Yohani 14:1-31
14 “Muhiiniwe murima. Mmuroromele Muluku; nave mukiroromele tho miyo.
2 Owannyaya Atiithi aka waacawo mapuro ookhalawo. Yahaari hiihaa, miyaano kaamooleelaani, vawi kinamurowa kareherye nipuro ntakhara nyuwo.
3 Nave tho kimanle opwaha wi kooreheryeleeni nipuro, kinamukooka ni wookuxaani nyuwo wi weiwo kineeraaka kakhalewo nyuwo tho mwakhalewo.
4 Nave nyuwo moosuwela ephiro kinayaakawo.”
5 Tomasi aahi wa yoowo: “Pwiya, hiyaano hannasuwela weiwo munayaanyuwo. Vano nni nsuwele hai ephiro ene?”
6 Yesu aamwaakhula: “Miyaano ka ephiro, eparipari ni ekumi. Haavo onaya wa Atiithi ahivinre wa miyo.
7 Mwaakisuwenle miyo, mwahaala waasuwela tho Atiithi aka. Ovinyerya hiihaano oya muhoolo nyuwo mohaasuwela nave munnawoona.”
8 Filipi aahi wa yoowo: “Pwiya, munoonihe Atiithi, nave yeeyo enamunikhwaana.”
9 Yesu aahi wa yoowo: “Filipi kiri vamoha ni nyuwaano opacerya khalai, nlelo hokisuwenle? Yoowo onakoona miyo, onnawoona tho Atiithi. Vano onalocelani oriki: ‘Munoonihe Atiithi’?
10 Apwanne honaroromela wi miyo kiri mwawiiwanana ni Atiithi nave Atiithi ari mwawiiwanana ni miyo? Ichu kinooleelaakaani nkinaloca mwa miyo meekhaaka, nto Atiithi yaawo ari mwawiiwanana ni miyo anneerano miteko saya.
11 Muroromele wi miyo kiri mwawiiwanana ni Atiithi nave Atiithi ari mwawiiwanana ni miyo; naari muroromele wanthowa na miteko seiha.
12 Chiri mweeparipari kinnooleelaani wi, yoowo oni akiroromele miyo, onamweerano miteko seiho kineeraakano; nave onamweerano miteko mitokweene opwaha iha, vawi kinampwahavo kiyaaka wa Atiithi.
13 Nave tho, echu eri yoothene muneeraanyu mveke mu nsina naka, kinamweerano, wi Atiithi ecicimihiwe moorweela wa Mwaana.
14 Echu eri yoothene muneeraanyu mveke mu nsina naka, kinamweerano.
15 “Waakhanle wi munnakisivela, munamucharihaka malamulo aka.
16 Nave miyo kinamwaaveka Atiithi wi yoovaheeni mukhaviheryi* mukina wi akhale ni nyuwo mahiku oothene,
17 ti munepa weeparipari, yoowo elapo ehinaweryaaya waakhela, ntakhara henawerya woona naari osuwela. Nto nyuwo moosuwela, ntakhara onnatitelela okhala mwa nyuwo nave ori ni nyuwo.
18 Nkoohiyaani meekhiinyu.* Kinamurwa wa nyuwo.
19 Moohilekela elapo hekoonaru, nyenya nyuwo munamukoona, ntakhara miyo kinnakhala nave nyuwo munamukhala tho.
20 Mu nihiku nenlo munamusuwela wi miyo kiri awiiwanana ni Atiithi aka nave nyuwo muri awiiwanana ni miyo nave miyo ni nyuwo.
21 Yoowo oneemererya malamulo aka nave anachariha, yoowo tonakisivela miyo. Hiihaanto, yoowo onakisivela, Atiithi aka enarwa emusivela nave miyo kinammusivela ni wiisooneiha wa yoowo.”
22 Yutasi mukina, ohiya Iskariyoti, aaloca ni Yesu ariki: “Pwiya, tiheeni yeeren’ye wi munachuna wiisooneiha wa hiyo nave ohiya wa elapo?”
23 Yesu aamwaakhula ii: “Oothene yoole onakisivela, onamwiiwelela masu aka, nave Atiithi enarwa emusivela, nave hiyo nnamurwa nikhaleke* ni yoowo.
24 Yoowo ohirino osivela wa miyo hanachariha masu aka. Masu yaawo mwiiwalaanyu tahi aka, nto ta Atiithi yaawo akirumme.
25 “Kinnooleelaani ichu seiha elukuluku yeela kiryaaka ni nyuwo.
26 Nyenya mukhaviheryi, munepa waweela, yoowo Atiithi anahaalaaya orumiha mu nsina naka, onarwa woohusihaani ichu soothene ni owuupuxeryaani ichu seiho kooleenlaakaani.
27 Kinnoohiyeryaani murecele; kinnoovahaani murecele aka. Nkinoovaahani ntoko elapo yavathi enavahaaya. Muhikhale awiiniwa murima naari awoova.
28 Nyuwo mohiiwa yeeyo kooleenlaakaani kiriki: ‘Kinamurowa nave kinamukookela wa nyuwo.’ Waakhanle wi munnakisivela, hakalalani, voosuwela wi kinaya wa Atiithi, vawi Atiithi atokotoko okipwaha miyo.
29 Kohooleelani ichu seiha sihaakumve weereya, wi vaavaa ineeraaya seereyeke, muroromele.
30 Nkilekela kilocaka ni nyuwo, woona wi mulamuleli a elapo onnarwa, nave owo haanono owerya mwa miyo.
31 Nto wi elapo esuwele wi kinnaasivela Atiithi, kinneera hiihaa ntoko Atiithi akilamulenlaaya. Vinyani, nipwahevo vaava.
