Wupulula 22:1-21
22 Nave owo aakooniha muhice wa maahi a okumi, awaarya ntoko kristaale, okhumaka o munyukhu wa Muluku ni wa Mwaasaana Eepucepuche,
2 nave owo waanavira veeri va rampha mutokweene a epooma. Mmakupa oomeeli a muhice saahikhalamo miri sa okumi seiho siimiha ikwaha khumi napiili, ivahaka sawiima saya mweeri ti mweeri. Nave makukhu a miri yaari oopenuxano maloko.
3 Horwa okhalavo wuulumeleya. Nto munyukhu wa Muluku ni wa Mwaasaana Eepucepuche inamukhala vapooma, nave alapeli awe anamphara muteko waweela ntakhara yoowo;
4 nave awo anahaala woona ethoi awe, nave nsina nawe nnarwa nikhala vayuucini vaya.
5 Horwa tho okhalavo ohiyu, nave awo hechunaka omwaleela wa epanthi naari omwaleela wa nsuwa, woona wi Yehova Muluku onarwa aamwaleela yaawo, nave awo anahaala olamulela ntoko mamwene okhala wookhala.
6 Owo aaloca ni miyo ariki: “Masu ala toororomeleya ni eeparipari; aa, Yehova Muluku yoowo aaveerenle alipa a miririmu, oomurumiha munkeelo awe wi awoonihe alapeli awe ichu seiyo sinahaala weereya moohilekela.
7 Owiriyane! Kinnarwa mwawaakuveya. Oohakalala ti yoole oniiwelela masu a miririmu a eroolu yeela.”
8 Miyaano Yohani, kaari yoomi kiiwa ni woona ichu seiha. Vaavaa kiiwalaaka ni koonnaaka, kaakokhora va manaani a munkeelo yoowo aakooninhe ichu seiha, wi kimulapele.
9 Nto owo aahi wa miyo: “Phoole! Oheereno yeeyo! Ka namuteko mukhwaa ni a asinnaa alipa a miririmu ni yaale aniiwelela masu a eroolu yeela. Omulapeke Muluku.”
10 Owo tho aahi wa miyo: “Ohiwale masu a miririmu a eroolu yeela, ntakhara elukuluku yaalakeleliwe yohaacamela.
11 Yoole ori oohookololowa atitelele mu ohookololowa nave yoole ori oothanyeya atitelele mu othanyeya wawe; nyenya yoole ori awookololowa atitelele mu wookololowa, nave yoole ori aweela, atitelele mu weela.
12 “‘Owiriyane! Kinnarwa mwawaakuveya, nave nchuwelo kinavahaaka nri ni miyo, wi kimukookiherye mmoha ti mmoha mwawiiwanana ni miteko sawe.
13 Miyaano ka Alfa ni Omeka,* oopacerya ni ookuchula, maphacuwelo ni makuchuwelo.
14 Oohakalala ti yaawo anavasa soowara saya wi ewerye ophiya o miri sa okumi nave wi evolowe mpooma eviraka mmilako.
15 Vaate arivo anapwa,* yaale awiisaciherya,* anapaka ocapaheya,* anamaahita, oolapa soophwaniherya, ni oothene yaale aneerano nave anasiveliwa wootha.’
16 “‘Miyaano Yesu, koomurumiha munkeelo aka wi aweereleeni onamoona vooloca sa ichu seiha ntakhara miloko. Miyaano ka mutathaari ni muyareriwo wa Tavite, ni etheneeri yawaarya ya woosiiselo.’”
17 Munepa ni mulipa ootheliwa annatitelela oloca eriki: “Rwaani!” Yoole oniiwa aloce ariki: “Rwaani!” Nave yoole ori ni nthanana arwe; yoole onachuna awurye mahaleene maahi a okumi.
18 “Kinnalokoha* wa oothene yaale aniiwa masu a miririmu a eroolu yeela: Wakhala wi muchu ohaaceererya ichu seiya, Muluku onahaala omwaacererya ipahu seiho irempwale mu eroolu yeela;
19 nave wakhala wi muchu ooviihamo echu vyakala ya masu a liivuru yoola a miririmu, Muluku onarwa aviihavo wa yoowo makupa awe a miri sa okumi nave hamweemererya ovolowa mu epooma yaweela.
20 “Yoole oneerela onamoona ichu seiha onnaloca ariki: ‘Aa, kinnarwa mwawaakuveya.’”
“Aamen! Murwe, Apwiya Yesu.”
21 Mahala matokweene a Apwiya Yesu ekhale ni aweela murima.
Inoota
^ Ela tiwi, oopacerya ni ookuchula. Naari: “A ni Z ya alfapetu Eekriki.”
^ Ela tiwi, oothene yaale aneerano ichu soothanyeya vamiithoni va Muluku.
^ Naari: “okhwiri; onamulosiwe.”
^ Moone Masu Atharihiwe, “Ocapaheya.”
^ Naari: “Kinneerela onamoona.”
