Wupulula 5:1-14
5 Kaahoona ontatani noolopwana na Yoole aakiranthe vamunyukhuni eroolu erempwe wu ni wu,* emakiwe ni iseelu thanu napiili.
2 Kaahimoona tho munkeelo akuru alocaka ni masu oovuwa ariki: “Taani ori oophwanelela ohula eroolu ni opasa iseelu saya?”
3 Nto haarivo mmoha wirimu naari veelaponi naari vathi veelapo aawerya ohula eroolu naari woona yeeyo yaarempwale mummo.
4 Kaapacerya wunla vatokotoko, ntakhara haarivo mmoha mano ooniwe okhala oophwanelela ohula eroolu naari woona yeeyo yaarempwale mummo.
5 Nyenya mmoha a asitokweene aaloca ni miyo: “Omaale wunla. Nkoona! Mwaco a nihimo na Yuta, mutathaari wa Tavite, oovootha; mwa yeeyo, owo onanwerya ohula eroolu vamoha ni iseelu saya thanu napiili.”
6 Kaamoona veeri* va munyukhu ni wa ikumi sese ni veeri va asitokweene, mwaasaana eepucepuche eemenle, yoowo aakhala ntoko wi aahiiphiwa, aarino manyaka mathanu nameeli, ni miitho mathanu nameeli, nave miitho anataphulela minepa mithanu namiili sa Muluku, seiho saarumihiwe oya veelaponi yoothene ya vathi.
7 Vahilekenle owo aarwa nave akusa eroolu ontatani noolopwana na Yoole akiranthe vamunyukhuni.
8 Vaavaa aakunseiye eroolu, ikumi sese ni asitokweene makhumi meeli nasese yaakokhora vamiithoni va Mwaasaana Eepucepuche nave mmoha ti mmoha aakhalano chakare ni itixela sa ooru osaren’yemo sawunkhela. (Sawunkhela inataphulela mavekelo a aweela murima.)
9 Nave awo anniipa ncipo mvyaani eriki: “Ti nyuwo munaphwanela okusa eroolu ni ohula iseelu saya, vawi nyuwo mwaahiiphiwa nave nnikhami nanyu moomuthumela Muluku achu a mahimo oothene, a ilocelo soothene, a maloko oothene ni a ilapo soothene,
10 nave nyuwo mooweera okhala mamwene ni alipa a mukucho* wa Muluku ahu, nave awo anahaala olamulela elapo yavathi ntoko mamwene.”
11 Kaahoona, nave kaahiiwa nsu na ankeelo ancipale orukurerya munyukhu, na ikumi sa asitokweene nave waaca waya yaari amiile amiileene ni macikhwi macikhweene,
12 nave awo yaanaloca ni nsu noovuwa eriki: “Mwaasaana Eepucepuche yoowo iiphiwe toophwanelela waakhela owerya, muhakhu, miruku, ikuru, ncicimiho, ovuwa ni nreeliho.”
13 Nave kaahiiwa soopatuxiwa soothene wirimu, veelaponi yavathi, vathi va elapo ni mphareya, aa, soothene iri mwemmo, iriki: “Wa Yoole okiraanthe vamunyukhuni ni wa Mwaasaana Eepucepuche yaakhele nreeliho, ncicimiho, ovuwa ni owerya okhala wookhala.”
14 Ikumi seiye sese saanaloca iriki: “Aamen!” Nave asitokweene yaakokhora nave emulapa.
Inoota
^ Mu Ekriki, “mpuwa ni vaate.”
^ Naari: “variyari.”
^ Mu Ekriki, “mooweera omwene, alipa a mukucho.”
