Yohani 21:1-25
21 Imanle seiha, Yesu aahiisooneiha* tho wa oohuserya awe waacamela ephareya yo Tiperiyate. Owo iisooneihe mmukhalelo ola:
2 Vaavaa, yaari vamoha Simoni Petru, Tomasi (yoowo awiichaniwa Maphapo), Nataniyeli o Kana o Kalileya, anamwane a Sepetewu, vamoha ni oohuserya awe akina apiili.
3 Simoni Petru aahi wa yaawo: “Kinaya ototha ihopa.” Awo yaahi wa yoowo: “Nnamoochara.” Awo yaayawo enwela mwaaceya, nto hiyaaphanre echu ohiyu woothene.
4 Oyaaka nuuxa, Yesu aaheemela oxerexere wa ephareya, nto oohuserya ehimusuwela wi ti Yesu.
5 Voocharela Yesu aahaakoha: “Anaaka, mookhalano echu* ya olya?” Awo yaahaakhula: “Hooye!”
6 Owo aahi wa yaawo: “Vonyeryani mulapa makupa a moono woolopwana a mwaaceya, munamphara ihopa.” Mwawiihiiha awo yaavonya, nto ehinawerya ocucha mulapa wanthowa na waaca wa ihopa.
7 Oohuserya yoole Yesu aamusiveleiye aahi wa Petru: “Ti Apwiya!” Vano Simoni Petru iiwaleiye wi ti Apwiya, aawara* yoowara awe, woona wi aari eepwitikiri ene,* nave acuphela mphareya.
8 Nyenya oohuserya akina yaarwa ni mwaaceya mukhaani, enacucha mulapa yoole waasaren’ye ihopa, woona wi hiyaarakamenle omokoni, yaari pahiru echu ya ameeturu* makhumi mathanu namaxexe.*
9 Vaavaa yaaphiyalaaya omokoni, yaahoona mooro wooxiwakavo ihopa; nave tho saakhalavo ipaau.
10 Yesu aahi wa yaawo: “Muruuhe ihopa ikina seiho mphanraanyu hiihaano.”
11 Mwawiihiiha, Simoni Petru aawela mmwaaceyani, apurulela omokoni mulapa yoowo waasaren’yemo ihopa itokweene, sawaakhwana nsana nimoha ni makhumi mathanu nararu.* Naamwi saarimo ihopa sincipale, mulapa hiwaapasen’ye.
12 Yesu aaloca ni yaawo ariki: “Murwe mulye.” Nto haavo oohuserya mmoharu mano aawenrye omukoha ariki: “Nyuwo mwaani?” Woona wi awo yaanasuwela wi yaari Apwiya.
13 Yesu aakuxa ipaau aavaha, nave aaheerano emohamoha tho ni ihopa.
14 Ela yaari ekwaha yaneeraru Yesu oonen’yeiye wa oohuserya awe, amanle oviihiwa mookhwani.
15 Yaamalinhaaya olya, Yesu aamukoha Simoni Petru ariki: “Simoni mwaana a Yohani, onnakisivela miyo opwaha iha?” Owo aamwaakhula: “Aa Pwiya, nyuwaano moosuwela wi kinnoosivelaani.” Yesu aahi wa yoowo: “Olyiheke ipucepuche saka.”
16 Owo aamukoha tho ekwaha yanaawiili ariki: “Simoni mwaana a Yohani, onnakisivela?” Owo aamwaakhula: “Aa Pwiya, nyuwaano moosuwela wi kinnoosivelaani.” Yesu aahi wa yoowo: “Okukhuleke ipucepuche saka.”
17 Owo aamukoha tho ekwaha yaneeraru ariki: “Simoni mwaana a Yohani, onnakisivela miyo?” Petru aathanana wanthowa na okohiwa ekwaha yaneeraru wi: “Onnakisivela miyo?” Mwawiihiiha, owo aahi wa Yesu: “Pwiya, nyuwaano moosuwela ichu soothene; nave moosuwela wi kinnoosivelaani.” Yesu aahi wa yoowo: “Olyiheke ipucepuche saka.
18 Chiri kinnooleela wi vaavaa waaryaawe mmiravo, waanawara nave waanaya weiwo waachunaawewo. Nto wuuluvala onamookola moono nave muchu mukina toni oowarihe ni wookeriha weiwo ohinachunaawewo.”
19 Owo aalonce yeeyo wi ooniherye okhwa wa mukhalelo taani Petru aahaaleiye omucicimihano Muluku. Amanle oloca yeela, Yesu aahi wa yoowo: “Otitelele okichara.”
20 Petru aarukununweiye, aamoona oohuserya yoowo Yesu aamusiveleiye aacharaka. Oohuserya ene, ti yoole elukuluku yeele ya yoolya, aamwaacamenle Yesu va naakhoopeni vawe amukoha ariki: “Apwiya taani yoowo oni ooveleeleeni?”
21 Mwawiihiiha, vaavaa Petru aamoonneiye, aamukoha Yesu ii: “Apwiya, hanka mulopwana ola?”
22 Yesu aahi wa yoowo: “Wakhala wi koochuna wi owo atitelele okhala ophiyerya orwa waka, weyaano wookhalanovo echu? Weyo otitelele okichara.”
23 Mwawiihiiha, yaavuwa mwa anna wi oohuserya yoola haahaala okhwa. Nyenya, Yesu haamulenle wi owo haahaala okhwa, nto aariye: “Wakhala wi koochuna wi owo atitelele okhala ophiyerya orwa waka, weyaano wookhalanovo echu?”
24 Oohuserya ene ti yoola oneerela onamoona ichu seiha, yoowo orempe ichu seiha, nave noosuwela wi onamoona awe ti weeparipari.
25 Chiryene, sookhalavo tho ichu ikina sincipale seiho Yesu eenreiye. Waakhanle wi soothene soorempwa emoha ni emoha, kinoona wi mu elapo yoothene hokaakhanlemo nipuro na aliivuru yii erempwe.
Inoota
^ Naari: “aahooneya.”
^ Naari: “ihopa.”
^ Naari: “aahiimakela.”
^ Naari: “awanre yoowara ekhaani.”
^ Mu Ekriki, “echu ya moono 200.”
^ 90.
^ 153.
