela maluku matokotoko a maralala orweela wirimu, nimoha ti nimoha naahokola echu ya etalento emoha,* naahaamorela achu, nave achu yaamunyemula Muluku wa nthowa na epahu ya maralala, woona wi epahu yaari etokotokoxa.
Inoota
^ Naari: “mathoriheryo anyu.”
^ Mu Ekriki, “minepa soothanyeya.”
^ Mu Ekriki, Har Maketo, nsu nnarweela mu Ehepri nnataphulela “Mwaako wo Mexitu.”
^ Etalanto emoha ya Ekriki enahokola ikilokarama 20.4.
