Yohani 12:1-50
12 Mahiku mathanu nammoha ahaakumve Paska, Yesu aaphiya o Petaniya, weiwo Lasaro aakhaleiyewo, yoowo Yesu amvihaleiye mookhwani.
2 Mwawiihiiha, awo yaarehererya yoolya wi emvahe, nave Marta aanaarumeela, nto Lasaro aari mmoha a yaawo aalya* ni yoowo.
3 Voocharela, Mariya aakuxa emeya ya eliituru* ya makhurwa awunkhela, a nartu aphaama ni oowalamelaxa, nave aayeeherya mu inaani sa Yesu apupucha ni miihi awe. Mpa moothemwene waasareyamo wunkhela wa makhurwa.
4 Nto Yutasi Iskariyoti, mmoha a oohuserya awe yoowo aaya omveleela, aaloca ariki:
5 “Nthowa taani yahaatumihiwaaya makhurwa ala awunkhela itenaariyu masana mararu nave ikhorowa sene evahiwa alipa oohaawa?”
6 Owo aalonce yeela, ohiya nthowa na okhala awuukhuwa ni alipa oohaawa, nto owo aari mpava. Owo aanakhapelela ekaaxa ya ikhorowa nave aaniiya ikhorowa saaheliwa mwemmo.
7 Voocharela Yesu aahi: “Mmuhiye, eenreno yeela uupuwelaka sa nihiku na ovithiwa waka.
8 Tiwi achu oohaawa eni enakhala ni nyuwo mahiku oothene, nto miyo nkikhala ni nyuwo mahiku oothene.”
9 Mu elukuluku yeeyo, muloko* muncipale wa Ayuta waasuwela wi owo aari o Petaniya, nave waaya weiwo ohiya nthowa na Yesu, nyenya tho wi omoone Lasaro yoowo aaviihiwe mookhwani.
10 Hiihaa, ahooleli a alipa a mukucho yaanavaanela tho omwiipha Lasaro,
11 woona wi waari nthowa na yoowo Ayuta ancipale yaayaaya weiwo nave enamuroromela Yesu.
12 Mmeeloni mwaya, muloko wa achu waari o efesta o Yerusalemu waahiiwa wi Yesu onnarwa.
13 Mwawiihiiha, awo yaakuxa mirai sa n’yale, enamuthikirerya nave yaapacerya okhuwela eriki: “Khwoo, mumvuluxe!* Ooreelihiwa ti yoowo onarwa mu nsina na Yehova, Mwene Aisarayeli!”
14 Vaavaa Yesu aamphwannyeiye mwaasaana a puuru, owo anwela hiihaa ntoko yaarempwaaya:
15 “Ohoove, mwaana a mwaamuthiyana o Siyoni. Nkoona! Mwene aa onnarwa, anwenle mwaasaana a puuru.”
16 Woopaceryani oohuserya awe hiyiiwexenxe ichu seiha, nto vaavaa Yesu aacicimihiweiye, awo yaahuupuwela wi ichu seiha saarempwa vooloca sa yoowo nave awo yaaheerano ichu seiha wa yoowo.
17 Muloko yoowo waari ni Yesu, vaavaa aamwiichanneiye Lasaro o mahiye,* nave amviiha wookhwani, waatitelela ovaha onamoona.
18 Ti nthowa nenla tho muloko wa achu waakelaaya okumana ni yoowo, woona wi waahiiwa sa yootikhiniha* yeela owo aapankeiye.
19 Mwawiihiiha, Afarisi yaanavaanela eriki: “Hiyaavo nnaweryaahu weera. Moone wi achu oothene annamuchara yoowo.”
20 Wa yaale yaakele olapela o efesta, yaakhalavo akina yaari Akriki.
21 Mwawiihiiha, yaamwaacamela Filipi yoowo aari o Petisaita o Kalileya, nave yaapacerya omveka eriki: “Nnachuna omoona Yesu.”
22 Filipi aaya omuleela Antreya. Antreya ni Filipi yaamuleela Yesu.
23 Nto Yesu awaakhula ariki: “Yoophiya elukuluku wi Mwaana a muchu acicimihiwe.
24 Mweeparipari kinnooleelaani wi, yaahikhala wi enuku ya tiriku yoomorela vachayani nave ekhwa, eyo ennatitelela okhala emoharu; nto wakhala wi yookhwa, ennavaha sawiima sincipale.
25 Yoowo onasivela ekumi awe onamuyeleela, nto yoole oniica ekumi awe mu elapo yeela onamukhapelela wookumini woohimala.
26 Aakhanlevo muchu onachuna okirumeela, akichare, nave weiwo kiryaakawo namuteko aka onarwa akhala weiwo tho. Aakhanlevo muchu onachuna okirumeela, Atiithi aka enarwa emucicimiha yoowo.
