Wupulula 3:1-22
3 “Wa munkeelo a muloko wo Sarti, orepe: Onaloca ichu seiya ti yoole orinono minepa mithanu namiili sa Muluku ni itheneeri thanu napiili: ‘Koosuwela saweera saa, nave wi meecelo aa ari makumi,* nyenya ari ookhwa ene.
2 Wiilipeleleke, nave olipihe ichu seiho ihalenle saahaala vakhaani okhwa, ntakhara kohoona wi miteko saa hiseeren’ye mwawaakhwanela* vamiithoni va Muluku aka.
3 Mwawiihiiha, otitelele wuupuwela yeeyo waakhenlaawe ni wiiwalaawe, otitelele okhapelela yeeyo nave ocharuwe. Mweeparipari, voohikhala wi woovinya, kinamurwa ntoko mpava nave hosuwela ewora kineeraaka kirwe wa weyo.
4 “‘Nyenya, wookhalano achu avakhaani* ari o Sarti yaawo ahiriipinhe soowara saya, nave awo anahaala weeca ni miyo ewanre soowara saweela, woona wi ari oophwanelela.
5 Yoole ani avoothe onahaala owara hiihaa ni soowara saweela, nave nkirwa kisipiha* nsina nawe mu liivuru a okumi, nyenya kinamweemererya nsina nawe vamiithoni va Atiithi aka ni vamiithoni va ankeelo aya.
6 Yoole orino maaru iiwe yeeyo munepa onalocaaya wa miloko.’
7 “Wa munkeelo a muloko wo Filatelfiya, orepe: Onaloca ichu seiha ti yoowo ori aweela, yoowo ori eeparipari, yoowo orinono exaavi ya Tavite, yoowo onahula nave ahikhala onawerya owala nave onawala ahikhala onawerya ohula:
8 ‘Koosuwela saweera saa. Nkoona! Koohula mulako ohoolo waa, yoowo ohinawerya owaliwa ni muchu. Koosuwela wi wookhalano ikuru savakhaani, onnakhapelela masu aka nave wohooniherya ororomeleya wa nsina naka.
9 Nkoona! Kinanweeriha yaale a nikhuuru na* Satana, aniiseera Ayuta nyenya ehiri, nto erikimootha, erwe nave ekokhore* vamiithoni va inaani saa ni waasuweliha wi kinnoosivela.
10 Woona wi wookhapelela masu vooloca sa ovilela waka,* kinamookhapelela tho ewora ya yaweeha, yeeyo enahaala orwa veelaponi yoothene, wi eweehe yaale anakhala veelaponi yavathi.
11 Kinnarwa mwawaakuveya. Otitelele opharela yeeyo oryaaweno, wi ahikhale oni amukuse korowa aa.
12 “‘Yoole oni avoothe, kinammweera poco mu empa ya Muluku aka, nave owo harwa akhumamo. Kinamurepa mwa yoowo nsina na Muluku aka ni nsina na epooma ya Muluku aka, Yerusalemu muvyaani, yoowo onakhuruwa wirimu orweela wa Muluku aka, vamoha ni nsina naka nivyaani.
13 Yoole orino maaru iiwe yeeyo munepa onalocaaya wa miloko.’
14 “Wa munkeelo a muloko wo Lawotikeya, orepe: Onaloca ichu seiya ti Aamen, namoona oororomeleya ni eeparipari, oopacerya a soopatuxiwa sa Muluku:
15 ‘Koosuwela saweera saa, wi hori ooriirya naari ooviha. Kaamusiveliwa waari ooriirya naari ooviha.
16 Vano woona wi ori oolucuwa tonto nave hori ooviha naari ooriirya, kinamoorapheya* mwaano mwaka.
17 Vawi weyo onnaloca, “kooreela nave kookhalano muhakhu nave nkinachuna echu ekina,” nyenya honasuwela wi ori ootakhaliwa, oohasuwa, oohaawa, eevaasi ni eepwitikiri,
18 kinnoovaha miruku wi omuthume ni miyo ooru ototoxiwe vaikho, wi okhale ooreela, ni soowara saweela wi oware nave ohuuliheye muru wa epwitikiri aa; ni murece wa osirikela miitho aa, wi wooneke.
19 “‘Oothene yaale kinaasivelaaka, kinnaasamela ni waalaka. Mwawiihiiha, okhale amvai nave ocharuwe.
20 Nwiriyane! Kiri vamulako kimanaka nsele. Akhalavo muchu oniiwa nsu naka, ahula mulako, kinamvolowa mpa mwawe nave kinamulya ni yoowo yoolya yoohiyu, nave owo ni miyo.
21 Yoole oni avoothe kinammweemererya okiraathi ni miyo vamunyukhuni vaka hiiha ntoko miyo kivonthaaka nave kikiraathi ni Atiithi aka vamunyukhuni vaya.
22 Yoole orino maaru iiwe yeeyo munepa onalocaaya wa miloko.’”
Inoota
^ Naari: “nsina naa nikumi.”
^ Naari: “ntakhara kiphwannye miteko saa ihaakhwanenle.”
^ Mu Ekriki, “masina a vakhaani.”
^ Naari: “nkirwa kiviihavo.”
^ Mu Ekriki, “sinakoka a.”
^ Naari: “yoocicimihe.”
^ Naari akhweya: “woochariha yootakiherya aka ya ovilela.”
^ Naari: “kinamoohasa.”