27 Vano kiri oothanana,* nave tiheeni kinaphwanelaaka oloca? Tiithi, mukivuluxe mu elukuluku yeela. Naamwi hiihaa, ti nthowa nene kirwiilaaka mu elukuluku yeela.
28 Tiithi mucicimihe nsina nanyu.” Voocharela nsu naakhuma wirimu nriki: “Koocicimiha nenlo nave kinarwa kicicimiha tho.”
29 Muloko wa achu waari vaavale waahiiwa masu yaale nave waapacerya oloca wi yaari etari yoompe. Akina yaani: “Ti munkeelo olonce ni yoowo.”
30 Yesu aahaakhula ariki: “Nsu nenla, hanrwenle wa nthowa naka, nyenya wa nthowa nanyu.
31 Elapo ela ennathorihiwa; vano mulamuleli a elapo yeela onarwa iikariwa.
32 Nave miyo kathomeiwa veelaponi, kinamwiiruuhela achu oothene.”
33 Mweeparipari, owo aaloca yeela wi ooniherye mukhalelo aahaleiye okhwa moohilekela.
34 Voocharela muloko waamwaakhula oriki: “Hiyaano nohiiwa Mmalamulo wi Kristu onamukhala okhala wookhala. Onawerya hai oloca wi Mwaana a muchu onaphwanela othomeiwa? Mwaana a muchu yoowo taani?”
35 Mwawiihiiha Yesu aawaakhula ii: “Omwaleela onamukhala ni nyuwo mu elukuluku vakhaani. Mweeceke elukuluku omwaleela oryaayavo, vawi epiiphi ehoohuruweleeni; oothene yoole oneeca mu epiiphi hanasuwela ti woowi onayeiyewo.
36 Vaavaa muryaanyuno omwaleela, muroromele omwaleela, wi mukhale anamwane a omwaleela.”
Amanle oloca ichu seiha, Yesu aapwahavo wa yaawo iipitha.
37 Naamwi owo aapanke ineneeryo sincipale vamiithoni vaya, awo hiyaamuroromenle,
38 wi yaakhwanele masu a mulipa a miririmu Yesaya, yoowo aalonce: “Yehova, taani ororomenle yeeyo nloncaahu?* Nave, taani ooniheryiwe owerya wa moono wa Yehova?”
39 Yesaya tho aaloca mathowa yaahaala oweeriha awo oheemererya, ariki:
40 “Owo aarweeliha evaasi miitho aya nave uumiha mirima saya, wi ehooneke ni miitho aya nave ehiwexexeke ni mirima saya, ni ehirukunuxe mirima saya wi kaapenuxe.”
41 Yesaya aaloca ichu seiha woona wi aahoona ncicimiho nawe, nave aaloca sa yoowo.
42 Naamwi hiihaa, ophiyerya tho ahooleli ancipale a Ayuta chiryene yaanamuroromela yoowo, nto hiyooniherya vanlakani vene nthowa na owoova Afarisi, wi ehiikariwe mmapuro aya a malapelo;*
43 woona wi yaanasiveliwaxa ocicimihiwa ni achu ohiya ocicimihiwa ni Muluku.
44 Nyenya Yesu aaloca moovuwa ariki: “Yoole onakiroromela hanakiroromela pahiru yoomi, nyenya tho onamuroromela yoowo okirumme;
45 nave yoole onakoona onnamoona tho Yoole okirumme.
46 Koorwa mweelaponi ntoko omwaleela, wi oothene yoole onakiroromela ahititelele okhala mu epiiphi.
47 Nto wakhala wi muchu onniiwa masu aka ahinachariha, miyaano nkinamuthoriha; woona wi nkirwenle othoriha elapo, nyenya ovuluxa elapo.
48 Yoole onakikhooca nave ohineemererya masu aka ookhalano mulipa oomuthoriha. Masu kiloncaaka teni emuthorihe mu nihiku nookuchula.
49 Tiwi nkilonce mwa miyo meekhaaka, nto Atiithi yaawo akirumme, yaawo aneene tanakilamulela ya oloca ni ya wooleelaani.
50 Nave koosuwela wi malamulo aya anataphulela ekumi yoohimala. Mwawiihiiha, soothene kinalocaaka, kinaloca hiihaa ntoko Atiithi akileenlaaya.”
Inoota
^ Naari: “aahaamenle meesa.”
^ Naari: Ela tiwi mphimo wo Roma waahokola ikarama 327.
^ Naari: “mucici.”
^ Mu Ekriki, “Hosana.”
^ Naari: “mahiye anuupuweliwa.”
^ Mu Ekriki, “eneneeryo.”
^ Naari: “okumi aka onnathanana.”
^ Mu Ekriki, “iwalaaya wa hiyo.”
^ Mu Ekriki, “sinakooka.”
